КъМР-ни Башчысы Казбек Коков Нарткъалада къыяулу сабийлеге деп къуралгъан араны ачылыууна къатышханды. Бу иш Сабийлени къоруулауну халкъла аралы кюнюне жораланнганды. Аны белгилерге КъМР-ни Правительствосуну келечилери, Парламентни депутатлары, районну администрациясы, бу магъаналы проектге спонсорлукъ этген предпринимательле, арагъа жюрюгенле, аланы ата-аналары, устазла да келгендиле.
Жыйылгъанлагъа айланып, Казбек Коков ара къалай къуралгъанын эсге салгъанды: «Аны кереклисини юсюнден сёз 2015 жылда кётюрюлгенди. Ол заманда Эркенов Тембулат Хусенович проект жанлы болургъа чакъыргъан эди. Аны уа Урван районну кёп предпринимательлери къабыл кёргендиле»,- дегенди ол.
Былтыр августда уа Казбек Коков «Машук-2020» жаш тёлю форумгъа къатышханла бла онлайн амал бла ушакъ этгенинде, аладан бири - Мурат Бжедугов -  проектни ахырына жетдирирге кереклисин айтхан эди. Республиканы Башчысы анга ыразы болгъанды. «Аны уа саусуз сабийлеге жан аурутхан бизнесменлерибиз да дурус кёргендиле. Аны ючюн алагъа уллу ыспас этеме»,- дегенди Казбек Валерьевич.
Алай бла проект республиканы предпринимательлери Мухамед Кудалиевни, Насталаны Алий-Солтанны, Аслан Лигидовну, Хазрит Тлакадуговну, Руслан Шогеновну, Шунгарланы Саматны бла Адиб Суншевни хайырларындан тындырылгъанды. Республиканы оноучусу юйюрге бла сабийлеге болушууда бизнесни социал магъанасы уллу болгъанын, къыралны къайгъырыуу да кючлене баргъанын чертгенди. «Россей Федерацияны Президенти къырал политикада сабийли юйюрлеге тутхучлулукъ этиуню эм башха салады»,- деп чертгенди Коков.
Арада сабийлени саулукъларын кючлендирирча онгла къуралгъандыла. Реабилитация этген тренажёр оборудование эм игиледен бириди. Бюгюнлюкде тренерле къыяулу сабийле бла ишлерге лицензия ала турадыла, башха ишчиле да сайланадыла. Шёндю окъуна Ара, энчи сабийле бла ишлеуню жангы амалларын сингдирир муратда, Нальчикде спорт-адаптив сабий-жаш тёлю школ бла бирге ишлейди.