20 июньдан башлап Россейни вузларында документлени алыу башланырыкъды. Къабарты-Малкъарны къырал университети да ары окъургъа кирирге сюйгенлени ашыгъып сакълайды. Аланы эмда ата-аналарын вузну жорукълары бла шагъырейленир мурат бла уа тюбешиу къурагъанды.
Аны ача, химия эм биология институтну таматасы Арсен Хараев КъМКъУ Россейни эм тамата вузларындан бири болгъанын, аны ахшы тёрелери сакъланнганларын, уллу жетишимлеге келтирген профессорлары бла преподавательлери уа бек игиледен бирлерине саналгъанларын чертип айтханды.
Бийик окъуу юйге хазырлау эм усталыкъ сайлау управленияны башчысы Аксана Карашаева 2021 окъургъа кириу бла байламлы чыкъгъан жангылыкъла бла шагъырейлендиргенди. Биринчиден, энди бюджетге къошакъ халда кириу жорукъ ишлемейди. 29 июньда къагъытланы алыу тохтатыллыкъды. 6 августда льготникле, къыяулу адамла, целевой амал бла киргенле конкурсха кёре кирликдиле.
17 августда бюджет халда киргенлени сайлау боллукъду. Быйыл, башха жылладача болмай, аллай абитуриентлеге экинчи онг бериллик тюйюлдю. Экинчиден, энди бир-бир бёлюмлеге кирир ючюн ЕГЭ берилген предметлени сайларгъа эркинлик барды. Ючюнчюден а, конкурс къагъытлада окъуучуну тукъуму бла аты жазыллыкъ тюйюлдюле. Аны орунуна СНИЛС-ни неда абитуриентни вуз берген энчи номерлери жазыллыкъдыла.
Документлени алыу бла кюрешген бёлюмню таматасы Тимур Табишев а шёндю къагъытланы дистанциялы амал бла «Онлайн халда вузгъа кириу» суперсервисни, къырал жумушланы порталыны неда почтаны болушлукълары бла жиберирге боллугъун, аттестатны бермезге да жарагъанын билдиргенди.
Ол дагъыда вузгъа целевой амал бла кириуню юсюнден толуракъ айтханды. Аллай абитуриент бюджет окъуу жерлеге дау этмезге боллукъду. Сора дагъыда окъууну бошагъандан сора аны жиберген организацияда бек азындан юч жыл ишлерге керекди.
Сакъатланы бла ёксюзсюзлени юслеринден айтханда, ала энчи квотагъа кёре алынадыла. Ала уа бюджет жерлени он процентин тутадыла. Чекленнген онглары болгъанла университетни кесинде экзамен бераллыкъдыла.
Сора алагъа неда ЕГЭ-ни, неда экзаменни эсеплерин сайларгъа эркинлик бериледи. Абитуриент квота бла киралмагъан эсе, баш конкурсха алайлай алыныргъа боллукъду. Университетни кесинде экзаменле жаланда сакъатлагъа, колледжни бошагъанлагъа эм бийик билимлери болгъанлагъа къураладыла.
Университетде битеу направлениялагъа къагъытланы берирча тёрт колледж барды. Анда аттестатланы конкурсу барады. ЕГЭ-ни балларын кётюрюрге майдал, айырма аттестат, волонтёрну китабы, ГТО-ну белгиси, битеуроссей олимпиадада биринчи жерни алгъаны болушурукъду. Аллай онгланы тизмесине, экзаменлени расписанияларына, башха билдириулеге да КъМКъУ-ну сайтында къараргъа боллукъду.
Додуланы Мадина.
