|
Псоми ди зэхуэдэ къалэн
10 июня, 2021 - 06:53
Перинатальнэ центрым щекIуэкIащ сабийхэр шынагъуэншэу автомашинэкIэ къешэкIыным теухуа «Детство без опасности» федеральнэ проектыр Къэбэрдей-Балъкъэр Республикэм зэрыщрагъажьэм теухуа пресс-конференц.
ЗэIущIэм хэтащ Къэбэрдей-Балъкъэр Республикэм Къэрал кIуэцI IуэхухэмкIэ министру щыIэ Павлов Василий, КъБР-м узыншагъэр хъумэнымкIэ и министр Къалэбатэ Рустам, «Перинатальный центр» ГБУЗ-м и дохутыр нэхъыщхьэ Гаевэ Алёнэ, КъБР-м щыIэ МВД-м и ГИБДД-м и Управленэм и унафэщI Яльмеев Роберт, «КъБР-м и ЦIыхубзхэм я союз» щIыналъэ жылагъуэ зэгухьэныгъэм и унафэщI Къаскъул Аулият, «Детство без опасности» проектым и унафэщI Ляпистовэ Кристинэ.
«Детство без опасности» программэр тещIыхьащ 2019 - 2021 гъэхэм. Нэгъабэ а проектым къыхыхьащ къалэ 35-рэ. Абыхэм щрагъэкIуэкIащ Iуэху 4 489-рэ, адэ-анэ хъуа, хъуну зызыгъэхьэзыр цIыху мини 10-м. 2021 гъэм и кIэм хэту къызэщIиубыдэнущ Урысей Федерацэм и щIыналъэ 85-м я перинатальнэ центррэ лъхуапIэ унэу 100.
Къэбэрдей-Балъкъэрым проектыр Iыхьищу щыпхагъэкI: япэр - Iуэхур егъэжьэнымрэ жылагъуэм гу лъегъэтэнымрэщ абы пыщIауэ щыIэ гугъуехьхэм; етIуанэр - медицинэ лэжьакIуэхэр хуегъэджэнращ анэхэм зэрадэлэжьэнум; адэкIэ - ягъэхьэзыра лэжьакIуэхэм цIыхубз уэндэгъухэмрэ лъхуахэмрэ ящIапхъэм хурагъаджэ тхьэмахуэ зэхуакум зыбжанэрэ. Абы папщIэ Перинатальнэ центрым къыхуашауэ иIэщ зыхуеину псори.
Павлов Василий къыщыпсалъэм къыхигъэщащ гъуэгу-транспорт фэбжьым сабийр щыхъумэным теухуа лэжьыгъэм мыхьэнэшхуэ зэриIэр.
-«Детство без опасности» федеральнэ проектыр ехъулIэныгъэ пылъу къэралым зэрыщагъэзэщIэфым куэдкIэ елъытауэ щытынущ щIэблэм я къэкIуэнур», - жиIащ министрым.
Илъэсыр къызэрихьэрэ Къэбэрдей-Балъкъэрым щыIа гъуэгутранспорт къэхъукъащIэхэм лей къащытехьащ, ныбжьыщIэ 26-м. Абыхэм я процент 70-р автомашинэм ипхатэкъым, балигъхэм я гъусэу ису арат.
- ЦIыкIухэр гъуэгу-транспорт фэбжьым щыхъумэныр Къэрал автоинспекцэм и лэжьыгъэм увыпIэшхуэ щызыубыдщ. Абы зэкъуэту пэрытщ ар зи къалэным хыхьэ IуэхущIапIэ псори,- жиIащ КъБР-м щыIэ МВД-м и ГИБДД-м и Управленэм и унафэщI Яльмеев Роберт.
Къэбэрдей-Балъкъэр Республикэм узыншагъэр хъумэнымкIэ и министр Къалэбатэ Рустам къыхигъэщащ республикэм и Перинатальнэ центрыр иджырей техникэкIэ къызэрызэгъэпэщар, анэхэри сабийхэри зыхуей хуагъэзэфын хуэдэу.
Абы и Iуэху еплъыкIэр диIыгъащ «Перинатальнэ центр» ГБУЗ-м и дохутыр нэхъыщхьэ Гаевэ Алёнэ икIи гу лъаригъэтащ сабийхэр машинэм зэрырапхэ Iэмэпсымэхэр къагъэсэбэпыным анэхэр егъэсэным мыхьэнэшхуэ зэриIэр. «Балигъхэм я къалэнщ ныбжьыщIэхэм я нэIэ трагъэтыну, абыхэм щапхъэ яхуэхъун хуэдэу автомашинэр Iэдэбу зэрахуэну, хабзэм къигъэувхэр ягъэзэщIэну. Апхуэдэ щIыкIэкIэщ къэхъукъащIэ шынагъуэхэр зэрыпхуэгъэмэщIэнур. Сабийр лIэныр сыт щыгъуи гуауэшхуэщ. Балигъхэм я емыгугъуныгъэкIэ ар дунейм щехыжкIэ, гуауэ тIуащIэщ, - жиIащ абы. - Дэ псом япэ дыIуощIэ гъащIэщIэм. Абы къыхэкIыу мыхьэнэшхуэ иIэщ сабийхэр къызэрешэкIыпхъэ хабзэр анэхэм ди деж къыщащIэным. ЛъхуапIэм зэрыщIатхыкIыжу къапэщылъщ абыхэм я япэ гъуэгур. Мыхьэнэшхуэ иIэщ ар шынагъуэншэу зэфIэкIыным. Насыпыншагъэр къэмыгъэхъуныр нэхъ тыншщ, абы кърикIуахэр бгъэзэ-кIуэжын нэхърэ, - дыщIигъужащ дохутыр нэхъыщхьэм.
«Детство без опасности» проектым и мыхьэнэм, мурадхэмрэ къалэнхэмрэ тепсэлъыхьащ Ляпистовэ Кристинэ.
- Мы проектыр пхыгъэкIыныр ауэ сытми перинатальнэ центрхэмрэ лъхуапIэ унэхэмрэ щыдублакъым. А IуэхущIапIэхэм Iэмал къуат нэхъыбэ къызэщIебгъэубыдэну, адэ-анэм я сабийхэм я шынагъуэншагъэм теухуауэ уепсэлъэну. Ди жагъуэ зэрыхъущи, Iуэхум фIыуэ зэрыщымыгъуазэм, языныкъуэхэм къазэрыфIэмыIуэхум, сабийхэр зыIыгъ Iэмэпсымэхэр къызэрамыгъэсэбэпым кърокIуэ гъуэгу-транспорт къэхъукъащIэ шынагъуэхэм я бжыгъэм хэхъуэныр. Уи щхьэм къылъэIэсыхукIэ ар бжыгъэ къудейуэ къыщIэкIынущ зэрызыхэпщIэр. Апхуэдэ гуауэр зыгъэвахэм я щхьэр фIаудыж я сабийм и шынагъуэншагъэр къазэрыфIэмыIуэхуам къыхэкIыу. Псоми ди зэхуэдэ къалэнщ гъуэгухэм щыхэкIуадэр, фэбжь хэзыххэр дгъэмэщIэныр. Зи гугъу сщIыр сабий шэнтжьейхэр къагъэсэбэпынырщ, Iэмал имыIэу тетынырщ зэрызекIуапхъэ псынщIагъэм, рулым дэсыр сакъынырщ,- жиIащ проектым и УнафэщIым.
|
20.04.2024 - 12:25 Къэрал куэдым мэлыжьыхьым и 19-р «Ажэгъуэмэм и махуэу» щагъэлъапIэ. Абы гулъытэ хэIэтыкIа хуэщIыпхъэу къалъытэу, япэ дыдэу, I984 гъэм, Iуэхур къыщрахьэжьар Инджылыз къэралыгъуэрщ. |
|
20.04.2024 - 09:03 Къэбэрдей-Балъкъэр Республикэм мы гъэм еханэу щекIуэкIынущ «ТекIуэныгъэм и диктанткIэ» зэджэ, гъэсэныгъэ мыхьэнэшхуэ зиIэ Iуэхугъуэ щхьэпэр. |
|
19.04.2024 - 09:01 Тамбукъан гуэл шыугъэм илъэс 700 тхыдэ къызэринэкIащ. Абы ит псыр ижыркъым, мыл ткIужхэмрэ уэшххэмкIэ ирикъуу аращ. Абыхэм къадэкIуэу ябрууауэ щыта жапIэхэмкIэ абы хохъуэ минеральнэ псы. |
|
19.04.2024 - 09:01 2024 гъэм и япэ мазищым къызэрагъэлъагъуамкIэ, хьэщIэщым къыщыувыIэну махуэу зыщрагъэтхамрэ абы щыщIэтIысхьа махуэмрэ я зэхуакум дэлъ пIалъэм и кIыхьагъымкIэ Къэбэрдей-Балъкъэрым къэралым и щIыналъ |
|
18.04.2024 - 12:25 2024 гъэм и япэ мазищым къриубыдэу Къэбэрдей-Балъкъэрым зыщызыплъыхьыну къэкIуа туристхэм я бжыгъэр мин 398-рэ хъуащ икIи ар процент 24,8-кIэ нэхъыбэщ къапщытэж лъэхъэнэм ирихьэлIэу нэгъабэ щыIа бж |
|