Бурак Озчивит – тюрклю актёр эм фотомодель. Уллу белгилилик «Королёк – жырлаучу чыпчыкъчыкъ» деген фильмни жангыдан алдыргъанларындан сора келгенди жаш артистге. Дагъыда аны «Тамашалыкъ ёмюр» деген уллу проектге да къатышыргъа чакъыргъандыла.
Сабийлик
Бурак Мерсин шахарда туугъанды. Ызы бла юйюр Стамбулгъа кёчгенди. Актёрну атасыны кесини бизнеси бар эди. Аны бла байламлы терк-терк командировкалагъа барыргъа тюшгенди. Алай бла юй башчы сюйгенича юйюнде туралмагъанды. Анасы юй жумушха да къарагъанды, жаш бла къыз да ёсдюргенди.
Гитчелигинде Озчивит телевизорда мультфильмлеге къараргъа сюйгенди. Жашчыкъ алада Бэтменча жигитлеге уллу эс бургъанды, кесим да аллай боллукъма дей эди. Эслирек болгъандан сора кёп заманны кесини тенглери бла футбол ойнай неда спорт залда жараулагъа жюрюгенди.
Школну бошагъандан сора Бурак Стамбулда Мармара университетге окъургъа киргенди. Анда ол кинону, суратлау искусствону эм сурат алдырыуну факультетин  сайлагъанды. Ол кезиуде подиумда модель болуп ишлеп да башлагъанды. Жаш 2006 жылгъа дери эр киши модельлени арасында бек изленнгенледен бири болгъанды. «Тюркню бек аламат модели» деген конкурсха къатыша тургъанды, 2003 жылда алчы жерни да алгъанды. Бир ненча жылдан Бурак Озчивит «Дунияны аламат модели» деген эришиуде экинчи жерни алгъанды.
Биринчи атламла
Атасы телевизорда моданы кёргюзтгенлерине къарап: «Мени жашым бу жаны бла жетишимли болса бек сюерик эдим», дегени бла байламлы къатышханын билдиреди. Режиссёрла да жашны ол конкурслада кёрюп, фильмледе ойнаргъа чакъырып башлагъандыла. Ол Буракны школда тамата класслада окъугъан заманындан бери мураты эди.
Биринчи гитче рольну «Минус 18» деген триллерде ойнагъанды. Бир жылдан «Амалсыздан эр болуу» деген мелодрамада, ызы бла «Жукъгъан ауруудан ауругъан», «Юйюрлю юй», «Сатхычлыкъ» эм «Гитче жашырынлыкъла» деген сериаллада да ойнагъанды.
Уллу белигиликни актёргъа тарых-биографиялы кёп сериялы «Тамашалыкъ ёмюр» деген фильмде осман империяны таурухлу аскер башчысы Малкочоглу Бали-бейни ролю келтиргенди. Съёмкала бла байламлы Бурак омакъ мыйыкъла ёсдюргенди. Аны Тюркде къараучула асыры жаратхандан кёп эр киши да мыйыкъла ёсдюргендиле.
Бурак Озчивитни сау дуниягъа белгили этген рольладан бири «Королёк – жырлаучу чыпчыкъчыкъ» деген фильмде Кямранны ролюду. Баш тиширыу сыфатны Мерве Болугур къураргъа керек эди. Ол «Тамашалыкъ ёмюрде» Нурбану-султанны ойнагъанды. Алай ол, башха жумушла бла байламлы ашыгъышлы жолоучулукъгъа атланнганы себебинден, Феридени ролюна Фахрие Эвдженни сайлагъандыла.
Белгилиликни сынау
Жангы чакъырыуланы артистге кёп сакъларгъа тюшмегенди. Не ючюн десенг, аны къараучула къуру да экранда кёрюп турургъа сюйгенлерин бидирип турадыла. Кёп да турмай ала «Сюймеклик санга ушайды» деген мелодрамада эм «Кёгюрчюн учханды» деген комедияда кёргендиле.
2015 жылда актёр жангы сериалда ойнагъанды, ол россейли экранда «Къара сюймеклик» деп чыкъгъанды. Баш тиширыу рольну, Буракны сюйгенин Неслихан Атагюль ойнагъанды.
Экранда уллу сюймекликни керти да болгъанча кёргюзтгенликге, жашауда артистле бир бирлерин сюймей эдиле. Аны сылтауу уа актрисаны жашауда сюйген адамы экранда Озчивитге сюймекликни ачыкъ кёргюзтгенин жаратмай эди. Бир къауум сценаны эки актёрну да плёнкагъа башха-башха алдырып, ызы бла бирге монтаж этгендиле.
2016 жылны январь айында Буракны чыгъармачылыкъ жолу байыкъгъанды,  ол «Мени къарындашым» деген кинода Хаканны сыфатын аламат къурагъанды. 2017 жылда уа аны экинчи кесегин да алдыргъандыла.
2018 жылда «Жашаууму берликме» деген аскер боевик да экраннга чыкъгъанды. Рецензиялада анга ауур, таза эр киши кино дегендиле. Анда жюрекге жетген, кёлюнгю кётюрген сценала бек кёпдюле. Съёмкала баргъан майданлада аны нёгери Керем Бурсин болгъанды.
Усталыгъыны ёсюую
2019 жыл актёргъа таза да сайлагъан усталыгъында эм бийикге кётюрюлген кезиудю. «Жаратылыу: Осман» аскер телесериал, Озчивит бла баш рольда, рейтингде биринчи жерлени алгъанды, «Чукур» деген кёпсерияла криминал драманы да артда къоюп. Буракны аламат мыйыкълары узунуракъ эм къалыныракъ да болгъандыла, чачы да тюрленнгенди – фильмде чачы узунуракъды. Критикле проектни аллай жетишимли боллугъуна ийнанмай эдиле, продюсер Мехмет Боздаг а ол заманда 2-чи сезонну алдырыргъа сагъышланнганды, 2020 жылда уа аны жашауда болдургъанды.
Жулдузлу актёрну Altinyildiz Classics деген компания кюз арты-къыш 2020-2021 кезиуде эр киши кийимлени кёргюзтгенде кесини баш келечиси болурун излегендиле.
2021 жылда «Жаратылыу: Осман» проектни 2-чи сезонуну съёмкалары бардырыладыла. Дагъыда «Машаны сангыраукъулакълары» деген проектни башларгъа хазырланадыла. Аны режиссёру Уайт Кроссду. Анда Озчивит баш рольладан бирин ойнарыкъды. Триллер кёргюзтюллюк кезиу алыкъа белгисизди.
Жашау жолу
Кёп заманны Озчивитни бла фотомодель Джейлан Чапойну бир бирлерин сюйгендиле. 2014 жылны ахырында аланы араларына сууукълукъ киргенди. Тиширыу артистни башха актрисала бла ойнагъанда сюймеклик сценалагъа къатышханын жаратмагъанды эмда актёрну иш графигинде солургъа заманы къалмагъаны болгъанды айырылыуларыны баш сылтаулары.
«Королёк – жырлыучу чыпчыкъчыкъ» деген сериалны съёмкалары баргъан кезиуде актёр Фахрие Эвджен бла танышады. Ол кезиуде Бурак алыкъа Джейлан бла тюбеше эди. Сюймеклигине къоркъуу болгъанын ангылагъан къыз Фахриени жаратмагъанды. Алай ол тюбешиуден бир зат да чыкъмагъанды.  2015 жылда «Сюймеклик санга ушайды» деген мелодрамада ойнагъан кезиуде, жаш адамланы араларыда сюймеклик жилтин жаннганды. Бу суратлау фильмни продюсерлеринден бири Бурак эди. Аны себепли Фахриени кеси чакъыргъанды баш жигитни сыфатын къураргъа. Ол кезиуде Джейлан тёзалмагъанлай Озчивитни къояды. Алай бла жаш адамла бир бирлерине эс бургъандыла.
Айтыулагъа кёре, Фахрие Эвдженни къылыгъы къыйын эди. Алай кеси сайлагъан артист бла тюбешген кезиуде тёзюмлюлюгюн кёргюзтгенди. Интервью бергенде ол, Озчивит къылыгъын тюрлендиририн излемезлигин айтханды. Не ючюн дегенде, кеси сайлагъан эр киши тюрленнгенинде магъана кёрмегенин билдиргенди.
Кёп да турмай Бурак, кеси арендагъа алгъан журтну артха къайтарып, къызны юйюне кёчеди. Кийимлерин бир жерден башха жерге кёчюрюрге излемегени бла байламлы, къыз кеси сюйгенди алай болурун. Бир къауум ай ала бирге жашап тургъандыла. Кёпге созмай Бурак бла Фахрие юйюр къурагъандыла. Айтыулагъа кёре, 2016 жылны февраль айында окъуна ала шариат къагъытха къол салгъан эдиле. 2017 жылны 29 июнюнда той этгендиле.
Буракны бла Озчивитни тойлары
Къууанчлы иш Босфор жагъада Sait Halim Pasa тарых виллада бардырылгъанды.  Байрам  жабылгъан халда бардырылгъанлыкъгъа, къонакъла социал сетьледе кеслерини аккаунтларында суратланы салып тургъандыла. Актёрланы фахмулулукъларына табыннганла кеслерини алгъышларын да жазгъандыла, той баргъан кезиуде жаш келин юч тюрлю жыйрыкъ алышындыргъанын да кёргендиле. Жаш адамла биринчи тепсеулерин да тепсегендиле. «50 оттенков серого» фильмден музыканы сайлагъандыла ол тепсеуге.
Бурак Озчивит Араб Эмиратлада белгили болгъаны бла байламлы тойну анда бардырыргъа да чакъыргъандыла. Аны къураргъа айтхан бизнесмен 2 миллион доллар къоратырыгъын да айтханды. Дагъыда аланы бир ай солургъа Дубайгъа чагъыргъанлары да белгилиди. Алай экисине да Бурак угъай деп, жаш юйюр Мальдивыге атланнганды.
Бурак, сабий заманындача, топ ойнайды, сюйген командасыны матчларына да барады. Аны гаражында уа сейир машиналаны кёрюрге боллукъду. Озчивитни кесини «Balibey Döner» деген аты бла рестораны да барды. Ол Стамбулдады. Актёр кесини жашауун жашырмайды: ол эм аны юй бийчеси социал сетьледе терк-терк кёрюнедиле. Кийимлени кёргюзтюулеге Москвагъа Озчивит кёп кере келгенди. Ишден бош кезиуде Бурак сурат да ишлейди.