Урысей Федерацэм и Къэрал саугъэтыр мы гъэм зратахэм ящыщщ оперэ уэрэджыIакIуэ Герзмавэ Хиблэ.
Ар Пицундэ къалэм къыщалъхуащ. А щIыналъэм и дахагъэм сыткIи хуэфэщэн теплъэрэ макърэ зиIэ Хиблэ «дыщэнэщ» и цIэм къикIыр, ауэ дыщэр зы­хуэхьыпхъэр и макъыр арагъэнщ, дунейм цIэрыIуэ щы­зыщIар аращи.
Хиблэ Сыхъум и музыкэ училищэм фортепианэм щыхуеджащ. Ауэ зэрыцIыкIурэ уэрэд жызыIэ хъы­джэбзым макъ зэриIэм гу лъызыта егъэджакIуэхэмя чэнджэщкIэ 1989 гъэм щIэтIысхьащ Москва и консерваторэ цIэрыIуэм. Иджы езым абы щрегъаджэ.
Чайковскэм и цIэр зезыхьэ зэпеуэм щытекIуа Хиблэ, хуэбгъэфащэ зэрыхъунумкIэ, Театр Иным лэжьапIэ ящтэн хуейт, арщхьэкIэ Лон-дон, Рим, Мюнхен, Венэ, Цюрих, Париж, Милан, Нью-Йорк я театрхэм зэпеуэу ирагъэблагъэу, ехъулIэныгъэшхуэ иIэу абыхэм зыкъыщигъэлъагъуэу хъуа нэу­жьщ Театр Инымрэ Мариинкэмрэ гу къыщылъатар…
2001 гъэм Хиблэ Абхъазым къыщызэригъэпэща фестивалым гъащIэ иIэу къыщIэкIауэ, иджы а зэ­хы­хьэхэм я программэ дыдэмкIэ дуней псом зыкъы­щагъэлъагъуэ, уеблэмэ Карнеги-холлым нэсащ.
ЗэфIэкI зиIэ, гулъытэ зыхэлъ бзылъхугъэм и нэIэ ятригъэтщ Пицундэ дэт музыкэ еджапIэмрэ Сыхъум щыIэ музыкэ училищэмрэ. Уи хэкужьрэ абы и щIэб­лэм­рэ уадэIэпыкъуным нэхъыфI сыт щыIэ!