КъМР-ни Башчысы Казбек Коков бла Санкт-Петербургну губернатору Александр Беглов 2021-2026 жыллада кёп жанлы бирге ишлеуню юсюнден келишимге кёре тамамланыллыкъ ишлени планына къол салгъандыла. Къабарты-Малкъарны бла къыралыбызны шимал жанында ара шахарыны араларында регионла аралы байламлыкъланы андан ары айнытыуну «жол картасына» сатыуалыу-экономика, илму-техника, маданият эмда социал жаны бла бирге ишлеу да киреди.
-Санкт-Петербург – Россей Федерацияны магъаналы экономика эмда маданият араларындан бириди. Ол себепден бирге жарашдырылгъан келишим бизни предприятияларыбызны араларында тюзюнлей байламлыкъланы къураргъа онг ачарыкъды. Биз Питерни предприятияларына бла бизнесменлерине туризмни объектлерини, солуу эмда саулукъландырыу араланы къурулушларына, эл мюлк продукцияны жарашдырыу эмда сакълау бла кюрешген предприятиялагъа ахчаларын салып файдаланыргъа тап болумла къураргъа хазырбыз,-дегенди Казбек Коков сёлешиулени кезиуюнде.
Бюгюнлюкде республиканы башламчылыгъы бла Санкт-Петербургну Тыш байламлыкъла жаны бла комитети бла бирге шимал ара шахарны сабийлерин Къабарты-Малкъарда солутууну амалларына къарала турады. Андан сора да, быйыл жайда 17 июльдан башлап ол айны 27-сине дери республикабызда «Къорууланыуну жолу» деген 23-чю патриот экспедицияны бардырыргъа белгилинеди. Ол Уллу Ата журт уруш башланнганлы 80-жыллыгъына жораланырыкъды.
Эсигизге салайыкъ, регионланы араларында келишимге 2015 жылда къол салыннганды, 2020 жылда уа андан белгиленнген бир ненча иш терк тамамланып башланнганды. Жаланда былтыр республиканы уллу предприятиялары консерваладан, сют эмда эт ашарыкъладан, суусап сууладан, нартюх крахмалдан, алмаладан 2,2 миллиард сом багъасы жарашдырып ийгендиле.
Санкт-Петербургну предприятияларына бла тюкенлерине кабель бла темир жип да жибериледиле. Аны саулукъ сакълау департаменти бла бирге ишлеуню чеклеринде республикадан 142 адам атлары айтылгъан медицина аралада бийик технологиялы болушлукъ алалгъандыла.
Майны ахырында уа Нальчикден Санкт-Петербургга тюзюнлей авиарейс ачылгъанды. Ол да субъектлени араларында ишчи байламлыкъланы кенгертиуге себеплик этерикди.
Республиканы шимал жанында регион бла бирге ишлеу агропромышленность комплексде бла промышленностьда мурдорланады, ол санда электроэнергетикагъа бийик вольтлу аппаратураны, налмас инструментлени, кабельни бла темир жиплени, шёндюгю цифралы медицина рентген техниканы сатыуда, Къабарты-Малкъарны курорт-рекреация эмда туризм бёлюмлеринде.
