4 июньда Къабарты-Малкъарны халкъ поэти, Ленинчи, СССР-ни, РФ-ни да Къырал саугъаларыны лауреаты Къулийланы Къайсынны эсгеребиз. Ол арабыздан кетгенли быйыл отуз алты жыл болады. Ол жылланы ичинде бушуу кюнюбюз бла байламлы Къулий улуну атын жюрютген орамда эсгертмесине хар заманда да адамла келедиле. Аланы араларында сабийле, уллайгъанла да бардыла. Ала назмула окъуйдула, эсгериу хапарла айтадыла.
Бу жол жыйылыуну КъМР-ни культура министри Мухадин Кумахов ачханды эм бардыргъанды. Ол Къулийланы Къайсынны чыгъармачылыгъыны, аны таркъаймагъан терен магъанасы кюнден-кюннге ёсе баргъаныны юсюнден айтханды.
Биринчи сёз КъМР-ни Парламентини Председатели Татьяна Егоровагъа берилгенди. Ол уллу поэт ауушханлы анча жыл кетсе да, аты биргебизге жашап тургъанын чертип, аны жашауу бизге бюгюн да юлгюлю болгъанын, ол халкъыбызны, къыралыбызны да сюерге юйретгенин айтханды. Спикер дуниягъа белгили поэтибизни назмуларын не заманда да сюйгенин, алада кёп акъыл оюм, ариу суратлаула тапханын да эсге салгъанды.
- Къулийланы Къайсын аз адам санлы халкъны поэти эсе да, атын дуниягъа белгили этгенди. Ол, назму сёзге салып, халкъына айтхан затла битеу дунияны халкъларына да аталадыла. Поэт анагъа, сюйгенине атагъан аламат, терен сезимли назмула поэт тиширыулагъа къаллай жюрек тутханын айтадыла. Сабийлеге сюймекликни, аланы къоруулауну да ол адам улуну баш борчуна санагъанды.
Аны ёмюрлюк болуп къалгъан айтыулары кёпдюле: «Битеу адам улун сюйген тынчды, къоншунгу сюерге юйрен», «Сабийле бир заманда да ёлмесинле», «Мамырлыкъ, къууанч сизге, саула!», «Дуниягъа халал кёзле бла къарагъыз»… Бирде фахму бла инсанлыкъ энчи болуп келедиле. Поэтни юсюнде ала бирге къошулупдула. Ол халкъына бла адабиятха къуллукъ этгенди. Аны бла ызындан келген тёлюлени ыразылыкъларына да тийишли болгъанды. Закийни назмулары жаш тёлюню игиликге, халаллыкъгъа, мамырлыкъгъа чакъырып турадыла. Назмучу келлик тёлюле аны тенгшилеринден насыплы болсала сюйгенин айтханды», - дегенди Татьяна Борисовна. Ызы бла ол Къулийланы Къайсынны башында сагъынылгъан назмусун кёлден айтханды.
Андан сора сёз Къабарты-Малкъарны Жазыучула союзуну правленини председатели, назмучу Беппайланы Муталипге берилгенди. Ол: «Бу кюн бизни хар бирибизге да энчиди. Ол мудахлыкъны бла ёхтемликни кюнюдю - Къайсын Шуваевич бу жерден болгъаны кёлюбюзню кётюреди, аны дуниядан кетгени уа чексиз жарсытады. Поэт Къабарты-Малкъарны, саулай да Кавказны дуниягъа танытыр ючюн кёп иш этгенди. Аланы юслеринден ариу, тынгылы, магъаналы сёзюн айтханды», - дегенди эм анга аталгъан назмусун окъугъанды.
Къулийланы тукъум таматалары Малик: «Мен быллай кюнледе, бизни къарындашыбыз Къайсынны эсгерип, бери келгенлени – ма быллай бир кёп адамны кёрсем, хар заманда кёлюм кётюрюледи. Саулай да тукъумубузну атындан сизни барыгъызгъа да ыразылыгъымы билдиреме», - дегенди.
Эсгериу жыйылыуну ахырында Чегем районну администрациясыны таматасы Хасанш Одижев сёлешгенди. Ол дуниягъа белгили жерлешибизни акъыл кючюню, фахмусуну, бийиклигини, уллу адамлагъа тийишли жандауурлугъуну, кишилигини, миллетин, къыралын бек сюйгенини юсюнден айтханды. Сора Чегем районда Къулийланы Къайсынны бла Алим Кешоковну шуёхлукъларына аталып, бу эки уллу адамыбызны эсгертмелери ишлене тургъанын билдиргенди. Ызы бла Хасанш Хакяшевич, жыл сайын бола тургъаныча, закийни поэзиясын сюйгенлени аны Биринчи Чегемде поэтни Юй-музейине, анда боллукъ митингге къатышыргъа чакъыргъанды.
Жыйылыу поэтни ауазына тынгылай, аны эсгертмесине гюлле салыу бла бошалгъанды.
