КъБР-м и Лъэпкъ музейм щагъэлъагъуэ Жылэ Къантемыр и «GOgen» студием и гъэсэнхэм я сурэтхэр.
Гъэлъэгъуэныгъэм утыку къыщрахьащ Жылэ Къантемыр илъэс зы-тIум къриубыдэу зыдэлэжьа гупым я Iэдакъэ къыщIэкIа лэжьыгъэхэр. Абы яхэтщ мазэм къыщыщIэдзауэ илъэситIым нэблагъэкIэ студием екIуалIэхэр. Сурэт щIыным дихьэххэм я ныбжьыр илъэси 7-м щегъэжьауэ илъэс 80-м ноблагъэ.
- Иджыри зымащIэкIэ узэIэбэкIыжмэ, сурэт щIыным дихьэх си гъэсэнхэм я пщIыхьэпIи къыхэхуэртэкъым пIалъэ кIэщIым къриубыдэу зэгуэр апхуэдэ лэжьыгъэхэр яхуэщIыну. Гъэлъэгъуэныгъэр и щыхьэтщ сурэт щIыным удихьэхмэ, гукъыдэж уиIэмэ, сыт хуэдэ ныбжьым уимытми абы зыхуэбгъэсэну зэрымыкIасэм, - жеIэ Жылэ Къантемыр. - Академическэ щIэныгъэ зиIи, сурэт щIынымкIэ школ е институт къэзыухаи си гупым яхэткъым. Я Iуэху еплъыкIэ, гупсысэкIэ яIэжу си деж къакIуэхэм садоIэпыкъу сурэтыщI гъуазджэм ехьэлIа я хъуэпсапIэхэр къехъулIэнымкIэ, я зэфIэкIым зегъэужьынымкIэ. Си гъэсэнхэр щIэныгъэ зиIэ художникхэм къазэрыщхьэщыкIыр ахъшэ къралэжь мыхъуу, я псэм фIэфI Iуэхум зэрыпэрытым гукъыдэж къазэрыритырщ.
Выставкэр тхьэмахуитIкIэ зэIухауэ щытынущ. Ар яхуэгъэзащ сурэтыщI гъуазджэр фIыуэ зылъагъухэм.