«Дуней псом щыцIэрыIуэ дирижёр», «Макъамэбзэм и пащтыхь», «Иджырей ­зэманым и дирижёр щэджащэ», «Дирижёр Iуэ- хум и тхьэ» цIэ лъагэхэр зы­фIаща, дуней псом и ­макъамэ гъуазджэм зи цIэр щыпэрыт, зи щIыхьыр Урысей Федерацэм щы- н­эхъ лъагэхэм ящыщ ди лъэпкъэгъу Темыркъан Юрий Хьэту и къуэм и ныбжьыр илъэс 80 щрикъур УФ-м и мызакъуэу, дуней псом щагъэлъэпIащ. Санкт-Петербург дэт Академическэ филармонием и оркестрым и унафэщI икIи и дирижёр нэхъыщхьэ Темыркъаным а филармонием къыщыхузэрагъэпэща фестивалым къэрал куэдым я лIыкIуэхэр еп­лъыну, макъамэм и Iэ­фIымкIэ загъэнщIыну къэ­кIуат.
КъБР-м къыбгъэдэкIыу ди лъэпкъэгъу ахъырзэма­-    ным и махуэм хэтащ УФ-м ШынагъуэншагъэмкIэ и ­Советым и Секретарым и ­къуэдзэ КIуэкIуэ Юрий, ­КъБР-м и Iэтащхьэм и къа­лэн­хэр пIалъэкIэ зыгъэ­защIэ КIуэкIуэ Казбек, ЦIыхухэм я хуитыныгъэ­хэмкIэ уполномоченнэу КъБР-м щыIэ Зумакулов Борис, Дунейпсо Адыгэ Хасэм и тхьэмадэ Сэхъурокъуэ Хьэутий сы­мэ.

Темыркъан Юрий и щIы­хьыр щаIэта пшыхьыр къазэ­ры­щыхъуамкIэ къыд­дэ­гуэ­шащ Сэхъурокъуэ Хьэу­­тий:
- Темыркъан Юрий ма­къамэ гъуазджэм и закъуэкъым щыпащтыхьыр, ар ­цIы­хугъэ лъагэм и щапхъэщ, цIыху Iэдэбщ, хьэл ­дахэ куэд зиIэ адыгэлIщ. А псом я щхьэжщ цIыху къы­зэ­ры­гуэкIыу, зэпIэзэрыту къы­зэ­рызэтенар. Илъэс ­14-м иту ар республикэм зэрикIам куэд щыгъуазэщ, ауэ абы Iурылъ адыгэбзэм и ­къабзагъымрэ и дахагъымрэ зыщIэр мащIэ ды­дэщ. Абы музыкэми ду­нейми езым и еплъыкIэ, бгъэ­дыхьэкIэ щхьэхуэ щи­Iэжщ.
«Темыркъаным музыкэм къыщигъэсэбэп Iэмал ­щхьэ­хуэм мэгъу къару хэлъ хуэдэ узэщIеубыдэри ма­къамэм и дуней телъыджэм ухешэ», - ди къэралым и Президент Путин Влади- мир а пшыхьым щыжиIа мы псалъэхэм гушхуэныгъэ ин къыпхалъхьэ.
Фестивалым зыкърагъэхьэлIат дунейм и къэрал  куэдым я лIыкIуэхэм. Музыкант нэхъыфIу щыIэр щы­зэхуашэсат абы.
Къыхэгъэщыпхъэщ фес­ти­валым къыщыIуну ма­къамэхэмрэ ар къызэрагъэ­Iуну щIыкIэмрэ щIидзэху ­зыми кърамыгъащIэу щэхуу зэраIыгъар. УФ-м и Федеральнэ Зэхуэсым и уна­- фэщI Матвиенкэ Валенти- нэ къыщыпсалъэм жиIащ: «Темыркъаныр адрей дирижёрхэм хуэдэу баш ­цIы­кIукIэкъым зэрылажьэр, ар и оркестрым IэпхъуамбэкIэ йопсэлъэф, апхуэдизкIэ псэкIэ зэрощIэри».
Мы зэIущIэм илъэскIэ зы­хуагъэхьэзыращ. Абы дунейм музыкант нэхъыфIу ­тетыр хэтти, макъамэм и Iу­тIыжт а махуэр.
Iуэхум и етIуанэ Iыхьэр Юсуповым и уардэунэм щекIуэкIащ. ЖьантIэм дагъэтIысхьа Темыркъаным бгъэдэсащ къэралым и ­уна­фэщIхэр. Абы къыбгъу­рытт КъБР-м икIа лIыкIуэхэм ди тIысыпIэри. Темыркъа­ным и бгъум Путин Вла­димир щысти, «Къызэхъуэхъуну къэкIуа си лъэпкъэгъу­хэр», - жиIэу дыщригъэ­цIыхум сэлам гуапэ къы­­дихри, къыдэхъуэхъуащ. Матвиенкэ Валентинэ, УФ-м щэнхабзэмкIэ и министр ­Мединский Владимир,  нэ­гъуэщI куэди къыд­бгъэды­хьэурэ ди лъэп­къэгъу ахъыр­зэманым теухуауэ пса­лъэ дахэхэр къыджаIащ.
«Темыркъан Юрий хуэдэ куэд фи лъэпкъым къыхэ­кIыну сынывохъуэхъу, ауэ къы­хэзгъэщынут ар адыгэм и мызакъуэу, къэралым цIыхуу исым, макъамэ ­гъуазджэр фIыуэ зылъагъу ­псоми яйуэ къызэралъы­тэр», - къыджиIащ Матвиенкэ Валентинэ ди гупым закъыхуигъазэри.
А пшыхьым щызэхэсха,  Юрий и гъащIэм хэсщIыкI псори зэхэслъхьэжу жысIэну сыхуейт ар адыгэ лъэпкъым насып ину къыдитауэ къы­зэ­рыслъытэр.