Казбек Коков право низамны жалчытыу жаны бла дайым ишлеген координациялы кенгешни эмда Къабарты-Малкъар Республикада Экономика эм жамауат къоркъуусузлукъну советни жыйылыуларын бирге бардыргъанды. Аны ишине КъМР-ни Правительствосуну председатели Мусукланы Алий, КъМР-ни Башчысыны Администрациясыны таматасы Мухамед Кодзоков, баш федерал инспектор Тимур Макоев, право низамны сакълаучу эмда надзор органланы, кюч структураланы, министерстволаны оноучулары, муниципал къуралыуланы администрацияларыны башчылары къатышхандыла.
Жыйылыуда «Къоркъуусуз эмда тынгылы жолла», «Жашау журтла бла шахар болум», «Экология» миллет эмда федерал проектлени жашауда бардырыуну амаллары сюзюлгендиле. Докладла бла транспортну эм жол мюлкню министри Аслан Дышеков, къурулушну эм ЖКХ-ны министри Алим Бербеков, табийгъат байлыкъланы эм экологияны министри Шауаланы Илияс сёлешгендиле.
Аслан Дышеков билдиргеннге кёре, аварияланы азайтыу эмда ала кёп болгъан жерлени ачыкълау жаны бла белгиленнген ишлени чеклеринде 300 метрден артыкъ жерге буруула, 400 метрге къол тутхучла салыннгандыла, кнопканы басып чакъырырча светофорла, чыракъла да орнатылгъандыла. «Кавказ» трассаны Экинчи Чегемден башлап Нальчикге кирген жерге дери, Бахсанда, Урванда Аушигерни къабакъ эшиклерине дери, Аушигерден Къашхатаугъа дери кесеклерине тынгылы ремонт этилип бошалгъанды.
Юч участкада жолланы тёрт ызлыкълы этиу жаны бла проект да толтурула турады. Чегемде паркны тапландырыу жаны бла ишле барадыла, 2022 жылда жети муниципалитетни айбатландырыу жаны бла проектни къолгъа алыргъа хазырлай турадыла.
Республиканы Башчысы тамамланыла тургъан ишлени качестволарына, аланы ёлчемлерине, хайырланыргъа бериллик заманларына контрольну кючлендирирге буюргъанды. Жууаплы министерстволаны бла администрацияланы башчыларыны эслерин ырахат болумла къураргъа кереклисине бургъанды. «Ол бюгюнлюкде социал политика болгъанын подрядчиклеге ангылатыргъа тийишлиди. Сабийле айбат жерде ёсселе, дуниягъа да ол кёзден къарайдыла. Ала ойнарча майданчыкъла, паркла, жаяу жолчукъла – ала барысы да ариу, тынгылы, кёп жыллагъа жетерча болургъа керекдиле. Подрядчикле битеу ол ишлени тюз да кеслеринеча тынгылы этерге борчлудула»,-дегенди Казбек Коков.
Коронавирус инфекцияны къоркъууун азайтыу жаны бла къошакъ мадарланы сюзюуге да энчи эс бурулгъанды. Роспотребнадзорну КъМР-де Управлениясыны башчысы Жирослан Пагов республикагъа тышындан келгенле барысы да алгъаракъладан окъуна анкеталаны толтурургъа керек болгъанларын, ол санитар-карантин контрольну жалчытыргъа болушуругъун эсгертгенди. Ала дагъыда юч кюнню ичинде лаборатор тинтиуледен ётерге эмда аны эсеплерин къырал жумушланы бир порталына салыргъа тийишлидиле.
Жирослан Пагов республикада коронавирус бла байламлы тохташдырылгъан низамгъа бузукълукъ этгенлеге 196 протокол жарашдырылгъанын, сюдле тазир салыуну юсюнден 106 оноу чыгъаргъанларын да билдиргенди.
Жыйылыуда дагъыда тюрмеледен чыкъгъанланы юслеринден да сёз баргъанды. Аны юсюнден КъМР-ни урунуу эмда социал къоруулау министри Асанланы Алим, Нальчик шахар округну администрациясыны башчысы Таймураз Ахохов билдириуле этгендиле. «Финанс пирамидаланы» къураугъа къажау не мадарла этилгенлерини юсюнден а КъМР-де ич ишлени министри Василий Павлов бла Россейни Банкыны Юг управлениясыны таматасыны орунбасары Алла Храпунова сёлешгендиле.
