Республикэм и хабзэгъэув IэнатIэм иджыблагъэ щекIуэкIа зэIущIэм щIалэгъуалэр кърагъэблэгъащ. Абы хэтащ КъБР-м и Парламентым РеспубликэмкIэ и Советым и япэ, етIуанэ зэхуэсы­гъуэхэм и унафэщIым и къуэдзэу, ­КъБР-м и Парламентым и ещанэ зэ­хуэсыгъуэм и УнафэщIым и къуэдзэу щы­та Федченкэ Людмилэрэ КъБР-м и Парламентым РеспубликэмкIэ и Советым и етIуанэ зэхуэсыгъуэм и депута- ту, еплIанэ зэхуэсыгъуэм и УнафэщIу щыта Чеченов Ануаррэ.

ЗэIущIэр къыщызэIуихым, КъБР-м и Парламентым ЕгъэджэныгъэмкIэ, щIэ­ныгъэмрэ щIалэгъуалэ политикэмкIэ и комитетым и унафэщI Азычэ Светланэ жиIащ республикэм и хабзэубзыху орган нэхъыщхьэм щIалэ­гъуалэр щIэх-щIэ­хыурэ къызэрырагъэблагъэр. Апхуэдэ­ ­зэ­Iу­щIэхэм щIэблэр Парламентым и ­лэ­­жьыгъэм щыхагъэ­гъуазэ, Къэбэрдей-Балъкъэрым ис лъэпкъ­хэм я тхы-дэм, лъэпкъ политикэм щытопсэлъыхь, къищынэмыщIауэ, жылагъуэ Iуэхухэм ­де­гъэхьэхынымкIэ сэбэп пылъщ.
- Мы гъэм догъэлъапIэ Урысей Феде­рацэм и Конституцэр къызэращтэрэ илъэс 25-рэ зэрырикъур. Илъэс 25-кIэ узэIэбэкIыжмэ, 1993 гъэм дыгъэгъазэм        и 12-м, Къэбэрдей-Балъкъэрым щекIуэ­кIауэ щытащ республикэм и хабзэубзыху органыщIэм - КъБР-м и Парламентым - и япэ хэхыныгъэхэри. Ди нобэрей зэIущIэр а IуэхугъуитIым етпхащ, - жиIащ Iэзычэм.
КъБР-м и Парламентым зэрызиужьамрэ мы зэманым иригъэкIуэкI лэжьы-гъэм­рэ  щIалэгъуалэр  хагъэгъуэза нэужь, абы­­хэм я упщIэхэр хьэщIэхэм ­иратыну Iэмал яIащ.
ЗэIущIэм кърихьэлIат КъБКъУ-мрэ Къэбэрдей-Балъкъэр къэрал мэкъумэш университетымрэ я студентхэмрэ Налшык къалэм и курыт еджапIэ №5-мрэ ­Бахъсэн къалэм и курыт школ №3-мрэ щеджэхэмрэ. Ахэр щIэупщIащ респуб­ликэр мы зэманым зыпэщIэт гугъуехь­- хэр зыхуэдэм, депутат хъун щхьэкIэ щIапхъэхэм, нэгъуэщIхэми.    
Федченкэ Людмилэ щIалэгъуалэм яжриIащ гугъуехьхэр сыт щыгъуи куэд зэрыхъур, ауэ УФ-м и Президентым къэрал унафэщIхэм къалэн нэхъыщ-      хьэу яхуигъэувыр - цIыхухэм я псэукIэр нэхъыфI щIыныр - зэрынэхъапэр.
- КъБР-м и Парламентым и япэ зэхуэ­сыгъуэм къыщыщIэдзауэ дытопсэлъыхь республикэм дотацэ ахъшэ къэралым къыIимыхыу, езым къилэжьыжымкIэ ирикъу щIыналъэхэм щыщ тщIыным. Ауэ ар пхузэфIэкIыныр куэдым елъытащ: псом япэу промышленностым, мэкъу­мэш IэнатIэм, адрейхэми зегъэужьын ­хуейщ. Къэбгъэлъагъуэмэ, щIыналъэхэм яIэщ я социально-экономикэ зыужьыныгъэм теухуа программэхэр, абыхэм къы­щыгъэлъэгъуахэр зрагъэхъулIэным елэ­жьу, - жиIащ Федченкэ.
Анэдэлъхубзэхэр зэрырагъэдж щIы­кIэм зэрытегузэвыхьыр къыхагъэщу, щIа­лэгъуалэм депутатхэм зыхуагъэзащ хабзэ и лъэныкъуэкIэ къащта зэхъуэк­Iы­ныгъэхэм къахутепсэлъыхьыну. Фед­ченкэ Людмилэ жиIащ абы КъБР-м и Жылагъуэ палатэм мызэ-мытIэу зэры­щытепсэлъыхьар икIи я анэдэлъхубзэр яджынымкIэ зыри зэран хъун зэры­хуэ­мейр къызэрагъэлъэгъуар. «Бзэр щы­Iэмэ, лъэпкъри щыIэщ. А тIур зэгуэхыпIэ имыIэу зэпыщIащ. Псом хуэмыдэу а Iуэхум Урысейм сыт щыгъуи гулъытэш-хуэ щиIэн хуейщ, лъэпкъ зэмылIэужьы­гъуэ куэд къэралым зэрисым къыхэ­-        кIыу. Сэ си фIэщ хъуркъым я быным я анэдэлъхубзэр ирагъэджыну хуэмейуэ адэ-анэхэм къахэкIыну. Аращи, мыбы теухуауэ гугъуехь щыIэпхъэкъым», - жиIащ Федченкэ.
Чеченов Ануари дыщIигъуащ зи анэ­дэлъхубзэр зыджыжыну хуейм зыри зэ­рыпэрымыуэнур икIи цIыхухэм езыхэм зэ­релъытар абы и щытыкIэр.
Нэхъыжьхэм щIалэгъуалэм чэнджэщ иратащ жылагъуэ лэжьыгъэхэм жыджэ-ру хэтыну, политикэм дихьэххэм я Iуэху еплъыкIэр нэхъ тегушхуауэ къагъэлъэ­гъуэфу загъэсэну.