Корее Ипщэм и къалащхьэ Сеул гъэлъэгъуэныгъэхэр, конференцхэр щрагъэкIуэкI и комплексым дыгъэгъазэм и 6 - 9-хэм щызэхэтащ SIIF-2018 дунейпсо гъэлъэгъуэныгъэ-жармыкIэ. Зэхыхьэм утыку къыщрахьащ щIэныгъэ къэхутэныгъэщIэхэр, абыхэм цIыхухэм я дежкIэ сэбэпынагъыу пылъыр хэIущIыIу щащIащ, апхуэдэуи а лэжьыгъэм фейдэ къыпэкIуэн хуэдэу къызэгъэпэщынми щытепсэлъыхьащ.
А зэхуэсым хэтащ Бэрбэч ХьэтIутIэ и цIэр зезыхьэ Къэбэр-дей-Балъкъэр къэрал университетым полимерхэмрэ композитхэмрэ зи лъабжьэ иджырей материалхэр, технологиещIэхэр 3D печатым къыщыгъэсэбэпыным елэжь и центрым и лэжьакIуэхэр икIи я къэхутэныгъэхэм кърикIуахэр ягъэлъэгъуащ. Центрым и унафэщI Хьэшыр Светланэ зэрыжиIамкIэ, Урысейм и экспозицэм щагъэлъэгъуа къэхутэныгъэ псоми щIэныгъэр ипэкIэ кIуэтэнымкIэ мыхьэнэ яIэщ икIи ахэр гъащIэм къыщагъэсэбэп хъунымкIэ Iэмал псори щыIэщ.
«SIIF зэхуэсым ухэтыным Iэмал къует Урысейм и щIэныгъэ-къэхутакIуэ лэжьакIуэ гупхэм я зэфIэкIхэр дунейм щагъэлъэгъуэнымкIэ, еджапIэ нэхъыщхьэхэр щIэныгъэмрэ техникэмрэ я IэнатIэхэм щызрагъэгъуэта ефIэкIыныгъэхэмкIэ зэ-дэгуэшэнымкIэ, апхуэдэуи ди къэралым къыщагупсыса, щызэпкъралъхьа IэмэпсымэхэмкIэ дунейм и нэгъуэщI къэралхэм сату ядэщIынымкIэ», - жиIащ Хьэшыр Светланэ.
КъБКъУ-м прогрессивнэ полимерхэмкIэ и лабораторэм и ехъулIэныгъэхэр щигъэлъэгъуащ «материалыщIэхэр» секцэм. ИкъукIэ узыщыгуфIыкIынщ зэхуэсышхуэм ди лъахэгъухэм я зэфIэкI зэрыщагъэлъэгъуар, абы и мызакъуэуи, Дунейпсо инвестицэ зэхыхьэшхуэм жэз медалрэ инвесторхэм я Тайвань лигэм и саугъэт щхьэхуэрэ къызэрыщыхуагъэфэщар.
ЖармыкIэм щагъэлъэгъуащ къэрал 31-м щыщ щIэныгъэлIхэм я IэдакъэщIэкIхэр, щIэныгъэ, техникэ IэнатIэхэм я къэхутэныгъэщIэу 640-м щIигъу къызэщIаубыдэу. Лэжьыгъэ нэхъыбэ утыку кърахьащ Китайм, Урысей Федерацэм, Корее Ипщэм, Малайзием, Таиландым, Ираным, Мысырым, Польшэм щыщ щIэныгъэлIхэм.