Мэкъуауэгъуэм и 2-м щегъэжьауэ и 9-м нэс Геленджик къалэм щекIуэкIащ Аэродизайнерхэм я IX дунейпсо фестиваль.
«Аэродизайнер» цIэр зэрихьэу IэщIагъэщIэ зэры­щыIэр зэрызэхэтхрэ куэд щIакъым. Псалъэм и мыхьэнэм къызэрыджиIэщи, апхуэдэу зэджэр шэрыбхэр ягъэпщурэ гуфIэгъуэ зэхуэсхэр зыгъэщIэращIэ цIыху IэкIуэлъакIуэхэрщ. Ди хъуреягъкIэ зытплъыхьми, шэрыб щамыIэту махуэшхуэ щIагъуэ зэремыкIуэкIыжым гу лъыдотэ.
Дэтхэнэ IэщIагъэми хуэ­дэу, шэрыбгъэпщхэми Iуэ­хум нэхъ хуэIэзэ яхэтщ, я зэфIэкIым зэрызрагъэу­жьы­ным еш ямыIэу елIалIэу.
Иджыблагъэ Геленджик къалэм щекIуэкIа, Аэродизайнерхэм я дунейпсо фестивалым хэтащ Къэбэрдей-Балъкъэрым щыщ Урыс (Тэнащ) Каринэ. Экономист IэщIагъэ иIэу КъБКъУ-р къэзыуха хъыджэбзым и пщIыхьэпIи къыхэхуакъым зэгуэр шэрыбхэм я дуней ­нэгузыужьым къыщыхутэну. Сабийхэм якIэлъыплъыху Iуэхуншэу щымысын папщIэ, IэщIагъэщIэм зезыгъэса Каринэ иджы дуней­псо зэхьэзэхуэм зэрекIуэлIэфар езыми егъэщIэгъуэж.
- Мыр сэ сызыхэтыну къысхуихуа етIуанэ фестивалщ аэродизайным и IуэхукIэ. Псори къызэзыгъэпэщар Краснодар щыIэ, шэрыб къыщIэзыгъэкI икIи зыщэ Француз Николай и унафэм щIэт «Праздник Мастер» IуэхущIапIэрщ. Си насып ­кърихьэкIри, нэхъ Iэзэу аэродизайн IэщIагъэм къыщалъытэ Шевченкэ ­Анатолий и «Шарлятэ» гупым мы гъэм сыхэхуащ.
«Тхыдэм и дыщэ напэкIуэцIхэр» - арат, Каринэ зэрыжиIэмкIэ, мыгъэрей фестивалым фIащар. Тхьэмахуэ псокIэ екIуэкIа зэ­хьэзэхуэм шэрыб гъэпщам къыхамыщIыкIа укIуэдыж жыуагъэIэу, гуп 15 щызэпе­уащ. Каринэ зыхэтам етIуанэ увыпIэр къыхуа­гъэфэщащ. Абыхэм шэрыб гъэпщам къыхащIыкIат Пётр Езанэм­рэ Екатеринэ Езанэмрэ япкъхэр.
- Диплом къыщыватыжа­кIэ, Налшык щыщ аэродизайнерхэр щебгъэджэн еджа­пIэ къыпхузэгъэпэщыну жыпIэркъэ? - деупщIащ Урыс Каринэ.
- Ар жэуаплыныгъэшхуэ зыпыщIа Iуэхущ. Нэгъэсыпауэ хэсщIыкIыу сыхъумэ, пщIэну щыткъым, - къытхупыгуфIыкIащ хъыджэбзыр.
ЦIыху бгъэгуфIэным нэхъ IэщIагъэфI щыIэ? Аращ зыхущIэкъур Каринэ.