«Урысейм и Президентым а и пщэ­рылъым республикэм щыпсэу куэдым я дежкIэ мыхьэнэшхуэ дыдэ иIэщ. ЗаконыщIэр хуэщхьэпэнущ ди къалэхэмрэ къуажэхэмрэ зегъэужьыным, цIы­ху­хэм я псэукIэр егъэфIэкIуэным», - къыхигъэщхьэхукIащ КIуэкIуэ Казбек.
Петербург щекIуэкI дунейпсо экономикэ зэхуэсым КъБР-м и Iэтащхьэ КIуэкIуэ Казбек щыIущIащ «Газпром межрегионгаз» ООО-м и генеральнэ директор Гус­тов Сергей.
ЗэIущIэм щытепсэлъыхьащ цIыхухэм пщIэншэу газ яхущIэшэным теухуа законыр, УФ-м и Президент Путин Владимир Федеральнэ Зэхуэсым Зэрызыхуигъэзам къыщигъэувахэр гъэзэщIэным ипкъ иткIэ Къэрал Думэм гъубж кIуам къищтар, ­Къэбэрдей-Балъкъэрым щыгъэзэщIэным ехьэ­лIа Iуэхухэм.
Газ щIэшэным теухуа мылъкур - газ бжьамийм деж къыщыщIэдзауэ щIапIэм и ­гъунапкъэм нэсу шэным текIуэдэнур - зыхухахынухэм Къэбэрдей-Балъкъэрым щыхагъэхьащ унэ минитхум щIигъу. Абы те­кIуэдэну къалъытащ сом мелуан 600 хуэдиз. Газ зимыIэхэм яхущIэшэным яужь ихьэну я мурадщ дызэрыт илъэсым и щэкIуэгъуэ мазэм щегъэжьауэ.
«Урысейм и Президентым а пщэрылъыр гъэзэщIэным республикэм щыпсэу куэдым я дежкIэ мыхьэнэшхуэ дыдэ иIэщ. ЗаконыщIэр хуэщхьэпэнущ ди къалэхэмрэ къуажэхэмрэ зегъэужьыным, цIыхухэм я псэукIэр егъэфIэкIуэным», - къыхигъэщ­хьэхукIащ КIуэкIуэ Казбек.
Законым зэрыщыубзыхуамкIэ, жылэм ешэлIа газ бжьамийм къыщыщIэдзауэ цIыху хэхам и унэм и гъунапкъэм нэсыху гъэсыныпхъэ ткIуаткIуэр хуашэн хуейщ къэралым и хьэкъкIэ, езым и лъапсэм ар щызэбгрышыным текIуэдэнур унагъуэм и мылъкум къыхихыжынущ. Абы къы­дэкIуэу, цIыхухэм ятын хуей пщIэр инфляцэм щхьэпрыкI хъунукъым, инвестицэм щхьэкIэ тралъхьэ хущIыгъуныгъэхэри хабжэнукъым.
Апхуэдэу, законым халъхьа зэхъуэкIы­ныгъэхэм япкъ иткIэ, гъэсыныпхъэ-энер­гетикэ зэхуэгъэкIуэныгъэхэр къэзыщтэнур Федерацэм хыхьэ щIыналъэм и Iэтащхьэрщ икIи ар и лъабжьэущ газыр щIэ­шэным и щIыналъэ программэхэр зэрызэхалъхьэнур.