КъБР-м и Парламентым иджыблагъэ щытепсэлъыхьащ «Iулъхьэм зэрыпэщIэтым теухуауэ» Феде-ральнэ законым къыщыгъэлъэгъуахэр Къэбэрдей-Балъкъэр Республикэм зэрыщагъэзащIэм. «СтIол хъурейм» хэтащ КъБР-м и Парламентым и депутат- хэр, КъБР-м и Iэтащхьэм и Администрацэм, республикэм ЦIыхухэм я хуитыныгъэхэр хъумэнымкIэ и уполномоченнэр, прокуратурэм, МВД-м, УФСБ-м я лIыкIуэхэр.
ЗэIущIэр къызэIуихащ икIи иригъэкIуэкIащ КъБР-м и Парламентым и УнафэщIым и къуэдзэ Жанатаев Сэлим.
- Нобэ зи гугъу тщIы Iуэхум, Iулъхьэ зэрызэIэпа-хым пэщIэтыным, ди зэманым мыхьэнэшхуэ щиIэщ, гугъуехь куэди пыщIащ. Абы ехьэлIа лэжьыгъэхэр къыщыгъэлъэгъуащ «Iулъхьэм зэрыпэщIэтым теухуауэ» Федеральнэ Законым. Ахэр зэ-рагъэзащIэм ди нэIэ тетын хуейщ, - жиIащ Жанатаевым. - Иужьрей зэманым хабзэхъумэ IэнатIэхэр нэхъ жыджэру елэжь хъуащ Iулъхьэ щымыгъэIэным. Апхуэдэуи республикэ унафэщIхэмрэ щIыпIэ унафэр зехьэнымкIэ IэнатIэхэм я лэжьакIуэхэмрэ гулъытэ хэха хуащI Iулъ-хьэм зыщадзеину цIыхубэр къыхураджэным. Апхуэдэ Iуэхум къыхашэ жылагъуэ зэгухьэныгъэхэри. ИтIани, жыIэн хуейщ абы и лъэныкъуэкIэ иджыри гугъуехьхэр дызэриIэр.
КъБР-м и Парламентым Жылагъуэ шынагъуэншагъэмрэ Iулъхьэм пэщIэтынымкIэ и комитетым и унафэщI Кривко Михаил тепсэлъыхьащ «Iулъхьэм пэщIэтыным теухуауэ» законым къищынэмыщIа, а Iуэхум хуэунэтIауэ щыIэ къэрал программэ хэха-хэм. Абы жиIащ КъБР-м и Парламентыр сыт щыгъуи зэрыхущIэкъур къищтэ законхэр зэрыригъэфIэкIуэным. «Iулъхьэ щымыIэн щхьэкIэ псом нэхърэ нэхъыщхьэу делэжьын хуейуэ къызолъытэ ар къыщIежьэ щхьэусыгъуэм. Абы и лъэныкъуэкIэ мыхьэнэшхуэ иIэщ цIыхубэм дадэлэжьэным, жылагъуэ кIэлъыплъыныгъэхэр къызэдгъэ-пэщыным, Iуэхутхьэбзэу хуащIэм я фIагъым теухуауэ зэIущIэхэр едгъэкIуэкIыным», - къыхигъэщащ къэпсэлъам.
КъБР-м и Iэтащхьэм и Администрацэм Iулъхьэ зэрызэIэпахым пэщIэтынымкIэ и управленэм и унафэщI Нэгъуей Аслъэн жиIащ «КъБР-м жылагъуэ гъащIэмрэ цIыхубэ шына-гъуэншагъэмрэ щегъэфIэкIуэн, хабзэр къыщызэпемыгъэудын» къэрал программэм «Iулъхьэ зэIэпыхыным зэрыпэщIэт Iэмалхэр» и гуэдзэным Iуэхугъуэ 32-рэ къызэрызэщIиубыдэр, абыхэм тету я лэжьыгъэр къызэрызэрагъэпэщыр.
- 2020 гъэм Iулъхьэ зэIэпыхыным пэщIэтыныр зи къалэнхэм хыхьэ къэрал лэжьакIуэ 33-м я Iэзагъэм хагъэхъуащ, къэрал, муниципальнэ IэнатIэ увагъащIэхэм ящыщуи цIыху 53-рэ абы пхыкIащ. 2021 гъэм и япэ мазищым апхуэдэ дыдэу зи щIэныгъэм хэзыгъэхъуахэр 7 мэхъу, - жиIащ Нэгъуей Аслъэн. - КъищынэмыщIауэ, Iулъхьэ зэIэпамыхыным къызэрыхураджэ лэжьыгъи йокIуэкI. Псалъэм папщIэ, абыхэм ящыщт 2020 гъэм и еплIанэ мазищым «Стоп, коррупция!» щIалэгъуалэ зэхыхьэр КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм къызэрызэригъэпэщар. Къыхэгъэщыпхъэщ, республикэм и хъыбарегъащIэ IэнатIэхэми мы Iуэхум тхыгъэ, нэтын куэд зэрытраухуэр. Апхуэдэу республикэм и къэрал IуэхущIапIэхэм я сайтхэм тхыгъэ 506-рэ, телевиденэм - 6, радиом - 64-рэкъатащ. Дызэрыт илъэ- сым и япэ мазищым радиом Iулъхьэм щытепсэлъыхьащ 55-рэ, телевиденэм - 13-рэ, сайтхэм тхыгъи 130-рэ къралъхьащ. КъищынэмыщIауэ, къэрал IуэхущIапIэхэмрэ щIыпIэ унафэр зезыхьэ IэнатIэхэмрэ я жылагъуэ советхэм зэIущIэ 30-м нэблагъэ ирагъэкIуэкIащ.
КъБР-м и прокуратурэм Iулъхьэ зэрызэIэпахым пэщIэтынымкIэ законодательствэр зэрагъэзащIэм кIэлъыплъ и къудамэм и унафэщI Бекъул Залинэ ирагъэкIуэкIа лэжьыгъэм хигъэгъуэзащ зэIущIэм хэтхэр. Абы зэрыжиIамкIэ, хабзэр къызэрызэпаудам теухуауэ къыщIагъэщам и бжыгъэр проценти 4-кIэ хэхъуащ.
- Хабзэр къыщызэпауд Iуэхухэр нэхъыбэу епхащ хьэпшып къэщэхуным, къэрал, муниципальнэ мыхьэнэ зиIэ Iуэхутхьэбзэхэр къызэрагъэпэщыным. КъищынэмыщIауэ, я мылъкур, хэхъуэхэр, абыхэм щыщу къагъэсэбэпахэр тэмэму къагъэлъагъуэркъым, уеблэмэ апхуэдэ дэфтэрхэр щамыгъэхьэзыр къохъу, - жиIащ Бекъулым. - Дызэрыт илъэсым и япэ мазищым едгъэкIуэкIа къэпщытэныгъэхэм къызэрагъэлъэгъуамкIэ, Iулъхьэ зэрызэIэпахым пэщIэтынымкIэ законодательствэм къэрал, муниципальнэ къулыкъу зезыхьэхэр зэребакъуэм и бжыгъэм хэхъуащ. Iулъхьэм епхауэ республикэм щалэжь щIэпхъаджагъэхэри процент 39-кIэ нэхъыбэ хъуащ (166-м и пIэкIэ 232-рэ), абы щыщу проценти 8,5-р Iулъхьэ къызэрыIа-хам теухуащ. 2021 гъэм и япэ мазищым Iулъхьэм теухуа щIэпхъаджагъэу ятхам и бжыгъэр 72-рэ мэхъу. Республикэм щIыпIэ унафэр зехьэнымкIэ и IэнатIэхэм Iулъхьэм пэщIэтынымкIэ программэхэр къащтащ. Абы щыгъуэми, къэпщытэныгъэхэм къы-зэрагъэлъэгъуамкIэ, 2019-2020 гъэхэм ятещIыхьауэ а Iуэхухэм хухаха мылъкум и ныкъуэрщ муниципальнэ щIыналъи 5-м къагъэсэбэпар (Прохладнэ къалэм, Прохладнэ, Тэрч, Май, Шэрэдж районхэм). Муниципальнэ щIыналъитIым - Аруан, Шэджэм районхэм - программэм къыщыгъэлъэгъуа Iуэхухэр зэрагъэзэщIэну ахъшэ хухахыххакъым. Прокурор къэпщытэныгъэхэм япкъ иткIэ, Iуэхугъуэ хэхахэмкIэ административнэ жэуа-пым цIыху 34-рэ ирашэлIащ. Псалъэм папщIэ, абы щыщу 2-р теухуат хабзэм къемызэгъыу Iуэху-щIапIэм къыбгъэдэкIыу зыгуэр пщIэкIэ зэрагъэгушхуам. КъБР-м и Жылагъуэ палатэм и унафэщIым и къуэдзэ Федченкэ Людмилэ къыщыпсалъэм жиIащ Iулъхьэ зэрызэIэпахым пэщIэтынымкIэ я жэрдэмхэр къагъэувыну цIыхубэр нобэ зэрымыхьэзырыр. «ЦIыхубэм зы еплъыкIэ яIэу щыткъым Iулъхьэм теухуауэ, гупсысэ зырыз яIэж фIэкIа. Хэти ар къелъытэ гъащIэм къыхыхьэпауэ, абы зыдегъэкIун фIэкIа нэгъуэщI хэкIыпIэ имылъагъуу. НэгъуэщIхэми я фIэщ мэхъу политикэ пэж щыIэмэ, къэралыр абы пэлъэщыну. Дауэ мыхъуми, кIуэ пэтми цIыхухэм нэхъ къагуроIуэ коррупцэм пылъ шынагъуэр зыхуэдэр - къэралым дежкIи цIыхум дежкIи. КъБР-м и Жылагъуэ палатэм мы Iуэхур мызэ-мытIэу къыщытIэтащ икIи Iуэхур зылъахъэхэм ящыщу къэдгъэлъэгъуащ: унафэщIхэмрэ жылагъуэ лIыкIуэхэмрэ тэмэму зэрызэдэмылажьэр, цIыхухэм къэрал IуэхущIапIэхэм дзыхь зэрыхуамыщIыр, нэгъуэщIхэри.
ЗэIущIэм я Iуэху еплъыкIэр къыщагъэлъэгъуащ Налшык къалэ округым и щIыпIэ администрацэм и Iэтащхьэм и къуэдзэ Пащты Аслъэн, Iуащхьэмахуэ районым и щIыпIэ администрацэм кIэлъыплъыныгъэмкIэ и къуда-мэм и унафэщI Ахматов Ильяс, Май муниципальнэ щIыналъэм и щIыпIэ администрацэм и Iуэхухэр зезыгъакIуэ Фомина Иннэ, Кавказ Ищхъэрэм УправленэмкI и академием и кафедрэм и доцент Караев Расул. ЗэIущIэм щыжаIахэр къэлъытауэ зэлэжьыпхъэхэр ягъэбелджылащ.