КъМР-ни Башчысы Казбек Коков Бахсан шахар округда солуу паркны ачылыууна къатышханды. Ызы бла Россейни кюнюню намысына Совет Союзну Жигити Василий Левченкону бла Социалист Урунууну Жигити Ахъед Шаовну хурметлерине ишленнген эсгертмеле ачылгъанлары бла байламлы бардырылгъан ишлеге къошулгъанды.
- Бюгюн къыралыбызны бла бизни республикабызны хар адамы да ёхтемленирча затла бардыла. Фашизмден дунияны ма бизни ата-бабаларыбыз азатлагъандыла, урушдан сора да къыралны аягъы юсюне ма ала салгъандыла. Жигитликлери эмда жигер урунуулары бла бюгюн биз мамыр кёкню тюбюнде жашар, сабийлерибизге аламат келир заманны къурар ючюн къанларын бла жанларын аямагъан адамланы атлары бир заманда да унутулмасын!
Бу эсгертмелени ачыу - тёлюлени байламлыкъларыны белгисиди. Биз ёсюп келген тёлюге таматаланы жигитликлерини юслеринден билдирип турургъа борчлубуз. Ол тёре бизни республикада ёмюрлеге сакъланырыгъына ийнанама мен, - дегенди Казбек Коков. Ол дагъыда, бу проектни жашауда бардырыу бек магъаналы болгъанын чертип, быллай комплексни къураугъа къыйын салгъанланы барысына да жюрек ыразылыгъын билдиргенди.
Эсгертмелени ачылыуларына КъМР-ни Правительствосуну Председатели Мусукланы Алий, Къырал Думаны депутаты Анатолий Бифов, Бахсан шахар округну администрациясыны башчысы Хачим Мамхегов, жер-жерли самоуправленияны советини депутатлары, тюрлю-тюрлю организацияланы келечилери, жамауат да къатышхандыла. Ызы бла жангы паркда Бахсанны бла къоншу Элбрус районну командаларыны арасында футбол оюн бардырылгъанды. Шахарны маданиятыны келечилери уа концерт кёргюзтгендиле.
Эсгертиу халда. 2019 жылда Бахсанны администрациясы «Гитче шахарланы бла тарых жерлени тапландырыу» деген битеуроссей конкурсха къатышханды эмда 85 миллион сом къытханды. Ма андан сора башланнгандыла паркны къурау ишле. Алагъа уа шахарчыла да къошулгъандыла - сёз бла, иш бла да себеплик этгендиле.
Ахырында кёп заманны атылып тургъан жер тюрленнгенди. Анда минг терек салыннганды, жалгъан кёл къуралгъанды, жолчукъла ишленнгендиле, шинтикле орнатылгъандыла. Жаш тёлюге спорт эмда тренажёр майданчыкъла, сабийлеге уа ойнарча айрыкамчыкъла къуралгъандыла. Абаданыракъла уа шахмат бла шашка ойнап, эрикгенлерин кетерирге боллукъдула. Къоркъуусузлукъну къайгъысы да этилгенди - паркда видео бла къарарча цифралы система тартылгъанды.