КъМР-ни Парламентини Билим бериу, илму эм жаш тёлюню ишлери жаны бла комитетини башламчылыгъы бла депутатла республиканы колледжлеринде болгъандыла. Жеринде бардырылгъан тюбешиуде «Билим бериу» миллет проектни «Жаш профессионалла» федерал проектини чеклеринде орталыкъ профессионал билим бериу системаны айнытыуну амаллары сюзюлгендиле.

Анга Парламентни спикери Татьяна Егорова, аны орунбасарлары Жанатайланы Салим бла Мурат Карданов, комитетни башчысы Нина Емузова, жарыкъландырыу, илму эм жаш тёлюню ишлери жаны бла министр Анзор Езаов, профессионал  билим берген учрежденияланы келечилери да къатышхандыла.
Ала автомобиль-жол, «Къурулушчу» эмда гуманитар-техника колледжледе болгъандыла.
Татьяна Егорова жолоучулукъну юсюнден былай айтханды:
- Ахыр жыллада орта профессионал билим бериуде уллу тюрлениуле бардыла. Ол а системаны айнытыргъа, аны бла бирге уа республиканы экономикасына керекли кадрла хазырларгъа  онг бергенди.   «Билим бериу» миллет проектни «Жаш профессионалла» федерал проектини себеплиги бла учрежденияланы ырысхыларын айнытыргъа, инфраструктураны игилендирирге къолдан келгенди. Аны бла бирге «Жаш профессионалла», «Абилимпикс» эришиуле да кёллендиргендиле,-дегенди ол.
 Жетишимле бла бирге  кемчиликле да къалгъанларын, ала жыйылыуда сюзюллюклерин да чертгенди ол. «Жеринде къуралгъан жыйылыула кемчиликлени кеси кёзюбюз бла кёрюрге онг бередиле»,-деп къошханды ол.
Депутатла бла къонакъла колледжлени мастерскойларыны болумлары бла шагъырейленнгендиле, студентле эм устазла бла ушакъла бардыргъандыла.  
Кенгеш а Къабарты-Малкъар гуманитар-техника колледжде болгъанды. Аны Мурат Карданов ачханды. Ол устазлагъа билим бериуню качествосу игиленнгени ючюн ыразылыгъын айтханды эмда тюбешиуге къатышханланы орта билим бериу учрежденияланы бошагъанланы иш бла жалчытыуну, ала башха регионлагъа кетмезча мадарланы юслеринден айтыргъа тилегенди.
Нина Емузова уа сферада кемчиликлеге эс бургъанды. Ол санда ырысхыны жангыртыуну болжалларына, «WorldSkills Russia» проектни чеклеринде экспертлени хазырлаугъа эм башхалагъа.
- Хайырлы система къуралыргъа керекди. Законлада тюрлениуле керек эселе, биз предложениялагъа ачыкъбыз,-дегенди ол.
 КъМР-ни Жарыкъландырыу, илму эм жаш тёлюню ишлери жаны бла министерствосуну профессионал билим бериу жаны бла бёлюмюню таматасы Оксана Мякининаны айтханына кёре, ведомствону жууаплылыгъында 9 колледж барды. Алада 9 мингден аслам адам окъуйдула, устазланы  бла мастерлени саны 400-ге  жетеди. Былтыр 2172 адам бошагъандыла аланы, быйыл а окъуугъа 3256 инсан киргендиле.
Ведомстволаны араларында хайырлы байламлыкъла къурар мурат бла республиканы промышленностун (экономикасын) кадрла бла жалчытыу жаны бла Регион низамны  планы хазырланнганды. Аны бла бирге «Жылны устасы» битеуроссей конкурсну регион бёлюмюн бардырыуну жорукълары да къабыл кёрюлгендиле.
Профессионал билим бериуде иги жанына тюрлениуле болгъанларына ишчи усталыкъла жаны бла эришиулени эсеплери шагъатлыкъ этедиле. Хар жыл да республикада «Жаш профессионалла»   («WorldSkills Russia») эм «Абилимпикс» эришиуле бардырыладыла.
Оксана Мякинина профессионал билим берген ведомстволу организацияланы ишлерини юсюнден да билдиргенди. Аны айтханына кёре, алада саулукъларына кёре чекленнген онглары болгъан жюзден аслам адам окъуйдула. Ала он усталыкъгъа кёре аладыла билим.   Колледжледе саулукъларына кёре чекленнген онглары болгъан жашла бла къызла тенглери бла дерслеге жюрюрча, ала бла бирге окъурча мадарла къураладыла.
 Профессионал усталыкъны  «WorldSkills Russia» эм «Абилимпикс» чемпионатларыны регион бёлюмлерин къурагъанда экспертлеге иш бериучюле сайланадыла. Анга къатышханлагъа уа Урунуу эм социал къоруулау министерство ишге тохташыргъа сертификатла береди.
   2019 жылда автомобиль-жол, «Къурулушчу» эмда гуманитар-техника колледжледе грантла алгъандыла – битеу да бирге 68 миллион сом. Ахчаны болушлугъу бла къуралгъан мастерскойла   «Машинист дорожных и строительных машин» эм «Мастер по ремонту и обслуживанию автомобилей» усталыкълагъа кёре юйретирге онг берликдиле.
Къабарты-Малкъар гуманитар-техника колледжде былтыр декабрьде «Социал сфера» жаны бла тёрт мастерской ачылгъанды. Быйыл а энтта сегизисин къураргъа мурат барды.
– Пандемия ишибизни тюрлендирмей къоймагъанды. Болсада шёндю хал игиди, кемчиликле кетериледиле,-дегенди докладчы.
 Жыйылыуда гуманитар-техника колледжни башчысы   Барасби Абазов, «Жаш профессионалла» къымылдауну регион бёлюмюню таматасыны орунбасары   Мурат Коков, «WorldSkills Russia» проектни «Кичи класслада билим бериу» бёлюмюню эксперти,   Къабарты-Малкъар къырал университетни усталыкъла жаны бла арасыны башчысы Людмила Кузьменко, КъМР-ни Сатыу-алыу-промышленный палатасыны башчысы Хасан Гукетлов,   Эльбрусда регион колледжни башчысы Отарланы Мухтар да сёлешгендиле.
Ахырында Нина Емузова жыйылыугъа къатышханлагъа ачыкъ, профессионал ушакъ ючюн ыспас этгенди эмда системада болгъан кемчиликлени тамамлар ючюн комплекс мадарла керек болгъанларын чертгенди.