Связым и видеоконференц Iэмалыр къигъэсэбэпри, Наркотикхэм япэщIэтынымкIэ къэрал комитетым и зэ­IущIэм хэтащ КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек.

УФ-м къэрал кIуэцI IуэхухэмкIэ и министр Ко­локольцев В. А. иригъэ­кIуэ­кIа а зэIущIэм щытепсэ­лъыхьащ наркотикхэмрэ акъылыр зэIызыгъэхьэ адрей щхъухьхэмрэ ятхьэкъуу щIадзахэр пасэу сэтей къэ­щIынымкIэ лэжьыпхъэхэм, наркотикхэм ятхьэкъуахэр гъэхъужынымкIэ, ахэр гъащIэм хэгъэзэгъэжынымкIэ къэрал центрхэм зегъэу­жьынымкIэ хэкIыпIэхэм.
Колокольцев Владимир къыхигъэщхьэхукIащ наркотикхэм ятхьэкъуахэр гъащIэм хэгъэзэгъэжыным­-    кIэ лъэпкъ системэ зэте­гъэувэныр, наркотикхэм ятхьэкъу­хэр зэпымыууэ нэхъ мащIэ щIыныр, наркотикхэр х­абзэм къемызэгъыу зэры­зэблагъэкIым къихь зэра­ныгъэр зэпымыууэ нэхъ мащIэ щIыныр 2020 гъэм нэсыху Урысей Федерацэм Наркотикхэм япэщIэтынымкIэ и къэрал стратегием къыщыгъэува къалэн нэхъыщхьэ дыдэхэм зэращыщыр.
ЗэIущIэм щыжаIащ щIыналъэхэм щыIэ наркодиспансерхэм я лэжьэкIэр икIэ­щIыпIэкIэ егъэфIэкIуэныр, ахэр зыхуеину мылъкумрэ IэмэпсымэхэмкIэ нэгъэсауэ къызэгъэпэщыныр, къэрал наркологие къулыкъущIапIэхэм я лабораторэхэм иджырей Iэмэпсымэхэр щыгъэувыныр, сымаджэхэр зэ­рагъэхъуж иджырей методикэхэр щIэгъэкъуэн къэ­щIыныр, медицинэм и ­           район IуэхущIапIэхэр Iуэхум хэзыщIыкI наркологхэмкIэ къызэгъэпэщыныр икIэщIы­пIэкIэ зэгугъун хуей Iуэхуу зэрыщытыр.
Нобэм ирихьэлIэу Къэбэрдей-Балъкъэр Республикэм щызэтрагъэуващ наркотик­хэм ятхьэкъуахэр гъэхъу­жынымрэ ахэр гъащIэм хэгъэзэгъэжынымкIэ системэ. Абы хеубыдэ цIыхухэр нар­котикхэм емыгъэтхьэкъу­ным хуэгъэза профилактикэ лэ­жьыгъэр, узыфэр убзыху­нымрэ ар зыпкърытыр гъэхъужынымрэ хуэгъэза лэ­жьыгъэхэр, ап­хуэдэу ме­дико-психологие дэIэпы­къу­ныгъэр.
Зэманым къигъэув къалэныщIэхэм япкъ иткIэ зэ­рагъэпэщыжащ сымаджэу 175-м щеIэзэ стационар, сменэ къэс цIыхуи 100 зэ­кIуа­лIэ поликлиникэ зыхэт наркологие диспансерыр. Район сымаджэщхэм наркологиемкIэ пэшу 12 къы­щы­зэрагъэпэщащ икIи абыхэм зыхуэфащэ IэщIагъэлIхэр що­лажьэ. Прохладнэ райо­ным щыщ Благовещенкэ ­къа­лэм дэт православнэ чли­сэм къыщызэIуахащ нар­­котикхэм ятхьэкъуахэр гъа­­щIэм щыхагъэзэгъэж центр. Апхуэдэ IуэхущIапIэу Кавказ Ищхъэрэм щыIэр а зырщ.