Россейде июньну ючюнчю ыйых кюнюнде Медицинада ишлегенлени кюню белгиленеди. Адамланы саулукъларын къоруулауда, жукъгъан ауруулагъа къажау ишде, халкъны ырахматлы жашауун жалчытыуда жетишимле болдургъанланы КъМР-ни Башчысы Казбек Коков алгъышлагъанды эмда къырал саугъала бергенди.
Белгиленнгенлени арасында врачла, медсестрала, эпидемиологла, фельдшерле, Роспотребнадзорну къуллукъчулары да бар эдиле. Къууанчлы тюбешиуге КъМР-ни Парламентини спикери Татьяна Егорова, КъМР-ни Башчысыны Администрациясыны таматасы Мухамед Кодзоков да къатышхандыла.
Казбек Валерьевич, жыйылгъанланы алгъышлай, медицинада ишлегенле билимлерин, сынауларын аямай къыйын эм жууаплы жумушла толтургъанларын чертгенди. «Къайда ишлесегиз да: поликлиникада, стационарда, акушер пунктда,- адамны жашауу, аны юйюрюню болуму, республиканы, халкъыбызны келир кюню да сизни билимигизге, иш кёллюлюгюзге кёре къуралгъанын ангылайсыз»,-дегенди ол.
Арт кезиуде медиклени ишине кёз къарам тюрленнгенин да белгилегенди республиканы оноучусу.«Битеу дунияда да жукъгъан ауруу жайылгъан кезиуде медицинаны сайлагъанлагъа сый, намыс берилгени бла бирге, сизге жигитлегеча къарайдыла. Коронавирусха, башха къыйын ауруулагъа къажау кюрешде сиз ал тизгинледе турасыз. Адамланы жашауларын, саулукъларын къоруулай, ишчи борчугъузну бийик даражада толтурасыз. Жангы сынаула уа медиклени магъаналарын ангыларгъа онг бергенди»,-деп къошханы республиканы оноучусу.
Пандемияны биринчи кюнюнден башлап, республиканы врачлары, фельдшерлери, медсестралары, терк медицина болушлукъ берген бригадаланы келечилери, эпидемиология службаланы къуллукъчулары, жашауларына къоркъуу болгъанына да къарамай, адамларыбызны жашауларын къоруулауда къолдан келгенни этгенлерин да белгилегенди Казбек Валерьевич алгъышлау сёзюнде. «Сайлагъан ишигизге, халкъыбызгъа быллай кертичилик, сёзсюз, алгъышлаулагъа тийишлиди»,-дегенди ол.
Былтыр а Россейни Президенти Владимир Путинни Указы бла энчи къырал саугъала кийиргенди: Пирогов атлы орден бла Лука Крымский майдал. Къууанчлы тюбешиуге чакъырылгъанланы арасында уа бу бийик къырал саугъалагъа тийишли болгъанла да бар эдиле. «Ала коронавирусну жайылыуун тохтатыуда магъаналы жумушла бардыргъанладыла. Бир биригизге билеклик эте ишлегенигизни хайырындан эпидемиология болумну контрольда тутаргъа онг чыкъгъанды. Саулукъ сакълауда ишлегенлеге иш кёллюлюгюз, жууаплылыгъыз, халаллыгъыгъыз, хурметлилигиз ючюн жюрегимден ыспас этеме. Бу къыйын кезиуде Къабарты-Малкъарны саулукъ сакълау системасы ышаннгылылыгъын кёргюзтгенди»,-деп къошханды республиканы башчысы.
Сёзюню ахырында ол власть органла мындан ары да саулукъ сакълауну айнытыугъа энчи эс бурлукъларын чертгенди. «Бизни борчубуз адамларыбыз тийишли болушлукъну алырча, медиклерибиз а шёндюгю излемлеге келишген болумлада ишлерча, къыйынлары ючюн тийишли хакъ алырча этергеди»,-дегенди ол.
Ызы бла саугъалау башланнганды. Коронавирус жукъгъан аруугъа къажау ишде къыйынлары, профессионал борчларына кертичиликлери ючюн медиклени уллу къаууму РФ-ни Президентини Указы бла Пирогов атлы орден бла саугъаланнгандыла
Ала КъМР-ни Гигиена эм эпидемиология жаны бла арасыны келечилери болгъанларын белгилерчады. Ол санда учрежденияны бактериология лабораториясыны биологу Ирина Алексейцева, врачла-эпидемиологла Радима Алоева, Къурманланы Мадина бла Баккуланы Асият, араны баш врачыны орунбасары Ринат Бараков, врач-вирусолог Валерия Корчагина, вирусология лабораторияны башчысы Элина Мищенко, эпидемиология бёлюмню таматасы врач-эпидемиолог Медина Петрова, артыкъда къоркъуулу жукъгъан аурууланы эм молекулярно-генетика тинтиулени лабораториясыны биологу Черкесланы Замира саугъаланнгандыла.
КъМР-ни Гигиена эм эпидемиология жаны бла арасыны къуллукъчуларыны уллу къаууму РФ-ни Президентини Указы бла Лука Крымский атлы майдал бла да белгиленнгендиле. Ол санда врач-эпидемиологну болушлукъчусу Инна Абазова, вирусология лабораторияны фельдшерлери-лаборантлары Анна Жмур бла Мадина Кармова, артыкъда къоркъуулу жукъгъан аурууланы эм молекулярно-генетика тинтиулени лабораториясыны фельдшерлери-лаборантлары Заира Кетова, Людмила Куксенко, врач-эпидемиологну болушлукъчусу Созайланы Любовь.
Майдалгъа Роспотребнадзорну КъМР-де Управлениясыны бёлюмюню тамата экспертлери Татьяна Луцкая бла Дина Хагабанова да тийишли кёрюлгендиле.
Саулукъ сакълауну айнытыугъа салгъан къыйыны эмда кёп жылланы бет жарыкълы ишлегени ючюн кардиология араны баш врачы Нодар Шардановха «РФ-ни сыйлы врачы» деген ат берилгенди.
Катастрофаланы медицинасыны эм терк медицина болушлукъ берген араны оператив-диспетчер бёлюмюню фельдшери Людмила Головина уа терк медицина болушлукъну бергенде профессионал билими ючюн РФ-ни Президентини Ыразылыкъ письмосу бла саугъаланнганды.
Жыйылыуда КъМР-ни Башчысыны Указы бла «Къабарты-Малкъарны сыйлы врачы» деген ат берилгенле да саугъаланнгандыла. Аланы арасында Сюд-медицина экспертизаны бюросуну башчысы Мечукаланы Алихан, Катастрофаланы медицинасыны эм терк медицина болушлукъ берген араны качествогъа контроль эм клинико-эксперт иш жаны бла бёлюмюню таматасы Мусукланы Раузат да бардыла.
Ол кюн дагъыда «КъМР-ни саулукъ сакълаууну сыйлы къуллукъчусу» деген атха тийишли болгъанланы атлары да белгили этилгендиле.
Элбрус районну ара больницасыны Кёнделенде амбулаториясыны терк медицина болушлукъ бёлюмюню фельдшери Ностуланы Хадис а КъМР-ни Башчысыны Ыразылыкъ письмосу бла саугъаланнганды.
Тюбешиуню ахырында Казбек Коков жыйылгъанланы энтта бир кере алгъышлагъанды.
