КъБР-м и Iэтащхьэ КIуэкIуэ Казбек иригъэкIуэкIащ Петербург щызэхэта дунейпсо экономикэ зэхуэсышхуэм кърикIуахэм щытепсэлъыхьыжа зэIущIэ.
Республикэм и Iэтащхьэм къихьащ Урысейм и щIыналъэхэм щыIэ инвестицэ щытыкIэм теухуауэ, Лъэпкъ инвестицэ рейтингыр зыхуэдэр и тегъэщIапIэу, Стратегие жэрдэмхэмкIэ агентствэм зэхуэсышхуэм хэIущIыIу щищIа бжыгъэхэр. Къэбэрдей-Балъкъэр Республикэр яхэхуащ инвестицэ щытыкIэр щефIэкIуа щIыналъэ 40-м. Ар илъэс кIуам нэхърэ пункт 17-кIэ къыдэкIуэтеящ, балл 250,2-рэ къихьри. Къэпщытэныгъэхэм япкъ иткIэ, къэралым и щIыналъэ 85-ри увыпIэ 29-м трагуэшащ. Республикэм 16-нэ увыпIэр къихьащ, и Iуэхухэр иригъэфIакIуэри.
ЗэIущIэм хэтащ КъБР-м и Правительствэм и УнафэщI Мусуков Алий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м и Правительствэм и УнафэщIым и япэ къуэдзэхэу Къуныжь МуIэедрэ Говоров Сергейрэ, КъБР-м и Правительствэм и УнафэщIым и къуэдзэ Хъубий Марат, КъБР-м экономикэ зыужьыныгъэмкIэ и министр Рахаев Борис.
КIуэкIуэ Казбек жиIащ рейтингыр щIызэхалъхьар инвестицэ щытыкIэр щIыпIэхэм щегъэфIэкIуэным теухуауэ гъэзэщIакIуэ властым и органхэм зэфIагъэкIхэр къапщытэн папщIэу зэрыщытыр. УнафэщIым къыхигъэщхьэхукIащ республикэм и экономикэм дежкIэ мыхьэнэ хэха зиIэ туризм, мэкъумэш хозяйствэ, псэупIэ ухуэн IэнатIэхэм гулъытэ хэха яхуэщIын хуейуэ абы къызэригъэувыр.
2021 гъэм и лъэпкъ рейтингыр щыты-кIэ 42-рэ унэтIыныгъиплIымрэ я лъабжьэу зэхалъхьащ: «ЩытыкIэр зэрырагъэфIэкIуэж щIыкIэр», «Хьэрычэт IэнатIэм епха институтхэр», «Инфраструктурэмрэ ресурсхэмрэ», «Хьэрычэт IэнатIэ мыиныр дэIыгъыныр». Мыбдежым къыхалъытащ хьэрычэтыщIэхэмрэ экспертхэмрэ зэрахэупщIыхьам кърикIуахэр, апхуэдэу статистикэм къит бжыгъэхэр. Iуэхур ефIэкIуэным сэбэп хуэхъуащ, къапщтэмэ, гъуэгухэм я фIагъыр, лэжьы-гъэр зэтеухуэным нэхъ IэкIуэлъакIуэ зэрыхуэхъуар, хьэрычэт IэнатIэм къэралыр мылъкукIи нэгъуэщIхэмкIи зэрыдэIэпыкъуар.
ЗэIущIэм щызэпкърахащ ирагъэкIуэ-кIа зэпсэлъэныгъэхэм къарикIуахэр, инвесторхэм ядэлэжьэнымкIэ щыIэ Iэмалхэр, апхуэдэуи щIыналъэхэр зэпыщIауэ щытынымкIэ хэкIыпIэхэр. Iэтащхьэм республикэм и Правительствэм хуигъэуващ щIыналъэм и инвестицэ щытыкIэр адэкIи егъэфIэкIуэным жыджэру яужь итыну. Къапэщытщ ухуэныгъэ ирагъэкIуэкIыну хуит зэращI къэрал дэфтэрхэр тэмэму икIи нэхъ псынщIэу къыIахыным, мылъкур тхыным, электросетхэм, нэгъуэщI коммуникацэхэм пыдзэным ехьэлIа Iуэхухэр зэкIэлъыгъэкIуэным теухуа къэрал Iуэхутхьэбзэхэр зэфIагъэкIыну.
«ЩIыналъэм и хьэрычэтыщIэхэм адэкIи зэIухауэ епсэлъэн хуейщ хьэрычэт IэнатIэ мыинымрэ курытымрэ зегъэужьынымкIэ щыIэ хэкIыпIэхэм, экономикэм инвестицэхэр къыхегъэлъхьэным теухуа IуэхухэмкIэ», - къыхигъэщащ КIуэкIуэ Казбек.