Урысей МЧС-м и Управленэ нэхъыщхьэу КъБР-м щыIэм и унафэщI, къэрал кIуэцI къулыкъум и генерал-майор Надежин Михаил Урысейм и махуэм ирихьэлIэу зэIущIэ гуапэ иригъэкIуэкIащ, цIыхур мафIэсым къезыгъэлахэр гъэлъэпIэным теухуауэ.
Фигу къэдгъэкIыжынщи, мы гъэм накъыгъэм и 24-м Налшык къалэм и Къэбэрдей уэрамым къатибгъуу зэтет унэм и фэтэрхэм я зым мафIэс къыщыхъуат. Ар зылъэгъуа ЩIанкIэ Тембулэт, Амщокъуэ Аскэр, Фрий Валерэ сымэ занщIэу мафIэсгъэункIыфIхэр къраджэщ, унэм щIэлъадэри, фэтэрхэм щыпсэухэм къэхъуар жраIащ. Ахэр къыщIэшынымкIэ сэбэп хъуащ. МафIэс-къегъэлакIуэхэр къэса иужь щIалэщIэхэр абыхэми ядэIэпыкъуащ
Къагъэлъэгъуа хахуагъэм папщIэ Урысей МЧС-м и Управленэ нэхъыщхьэу КъБР-м щыIэм и фIыщIэ тхылъхэр яритащ Амщокъуэ Аскэр Тембот и къуэмрэ ЩIанкIэ Тембулэт Нурбий и къуэмрэ.
- Фэ къэвгъэлъэгъуар лIыгъэмрэ хахуагъэмрэ я щапхъэщ. Дэ гулъытэншэу къытхуэгъэнакъым щIалэщIэ хахуэхэр икIи Управленэ нэхъыщхьэм и унафэщIхэм къабгъэдэкIыу абыхэм фIыщIэ яхуэсщIыну си гуапэщ, - жиIащ Надежин Михаил.