Болгарияны ара шахары Софияда 16 жыллары толмагъан гёжефлени араларында эркин тутушуудан Европаны чемпионаты бардырылгъанды. Эришиуге Россейни жыйымдыкъ командасыны санында бизни республикадан юч спортчу Гергъокъланы Саид, Хасауланы Смаил, Ислам Кажаров къатышхандыла, юч уланыбыз да андан алтын майдалла бла къайтхандыла.
Тюнене уа ала бла Нальчикни аэропортунда къууанчлы тюбешиу болгъанды. Гёжефлени, тренерлени да алгъышларгъа, кёллерин кётюрюрге республиканы эллеринден бла шахарларындан спортчула, тренерле, спортну сюйгенле жыйылгъандыла.
Аэропортда чемпионлагъа айран гоппан, хычинле, жыр-тепсеу бла тюбегендиле. Аланы алгъышлай, республиканы Парламентини депутаты Байдаланы Далхат жашланы жетишимлерине жюрекден къууаннганын билдиргенди. «Ала алтын майдалланы итиниулюклери, муратларына жетиуде къатылыкълары, жигитликлери бла къытхандыла. Ала энди Олимпиада майдалла къытарларына ишеклигим жокъду. Сизни юйретген тренерлеге да ыразылыгъымы билдирирге сюеме»,- дегенди ол.
Спорт министрни орунбасары Заур Хежев бу жетишимлени бизни гитче республикабызгъа магъаналары уллу болгъанын белгилегенди. Россейни миллет командасы чемпионатда сегиз алтын майдал къытханды, аладан ючюсюн бизни республиканы келечилери келтиргендиле. Бу хорламла уллу къыйын салып ишлеуню, тёзюмлюкню, чыныгъыуну эсебидиле. Мен спорт министр Ислам Хасановну, битеу спорт сообществобузну атындан гёжефлени, аланы юйретгенлени да алгъышлайма. Европаны чемпионаты бла сизни спорт жолугъуз башланады, алда алыкъа кёп хорламла сакълайдыла, аны ючюн а тренерлеригизге тынгылагъыз, жарауда кючюгюзню аямагъыз, деп Заур Мугидович жыйылгъанлагъа саулукъ, жетишимлилик тежегенди.
Грек-рим тутушуудан Олимпиаданы чемпиону, республиканы Парламентини башчысыны орунбасары Мурат Карданов а бу ахшы иш бла саулайда республиканы алгъышлагъанын билдиргенди. 1 июньда, Сабийлени къоруулауну кюнюнде, жашларыбыз майдалла бла къайтханлары энчи магъананы тутады, дегенди ол. Алгъышлаулагъа Чегем районну администрациясыны башчысы Юрий Борсов, Черек районну администрациясыны башчысы Муртазланы Борис да къошулгъандыла.
Жыйылгъанлагъа ыразылыкъларын чемпионланы тукъум келечилери - Хасауланы Мухарбий, Анзор Кажаров, Гергъокъланы Халим - билдиргендиле. Ала, жашланы хазырлагъан тренерлеге хурмет этгенлерин айта, республикабызда быллай жаш адамларыбыз кёп болурларын тежегендиле.
Ариу жырлары бла халкъ сюйген артистлерибиз Мусукаланы Руслан, Текуланы Амур, Султан Хажироко къууандыргъандыла. Жыйылгъанла уа, чемпионла бла ушакъ эте, суратлагъа тюше мычыгъандыла.