Быйыл окъуу жылны кёбюсюн окъуучула дистанция халда оздургъандыла. Устаз классда дерсле бергени бла компьютер бла хайырланып окъуу тенг болмагъаны кимге да баямды. Аны хатасындан кёпле экзаменлени бералмай къалырла деген къоркъуу бар эди. Алай КъМР-ни билим бериу министрини орунбасары Екатерина Мисостова айтханнга кёре, быйыл сынаула тап оза барадыла. Алыкъа эсепле толусунлай белгили тюйюлдюле, резерв эм къошакъ кюнледе да экзаменле бардырыллыкъдыла, алагъа сылтаулары болгъанла эм справкаларын кёргюзтгенле къатышырыкъдыла.
Битеу да болум августда белгили боллукъду. Болсада шёндю окъуна бир талай тарих белгилиди. Сёз ючюн, орус тилден сынауда отуз тёрт выпускник жюз бал алгъандыла. Былтыр а ала жаланда онеки эдиле. Битеу жюз балл салыннган ишлени Москвада жангыдан тинтирикдиле.
Орус литературадан экзаменни бир жюз бла сексен алты сабий бергендиле, аладан онсегиз проценти бийик белгиле алгъандыла. Географиядан элли эки окъуучуну билимлери сыналгъанды, ала да барысы иги белгиле алгъандыла. Жарсыугъа, химиядан болум артыкъ бек къууандырмагъанды. Битеу да бу предметден иги балла аллыкъларына ышанып келген жюз бла къыркъ эки сабийден къыркъ жетиси сынаудан ёталмагъандыла. Химиядан билим битеу медицина бла байламлы усталыкълагъа, дагъыда химик, биолог, эколог болургъа сюйгенлеге керекди. Алай быйыл устазланы, сабийлени да химиядан эсепле къууандырмагъандыла.
Екатерина Мисостова билдиргеннге кёре, 2021 жылда хар выпускникни беш окъуу юйге, он усталыкъгъа къагъытларын берирге эркинлиги барды. «Алгъын, биз окъугъан заманда, жаланда бир окъуу юйге, бир усталыкъны сайлап бара эдик. Шёндю уа бирине киралмасала, башхасына барадыла, аны къой да, къайсы шахарда билим алыргъа сюйселе да, сайларгъа онглары барды», - дегенди. Министрни орунбасарыны оюмуна кёре, битеу школлада сабийлени, ата-аналаны сынаулагъа психологла, устазла бек тынгылы хазырлагъандыла. Болсада Чегем районда экзаменден сора бир къызны эси аугъанды, анга мычымай медицина болушлукъ этилгенди.
Битеу да алып къарагъанда, орус тилден эм литературадан, химиядан, географиядан экзаменле тап озгъандыла, бизни республикада тарихле Россейде орталыкъ эсеплеге келишедиле.
