Къабарты-Малкъарны Жамауат палатасыны законлукъну тутуу, адамланы эркинликлери, улутхачылыкъгъа къажау эм ОНК бла байламлыкъла жюрютюу жаны бла комиссиясы «Къабарты-Малкъарда къолайлары аз юйюрлеге, кеслери жашагъан файдалары аз адамлагъа болушлукъ этиуню юсюнден» 53-чю республикалы законну толтуруу къалай баргъанын сюзгендиле.
Жыйылыугъа гражданланы энчи къауумларына социал тёлеуле этиу жаны бла бёлюмню башчысы Динара Хутова да къатышханды. Ол законну тамамлауда къаллай мадарла этилгенлерин билдиргенди. Аны айтханына кёре, социал болушлукъну алыргъа къолайлары аз юйюрле эм аз кеслери аллына жашагъан, алай файдалары жашау этерге керекли ахчаны эм ёлчемине жетмегенле эркиндиле.
Алагъа болушлукъ социал пособие халда неда социал котрактха кёре этиледи. Аны ёлчеми 3 мингден аз эм 15 мингден кёп болмазгъа тийишлиди. Бюгюнлюкде пособияны 711 юйюр аладыла, алагъа тёленнген ахчаны ёлчеми 21432,8 мингнге жетеди. Жылны аллындан башлап социал контрактла 186 юйюр бла тауусулгъандыла, дегенди ол.
Тинтиулени эсеплерине кёре, палатаны членлери власть органлагъа эсгертиуле хазырлагъандыла. Алада къолайлары аз юйюрле социал пособияны алырча заявленияны жарашдырыуну низамын тохташдырыргъа, кеслерине бойсунмагъан чурумла бла айлыкълары ахчаны жашау этерге керекли эм аз ёлчемине жетмеген гражданлагъа ахча болушлукъ берилирча сылтауланы санын кёбейтиуню энтта сюзерге тийишлиси айтылады.
Аланы санына аз файдалы юйюрде ишлерге онгу болуп, алай бир жерде официал халда урунмагъан инсан жашагъанына, юйюр пособияны алыргъа заявление берген кезиуде аны келечиси аскер къуллукъдан кетген эсе, неда тюрмеден чыгъып юч ай озгъан эсе не мадар этерге кереклиси къошулургъа керекди. Эсге тиширыу баладан ауурлулугъу бар эсе (30 ыйыкъдан аслам) неда инсан бир жерде ишлеялмагъаны закон бла тохташдырылгъан эсе, аны да эсге алыргъа керекди.