Бу кюнледе Нальчик шахарны Универсал спорт комплексинде художестволу гимнастикадан «Тауланы жомакълары» деген 9-чу ачыкъ чемпионат эм «Динамо» спорт обществону 12-чи биринчилиги ётгендиле. Алагъа Россейни 23 регионундан 500 спортчу къатышханды. Аланы санында Къыбыла Осетиядан, Донецк Халкъ Республикадан, Краснодардан, Элистадан, Москва областьдан, Пятигорскден, Минеральные Водыден, Ставропольдан спортчула болгъандыла. Аладан 150 адам энчи программагъа кёре сынашхандыла, команда эсепде уа 32 къауум эришгендиле.
Турнирни ачылыууна КъМР-ни Парламентини Председатели Татьяна Егорова да къатышханды. Ол кесини алгъыш сёзюнде «Тауланы жомакъларына» битеуроссей даража берилгени, ала спорт эришиулени программасына киргенлери ючюн бек къууаннганын билдиргенди. Аланы Къабарты-Малкъарда бардырыу республикагъа уллу сый болгъанын чертгенди. Бюгюннгю турнир башха эришиулеге жарыкъ жол ачарын тежегенди.
Ызы бла КъМР-ни спорт министрини орунбасары Аналаны Аслан сёлешгенди. Ол а бу спорт ариу эсе да, бек къыйын болгъанын айтханды. Алгъышлагъанланы санына КъМР-ни Парламентини физкультура, спорт эм туризм жаны бла комитетини председатели Арсен Барагунов, КъМР-ни Художестволу эм спорт гимнастикадан федерациясыны таматасы Ирина Тавитова киргендиле.
Эришиулени СССР-ни спортуну устасы, турнирни баш судьясы Наталья Короткова ачханды. Чемпионат башланырны аллында уа грек-рим тутушуудан Олимпиаданы чемпиону, КъМР-ни Парламентини председателини орунбасары Мурат Карданов Елизавета Коротковагъа, Алина Кумыковагъа, Стелла Кабардовагъа спортну устасыны удостоверенияларын бла белгилерин бергенди.
Юч кюн баргъандыла эришиуле. Бизни республикадан Нальчик шахарны, Терк районну «Терчанка», «Грация», «Цыганочка» къауумлары кеслерин кёргюзтгендиле. Ахыр эсеплеге кёре, спортну устасына кандидатыны программасына тийишлиликде биринчи Елизавета Короткова болгъанды. Призёрланы санына Олимпиада Сухомлинова бла Элиза Татарова (I-чи жаш разряд), Гайыланы Амелия бла Надежда Карпова (I-чи спорт разряд) тюшгендиле. Дамира Бербекова - спортну устасына кандидат эм Эльмира Нагоева спортну устасы болгъандыла.
Командалы упражнениялада спортну устасына кандидатны бла спортну устасына программалагъа кёре Нальчик шахардан къауумла къытхандыла. Гимнасткала тренерле Наталья Коротковада, Инна Терентьевада, Татьяна Шугушевада эм Светлана Михайленкода жарау этедиле.
Чемпионатны ахырында Аналаны Аслан спортну устасына кандидатланы удостоверенияларын бла энчи белгилерин Аина Битоковагъа, Элизавета Коротковагъа бла Эльмира Нагоевагъа бергенди. Республиканы артистлери бла чыгъармачылыкъ къауумлары уа концертлери бла спортчуланы, тренерлени да кёллерин кётюргендиле.