КъМР-ни Парламентини Культура, граждан обществону айнытыу эмда информация политика жаны бла комитети кесини кезиулю жыйылыуун Къабарты-Малкъарны Миллет музейинде бардыргъанды. Анга республиканы законла чыгъарыучу органыны таматасыны орунбасары Мурат Карданов, тийишли комитетлени келечилери, Миллет музейде ишлегенле, художникле да къатышхандыла.
Жыйылыуну Культура, граждан обществону айнытыу эмда информация политика жаны бла комитетни таматасы Заурбек Кумалов ачханды эм бардыргъанды. Республикада музейле бла байламлы иш къалай къуралгъаныны юсюнден да КъМР-ни культура министри Мухадин Кумахов билдиргенди. Ол быллай шартла келтиргенди: республикада 19 музей барды, аладан ючюсю къырал даражалыдыла, онусу Миллет музейни филиалларыдыла, жетиси муниципал магъаналыдыла. Алада сакъланнган затла 205698 боладыла.
Музейле маданият хазнабызны сакълау эмда аны хайырланыу бла кюрешген социал институтла болгъанларын эсгертип, министр ала бла байламлы къырал политика къалай къуралгъаныны юсюнден айтханды. Къыралны жанындан музейлени ишлерине хар жаны бла да себеплик этиледи, аланы коллекцияла бла толтурурча эмда ала сакъланырча мадарла этиледиле, фондланы эсеплеуню системасы игилендириледи, ол санда шёндюгю амалланы хайырланыу бла.
Былтыр бир-бир учреждениялагъа ремонт этилгенди, ол санда А.А.Шогенцуковну, Къулийланы Къайсынны музей фатарларына, Минги тауну тийресинде Къорууланыу музейге, Бекмурза Пачевни музейине, Политика репрессиялагъа тюшгенлени мемориалына, Суратлау искусстволаны А.Л.Ткаченко атлы музейге, Элбрус районда Краеведение музейге. Миллет музейге тынгылы ремонт этилгени энчи белгиленнгенди.
Бу бёлюмде цифра амалгъа кёчюуню юсюнден айта, Мухадин Кумахов кесини энчи оюмун билдиргенди: ол бай экспозицияны алышындыраллыкъ тюйюлдю, жаланда аны къошагъы боллукъду, алай бла жаш тёлюню сейирин къозгъарыкъды.
Миллет музейни ишини бла проблемаларыны юсюнден а аны директору Феликс Наков хапарлагъанды. «Арт заманлада музейни бла аны филиалларыны экспозицияларын жангыртыу, алагъа къошуу жаны бла иш кюч алгъанды. Юч жылны ичинде палеолит заманладан къалгъан материалладан окъуна тогъуз минг чакълысы къошулгъанды. Былтыр а ол кёрюмдю 2,5 мингден артыкъ эди. Быйыл да археологияны башха предметлерин да алыргъа, алай бла музей фондну толтурургъа белгиленеди»,-дегенди ол.
Директор фондну башха жерледе арталлыда тюбемеген предметлерини юсюнден да айтханды. Ала тынгылы тинтилгенден сора ала ёмюрлени бек теренинден келгенлери ачыкъланнганды.
Проблемаланы юслеринден сёз баргъанда, Феликс Наков аланы асламысы кетерилгенлерин, алай Миллет музейни ишине чырмау этген жартылыкъла алыкъа къалгъанларын белгилегенди. Ол санда бир-бир реставрация мастерскойлагъа керекли оборудование эмда уста специалистле да жетишмейдиле. Ала тарлыкъ да сынайдыла.
Ремонт этилгенини хайырындан мультимедиялы кёрмючле къураргъа да онг чыкъгъанды, алай жангы экспозицияланы техника эмда эстетика даражада кёргюзтюрча этерге тийишлиди. Докладчы 2020 жылда кёрмючле къурауну, музейлени араларында бирге ишлеуню, тарых экспозицияны кенгертиуню юсюнден келишимле этерге хазыр болгъанладан билдириуле келгенлерин эсгертгенди.
Докладладан сора, жыйылыугъа къатышханла кеслерини оюмларын айтхандыла. КъМР-ни парламентини Культура, граждан обществону айнытыу эмда информация политика жаны бла комитетини члени Борис Паштов музей ишни тынгылы бардырыргъа чырмау этген сылтауланы кетериуню ол билген амалларын туура этгенди. Ол комитетни члени, Нальчикде 2-чи номерли лицейни директору Людмила Пешкова мектепледе башланнган классланы окъуучуларына суратлау эмда музыкалы школланы филиалларын ачыуну хайырлыгъа санагъанды.
Битеу айтылгъан оюмланы эсге алыу бла тийишли къураулагъа эсгертиуле жарашдырылгъандыла. Ахырында парламентарийле бла къонакъла Миллет музейни экспозициялары бла шагъырейленнгендиле.