Россельхознадзорну бизни республикада Референт арасында малчылыкъны ветеринария-санитария эмда лабораторияла жаны бла жумушларын жалчытыуну юсюнден кенгеш бардырылгъанды. Анда бу темала бла байламлы докладларын КъМР-ни эл мюлк министрини орунбасары Мачраил Шетов, сагъынылгъан араны башчысы Хаути Сохроков, Россельхознадзорну СКФО-да регионла аралы управлениясыны башчысыны орунбасары Дмитрий Меркулов, республиканы Ветеринария управлениясыны таматасы Аслан Арамисов сёлешгендиле.
Кенгешге къатышханла, ол санда талай къырал ведомстволаны келечилери да, республикада малчылыкъ сферада эпизоотия болумну сюзгендиле, болгъан кемчиликлени, борчланы юсюнден хапарлагъандыла, аланы тамамлау жолланы къалай кёргенлерин туура этгендиле. Айтханларыча, бу бёлюмде къыралны баш борчу тап инвестициялы политиканы бардырыуду. Къумалы иш бла кюрешген мюлклени къыйматлылыгъын кючлендириуню, мал ашла бла жалчытыуну игилендириуню да эм башына салыргъа тийишлиди.
Специалистле оюм этгенлерине кёре, республиканы экономикасында эмда социал сферасында баш борчладан бирине малчылыкъны айнытыуну, аны къыйматлылыгъын кючлендириуню санаргъа керекди: «Адамланы иш бла жалчытыу, къолайлыкъларын игилендириу, саулукълу аш, сора дагъыда аш-азыкъ жаны бла къоркъуусузлукъ да ма олду». Эл мюлкде жарашдырылгъан продукцияны 40 процентден артыгъын малчылыкъ береди, дегендиле жыйылгъанла.
Кенгешни кезиуюнде мюлкледе ветеринария эмда санитария жаны бла хал къалай болгъаныны эмда къоркъуулу аурууладан къырылгъан малланы ёлюклери асыралгъан жерлеге контроль нечик этилгенини юсюнден да сёлешген эдиле.