Быйыл «Шахар болумну игилендириу» программагъа кёре, Тырныауузда, Элбрусда, Кёнделенде эм Быллымда кёп фатарлы юйлени арбазларына эм башха объектлеге тынгылы ремонт этилликди. Бусагъатда тийишли ишле Тырныауузда Мызы улуну атын жюрютген орамда бла Элбрус проспектде 36-чы, 40-чы, 47-чи эм 49-чу номерли кёп фатарлы юйлени арбазларында барадыла. Ала битеу да быйыл август айгъа жангыртылынып бошалыргъа керекдиле.
Андан сора да, «Хар сабийни жетишими» федерал эм «Билим бериу» миллет проектлеге эм «КъМР-де билим бериуню айнытыу» республикалы программагъа кёре, школлада физкультурадан бла спортдан жараула бардырыргъа онг къурарча субсидия бёлюннгенди. Аны чеклеринде бюгюнлюкде Тырныауузну 3-чю номерли орта школуну эки спорт залына тынгылы ремонт этиле турады. Ала быйыл августну орталарындан кеч къалмай битерикдиле.
- Ишле графикден кеч къалмай тынгылы тамамланадыла. Проектни жашауда бардырылгъаны муниципалитетде билим бериуню айнытыугъа ахшы себеплик этерикди, -деп къошханды районну администрацияны башчысыны орунбасары Муаед Азубеков да. Бу кюнледе «Экология» миллет проектге кирген «Таза суу» федерал программагъа кёре Кёнделенде Энеев, Мусукаев, Жанатаев, Ленин эм Тапшинская атлы орамлада саулай да 4,2 километр чакълы жерде суу быргъыланы алышып кюрешедиле.
Элни адаминистрациясыны башчысы Атмырзаланы Марат айтханнга кёре, Элбрус районну эм уллу эллеринден биринде проектни баргъаны бек магъаналы ишди. Аны хайыры бла энди иги кесек арбазны таза суу бла сылтаусуз этерге онг табыллыкъды.
Эсге сала айтсакъ, сагъынылгъан проектле графикден кеч къалмай эм качестволу тамамланырларын КъМР-ни Башчысы Казбек Коков бла Правительство энчи контрольда тутадыла.
