Окъууда, жамауат жашауда, спортда жетишимле кёргюзтген жашлагъа бла къызлагъа РФ-ни инсаныны паспортун къууанчлы халда КъМР-ни Парламентинде Россейни кюнюню аллында бериу тёреге айланнганды. Быйыл да республиканы районларындан бла шахарларындан 15 окъуучу законла чыгъарыучу органнга чакъырылгъандыла. Аланы жашауларында бу магъаналы иш бла Парламентни спикери Татьяна Егорова, аны орунбасары Мурат Карданов, Культура, граждан обществону айнытыу эм информация политика жаны бла комитетни башчысы Заурбек Кумалов алгъышлагъандыла.
Татьяна Борисовна бу кюн жашланы бла къызланы эслеринде кёп жыллагъа къаллыгъына ишексиз болгъанын чертгенди. «Паспортну алыу сабийлик бошалып, сиз жашауну жангы жолуна чыкъгъаныгъызны белгисиди. Аны алгъаныгъыз бла бирге сизге борчла салыннганларын да ангыларгъа керексиз»,- деп эсгертгенди ол.
Спикер законла чыгъарыучу органнга окъууда жетишимли, жамауат жашауда тири жаш адамла чакъырылгъанларын, аланы араларында уа билим бериу, чыгъармачылыкъ конкурслада, спорт эришиуледе хорлагъанла да болгъанларын айтханды. «Ол жетишимле уа сиз окъургъа, къадалып кюреширге, айныргъа хазыр болгъаныгъызны кёргюзтедиле. Мындан ары да жангы хорламла болдурлугъугъузгъа ишексизме»,- деп къошханды ол.
Спикер къууанчлы жыйылыу къыралда баш магъаналы байрамны аллында бардырылгъанын бошдан болмагъанын да чертгенди. «Россейни кюню бирликни, патриот сезимлени, Ата журтубуз ючюн ёхтемликни белгисиди. Ол туугъан жерибизни тарыхын, шёндюгю кезиуню бла келир жашауну байлайды. Бизни Ата журтубуз бирди, анга сюймекликни кёргюзтюр ючюн бет жарыкълы урунургъа, законланы толтурургъа, маданиятыбызны сакъларгъа, тарыхны билирге, ата-бабаларыбызны жигитликлерине баш урургъа керекбиз. Сиз Россейни инсаны деген сыйлы атха кертичи болуругъузну тежейме»,-дегенди ол.
Жашланы бла къызлары Мурат Карданов да алгъышлагъанды. Ол мындан ары окъургъа, билимлерин кенгертирге чакъыргъанды. «Жетишимлеригиз бла бизни энтта кёп кере къууандырлыгъыгъызгъа ийнанама. Жангы билим алыгъыз, халкъларыбызны адет-тёрелерине да юйренигиз»,- дегенди ол.
Ызы бла Татьяна Егорова бла Мурат Карданов паспортла бергендиле. Ол кюн спикерни къолундан баш документни алгъанланы арасында Нартанда школ-интернатдан жашла бла къызла, кадет классланы курсантлары да бар эдиле.
Жаш адамла бу къууанчлы жыйылыуну къурагъанлагъа ыразылыкъларын айтып сёлешгендиле. Майскийден 1-чи номерли гимназияны окъуучусу Константин Стрельченко,Терекни 2-чи номерли школуну окъуучусу Тамерлан Тхакахов бла Нальчикни 6-чы номерли школуну окъуучусу Дарина Кокова туугъан журтубузну айныуу ючюн къадалып окъургъа хазыр болгъанларын айтхандыла.
Нартанда школ-интернатны башчысыны орунбасары Элеонора Таова Парламентге эмда энчи Татьяна Борисовнагъа ёсюп келген тёлюге хар жылдан да быллай тюбешиуле къуралгъанлары ючюн ыразылыгъын айтып сёлешгенди.
Ахырында депутатла бла Россейни жаш инсанлары РФ-ни гимнине тынгылагъандыла. Татьяна Борисовна алагъа саугъагъа РФ-ни жангы Конституциясы бла китапчыкъла берилгенин чертгенди.
Бу кюн жаш адамланы эслеринде кёп жыллагъа къалыр ючюн а ала депутатла бла бирге суратха тюшгендиле.