КъМР-ни Башчысыны къуллугъун болжаллы халда толтургъан Казбек Коков орта кюн РФ-ни Федерал къоркъуусузлукъ службасыны КъМР-де Управлениясыны ишчилери эм ветеранлары бла тюбешип, аланы профессионал байрамлары бла алгъышлагъанды.
Республиканы оноучусу къоркъуусузлукъ органланы тарыхы Ата журтубузну айныуу бла байламлы болгъанын белгилегенди. Къыралыбызны жашаууну хар бёлюмюнде не къыйын заманлада да  органлада къуллукъ этгенле аны сейирлерин сакълагъанларын чертгенди Казбек Валерьевич.
- Бюгюн да сиз профессионал борчугъузну бийик даражада толтурасыз. РФ-ни ФСБ-сыны КъМР-де Управлениясыны къуллукъчулары республикада тынчлыкъны, мамырлыкъны, социальный-политика ышаннгылылыкъны сакълаугъа бурулгъан ишге  бийик багъа беребиз. Быйыл Управление кюч эм право низамны сакълаучу структурала бла бирге тышындан келген эм кесибизде болгъан къоркъууланы жокъ этиу жаны бла уллу иш тамамлагъандыла. РФ-ни ФСБ-сыны КъМР-де Управлениясында къуллукъ этгенле мындан ары да алларында тургъан борчланы бийик даражада толтурлукъларына ишеклигим жокъду,-дегенди Казбек Коков.
Ол Управленияны келечилерине батырлыкълары, ишлерин бийик даражада толтургъанлары, Къабарты-Малкъарны къоркъуусузлугъун жалчытханлары ючюн ыразылыгъын айтханды эмда алагъа мындан ары да жетишимле, насып, къолайлыкъ тежегенди. Ол борчларын толтургъан кезиуде жетишимле болдургъанлагъа къырал саугъала да бергенди.