Мэкъуауэгъуэм и 20-м Къэ­бэрдей-Балъкъэрым и Правительствэм и Унэм ща­гъэлъэ­пIащ медицинэм и лэжьа­кIуэ 30 хуэдиз. ФIы и лъэныкъуэкIэ зыкъэзыгъэ­лъэ­гъуа дохутырхэм, фельдшерхэм, медсестрахэм, лаборантхэм хуагъэфэща къэ­рал дамыгъэхэр яритащ ­КъБР-м и Iэтащхьэ КIуэкIуэ Казбек. Урысей Федерацэм и Президентым и унафэкIэ, коронавирусым пэщIэты­ным хуащIа хэлъхьэныгъэм, я къалэныр щагъэзащIэм къызыкъуаха жэуаплыныгъэ иным папщIэ, Пироговым и орденыр хуагъэфэщащ цIы­хуи 9-м, Крымский Лука и медалыр цIыхуи 8-м иратащ. Гулъытэ зыхуащIахэм ящыщщ КъБР-м къа­б­загъэм кIэ­лъыплъы­нымрэ эпи­демиологиемкIэ и цент­рым, «Роспотребнадзор»-м КъБР-м щиIэ IуэхущIапIэм я лэжьа­кIуэхэр.
«Урысей Федерацэм щIыхь зиIэ и дохутыр» цIэ лъа­пIэр фIащащ КардиологиемкIэ диспансерым и дохутыр нэхъыщхьэ Щэрдан Нодар. Урысей Федерацэм и Президентым къыбгъэдэкI фIыщIэ тхыгъэр иратыжащ гъуэгум къыщыхъу шына­гъуэхэм пыщIа медицинэм и центрымрэ медицинэ дэIэ­пыкъуныгъэ псынщIэмрэ я фельдшер Головина Людми­лэ. КъБР-м и дамыгъэ лъа­пIэхэр хуагъэфэщащ ме­дицинэм и лэжьакIуэ куэ­дым.
Медицинэм и лэжьакIуэхэм псалъэ гуапэкIэ захуигъэзащ КъБР-м и Iэтащхьэ КIуэкIуэ Казбек.
- Медицинэр гурэ псэкIэ фIэкIа къыхэпх мыхъу IэщIагъэщ. Фэ фи къалэнхэр ­гугъущ, жэуаплыныгъэшхуэ зы­пылъщи, лэжьыгъэм хы­волъ­хьэ къаруи, щIэныгъи, псэ хьэлэлагъи. Апхуэдэуи, фи Iэпэгъущ гуапагъэмрэ гущIэгъумрэ. ЗыкъомкIэ фэ­­лъытащ цIыху щхьэ­хуэхэмрэ унагъуэ куэдымрэ я гъащIэр зыхуэдэнур. Жы-­ ­п­Iэнурамэ, лIыгъэкIэ псы­хьащ фи IэщIагъэр.
Дунейр зэрыт щытыкIэ ­гугъум хьэкъ къытщищIащ дохутыр IэщIагъэм и мы­хьэнэр пхуэмыIуэтэн хуэди­зу зэрыиныр. Пандемиер ­къы­зэрежьэ махуэрэ ди ­до­ху­тырхэр, фельдшерхэр, медсестрахэр, къабзагъэм кIэ­лъыплъхэр, медицинэ дэ­Iэпыкъуныгъэ псынщIэм и лэжьакIуэхэр, эпидемиологием и IуэхущIапIэм щы­лажьэхэр псэзэпылъхьэпIэм Iутщ.
Дыхуейщ ди цIыхухэм медицинэ дэIэпыкъуныгъэ тэ­мэм ягъуэтыну, медицинэм и лэжьакIуэхэм фи IэнатIэ­хэр фызыхуеинухэмкIэ тэмэ­му къызэгъэпэщауэ щыты­ну. Абы теухуауэ мурадхэр диIэщ, - жиIащ КIуэкIуэм.
Медицинэм и лэжьакIуэхэм яхуэфащэ гулъытэм и гугъу щищIым, КъБР-м и Iэтащхьэм къыхигъэщащ ди къэралым и Президентым жиIахэр:
- Урысей Федерацэм и Президент Путин Владимир медицинэм и лэжьакIуэхэм щехъуэхъум къытеувыIащ лэжьапщIэм и Iуэхум. Дя­пэкIэ фи гуащIэм хуэ­фэ­щэн гулъытэ игъуэтынущ. Республикэр зэрыт эпидемиологие щытыкIэ гугъур ди нэIэ щIэдгъэтынымкIэ медицинэм и лэжьакIуэхэм флъэкI къэвгъанэркъым. Фэ фызэрызэкъуэувэм дэ­ри къару къыдет, - жиIащ абы.
КIуэкIуэ Казбек КъБР-м и Правительствэм щагъэлъапIэхэм ехъуэхъуащ узыншагъэ, ехъулIэныгъэ, зэфIэкI яIэну.
Медицинэм и лэжьа­­кIуэ­хэм къабгъэдэкIыу ­КъБР-м и Iэтащхьэм, я махуэр ­хуа­­гъэ- ­лъэпIэныр къызэ­зы­гъэ­пэ­ща­хэм фIыщIэ ­яху­и­­­щIащ, ап­хуэдэуи, и лэ­жьэгъухэм ­ехъуэ­хъуащ Щэрдан Нодар.
- Зэгуэр си лэжьыгъэм ­хуащIа гулъытэм папщIэ си япэ дамыгъэр къызитауэ щытащ псоми пщIэ зы­хуэтщIу ди гум илъ КIуэкIуэ Валерэ. Си гуапэщ нобэрей дамыгъэр уи Iэ къызэрикIар, - жиIащ абы, Iэтащхьэм фIыщIэ хуищIу.