Социал страхование фондну Къабарты-Малкъар регион бёлюмюнде тюнене къууанчлы иш болгъанды: тюрлю-тюрлю жыллада ишлеп, производствода кеслерин ачытып, къыяулу болгъан инсанлагъа «Лада-Гранта» жангы автомобильле берилгендиле. Бу жол ала республиканы Зольск, Май, Лескен районларында жашагъан ючеуленнге жетгендиле. Женгил машиналадан ачхычланы эмда тийишли документлени иелерине регион Фондну башчысыны болушлукъчусу Азамат Кештов бергенди.
-Къырал сизни жашауугъузну не къадар женгиллетир эмда ырахат этер ючюн къолдан келгенни аямайды. Ма шёндю болгъан иш анга шагъатды. Бюгюн ючеулен автомобиль къоллу болгъан эсе, бир кесекден дагъыда бир ненча адамгъа аллай онг берилликди. Быллай иш дайым да бардырылып турлукъду,-дегенди Азамат Кештов.
Ол дагъыда машинала иелерине тийишлиликде санларында не къыяулары болгъанлары да эсге алынып ишленнгенлерин чертгенди. Къыралны аллай тюрлю себеплигини хайырындан инсанланы иги кесеги жашауларын башхалача бардырадыла, бир-бирлери уа уруннган окъуна этедиле, дегенди.
Аллай энчи автомобильлеге кимле тийишли болгъанларын медико-социал экспертиза тохташдырады. Ала адамны не жаны бла да саулугъун тынгылы сюзедиле, анга машина керек болгъанын бла къалгъанын тохташдырадыла.
Автотранспорт жети жылгъа деп бериледи. Андан сора да, регион бёлюм ол жылланы ичинде машинагъа ууакъ ремонт этилсе, жау-отлукъ бла хайырланса да, алагъа къоратхан ахчаны бир кесегин тёлейди. Дагъыда бир кере капитал ремонтха тийишли болса, автомобильни ахыр багъасыны отуз процентин къайтарады.
Жети жыл озгъандан сора уа иеси жангы автомобиль алыргъа заявление жазаргъа эркинди. Производствода ачыгъан адам транспортну кеси аллына сатып алды эсе уа, Социал страхование фонд ол къоратхан ахчаны къайтарады, алай ол автомобильни артдагъы багъасындан кёп болмазгъа керекди.
-Бу мени ючюнчю машинамды,- дегенди Аргудандан Атабий Бозиев. - 1973 жылда Нальчикде улоу биригиуде ишлегенме, автобусну жюрютгенме. Авариягъа тюшюп, аягъымы ачытхан эдим, аны 2019 жылда кесип кетергендиле. Сёзсюз, манга машина бек керекди. Жюрютген да кесим этерикме. Ачхычларын алгъандан сора Атабий Бозиев кеси, руль артына олтуруп, жолгъа тебирегенди.
Мария Соколова уа Май районданды. Ол да производствода ачыгъанды. Аны эсгерирге сюймегенди. Машинаны ючюнчю кере алады. Ол айтханнга кёре, кеси жюрютеди. Май районнга да кеси сюрлюкдю автомобильни.