Ишлеринде жетишимле болдургъанлагъа, бет жарыкълы уруннганлагъа Россейни кюнюнде Правительствону юйюнде къырал саугъала бериу тёреге айланнганды. Бу жолда да аллай къууанчлы жыйылыу болгъанды. Ол КъМР-ни Правительствосуну Колонналы залында бардырылгъанды.
Ары 80 адам жыйылгъанды – врачла, къутхарыучула, устазла, культурада, эл мюлкде ишлегенле, налог, казначейство органланы келечилери эм башхала. Къууанчлы жыйылыугъа КъМР-ни Башчысы Казбек Коков, Парламентни спикери Татьяна Егорова, премьер-министр Мусукланы Алий, федерал инспектор Тимур Макоев, республиканы оноучусуну Администрациясыны таматасы Мухамед Кодзоков, министрле къатышхандыла.
Саугъаланнганланы алгъышлай, Казбек Коков Россейни кюню ёмюрлени теренинден келген, ата-бабаларыбыз къаты сакълагъан, келир тёлюлеге осуят этген миллет бирликни, туугъан жерибизге сюймекликни, инсанлыкъ даражаны белгиси болгъанын чертгенди.
-Россейни айныуу, алгъа барыуу халкъны, хар инсанны да иш кёллюлюгюне кёре къуралады. Бюгюн а мында усталыкъларына, жашауларында сайлагъан жолларына кертичи болуп, кеслерини сфераларында бийик жетишимле болдургъанла жыйылгъандыла. Сизсиз иш кёллюлюгюгюз бла республиканы, къыралны саулайда алгъа элтген, - дегенди КъМР-ни Башчысы.
Ол кюн саугъаланнганланы арасында тамата тёлюню келечилери да бар эдиле - республиканы бирлигин, ышаннгылы айныуун жалчытханла. «Былтыр хауа болумла, эпидемиология да артыкъ иги болмагъанларына да къарамай, эл мюлкде уруннганла иги тирлик жыйып, къыралыбызны аш-азыкъ къоркъууусузлугъун жалчытыугъа уллу къошумчулукъ этгендиле. Алагъа жюрек ыразылыгъымы билдирирге сюеме»,-дегенди республиканы оноучусу.
Ол билим бериуде, спортда, культурада ишлегенле, дин къуллукъчула да махтаугъа тийишли болгъанларын айтып: «Сизни битеу жашауугъуз, сайлагъан усталыкъгъа сюймеклигигиз, республиканы келир кюню ючюн къайгъыргъаныгъыз кимге да юлгюдю»,-деп чертгенди.
Ызы бла саугъалау башланнганды. «КъМР-ни радио-телевидение бериулерини арасы» федерал къырал унитар предприятияны Нальчикде бёлюмюню башчысы Сафудин Жиляев бла авария-профилактика къауумуну инженери Кантемир Богатырев РФ-ни Президентини указы бла «Ата журтну аллында къыйыны ючюн» орденни 2-чи даражасы бла саугъаланнгандыла.
КъМР-ни Башчысыны Указы бла «Къабарты-Малкъар Республиканы аллында къыйыны ючюн» майдал бла саугъаланнганла да бардыла. Ол санда анга РФ-ни МЧС-ини Элбрусда бийик-тау къутхарыу отрядыны башчысы Гюлюйланы Абдуллах, КъМР-ни муфтийи Хазраталий Дзасежев, КъМР-ни Парламентини депутаты Владимир Кебеков, РФ-ни МВД-сыны къуллукъчуларыны билимлерин ёсдюрюу жаны бла университетни - РФ-ни МВД-сыны Краснодарда университетини бёлюмюню башчысы Заурби Шхагапсоев да тийишли болгъандыла.
Къабарты-Малкъар Республиканы Сыйлы грамотасы белгиленнгенлени арасында уа Черек районну жер-жерли администрациясыны башчысы Муртазланы Борис, Элбрус районну жер-жерли администрациясыны таматасыны орунбасары Атаккуланы Руслан, РФ-ни Федерал налог службасыны КъМР-де Управлениясыны контроль жаны бла бёлюмюню таматасы Юсюпланы Мусса, Къабарты-Малкъарны Баш сюдюню судьясы Заниколаны Лейля, Россейни ич ишле органларыны бла ич аскерлерини жер-жерли къаугъаларыны ветеранларыны ассоциациясыны КъМР-де бёлюмюню башчысы Князланы Сулемен эм башхала бардыла.
Белгили журналист «КБР - Медиа» къырал казна учрежденияны малкъар тилде бериулерини редакциясыны редактору Ахкёбекланы Асланнга «КъМР-ни сыйлы журналисти» деген ат берилгенди. Искусстволаны Шимал-Кавказ къырал институтуну халкъ инструментлени кафедрасыны доценти, заочно окъутуу жаны бла факультетни деканы Малкъарланы Мурат «КъМР-ни сыйлы артисти» деген атха тийишли болгъанды.
Къабарты-Малкъарны культурасыны сыйлы къуллукъчуларыны тизмеси да кенгергенди. Республиканы Башчысыны Указы бла бу ат Нальчикде искусстволаны 1-чи номерли сабий школуну башчысыны орунбасары Батчаланы Аминатха, Къашхатауну маданият юйюню баш методисти Къулбайланы Изабеллагъа берилгенди.
Бызынгыны Мечиланы Кязим атлы орта школуну директору Хапаланы Тахирге бла СКГИИ-ни культурология факультетини деканы Шауаланы Маринагъа «КъМР-ни билим бериуюню сыйлы къуллукъчусу» деген ат аталгъанды. «КъМР-ни эл мюлкюню сыйлы къуллукъчусу» деген ат берилгенлени арасында Ветеринария управленияны баш къырал ветеринар инспектору Герийланы Мухарбек да барды.
Халкъны социал жумушларын тамамлауда жууаплы ишни толтургъанла да белгиленнгендиле. РФ-ни Пенсия фондуну Элбрус районда бёлюмюню таматасы Афашокъаланы Фатиматха, Урунуу эм социал къоруулау министерствону урунуу халла жаны бла департаментини таматасы Хапаланы Лейлягъа, бу министерствону иш бла жалчытыу департаментини профессионал билим бериу эм профориентация бёлюмюню таматасы Чеченланы Жаннагъа «КъМР-ни халкъны социал къоруулаууну сыйлы къуллукъчусу» деген ат аталгъанды.
Сюд приставланы федерал службасыны КъМР-де Управлениясыны башчысы Бауаланы Ахмат бла Федерал казначействону КъМР-де Управлениясыны таматасыны орунбасары Улбашланы Абдуллах республиканы сыйлы экономистлерини къауумуна къошулгъандыла.
КъМР-де Урунууну къырал инспекциясыны башчысыны орунбасары - урунууну баш къырал инспекторуну экинчиси Тогъузаланы Тахирге уа «КъМР-ни сыйлы юристи» деген ат берилгенди.
Ол кюн «КъМР-ни халкъ суратчысы», «КъМР-ни искусствосуну сыйлы къуллукъчусу», «КъМР-ни сыйлы устазы», «КъМР-ни сыйлы къутхарыучусу», «КъМР-ни физкультурасыны эм спортуну сыйлы къуллукъчусу» эм башха махтаулу атлагъа тийишли кёрюлгенлени атлары белгили этилгендиле.
КъМР-ни Башчысыны Ыспас письмосуна да инсанланы уллу къаууму тийишли кёрюлгенди. Ол санда Черек районну халкъ билимни ишчилерини профсоюзуну башчысы Батчаланы Анатолийге, РФ-ни МЧС-ини Элбрус бийик-тау къутхарыучу отрядыны къутхарыучусу Газаланы Алибекге бла отрядны излеу-къутхарыу бёлюмюню таматасы Жаппуланы Адемейге, отрядны къутхарыучулары Сарбашланы Камалгъа бла Шауаланы Азаматха, Элбрусну жол управлениясыны ауур жюкле ташыгъан водители Геккиланы Шамилге эм башхалагъа.
Ахырында Казбек Коков жыйылгъанланы энтта бир кере алгъышлап, жангы жетишимле тежегенди. Къууанчлы жыйылыу а жангы тёре бла бошалгъанды: Малкъарланы Мурат къобузу бла Россейни гимнин сокъгъанды.
