КъБР-м и Парламентым «Правительствэм хухах сыхьэтым» хыхьэу депу- татхэр щытепсэлъыхьащ Къэбэрдей-Балъкъэрым щыпсэухэм Интернетыр зэраIэрыхьэ щIыкIэмрэ зэпыщIэныгъэ IэмалхэмкIэ ахэр къызэрызэрагъэпэщымрэ.
КъБР-м и Парламентым и УнафэщI Егоровэ Татьянэ жиIащ «Бжыгъэ экономикэ» лъэпкъ проектыр мыхьэнэшхуэ зиIэхэм зэращыщыр.
- ХъыбарегъащIэ IэмалыщIэхэм елъытащ щIыналъэм и социально-экономикэ зыужьыныгъэр зыхуэдэ хъунур. Интернетыр хэмыту иджыпсту зыри зэфIэкIыркъым. Ар нэрылъагъу тщыхъуащ коронавирусым зыщиубгъуа зэманым, школакIуэхэри студентхэри унэм щеджэн, ди зэIущIэхэр видеоконференц IэмалхэмкIэ едгъэкIуэкIын хуей щыхъуам. Ауэ нэгъабэ ди Iэмалхэри зэрынэхъыбэр дигъэлъагъужащ, псом хуэмыдэу бжыгъэ технологиехэр нэхъ псынщIэу гъащIэм и лъэныкъуэ псоми хэдгъэхьэным теухуауэ, - жиIащ Егоровэм.
КъБР-м бжыгъэр зи лъабжьэ зыужьыныгъэмкIэ и министр Ащхъуэт Ислъам къыщыпсалъэм, къыхигъэщащ «ХъыбарегъащIэ инфраструктурэ» федеральнэ проектым хыхьэ «УФ-м и бжыгъэ экономикэм теухуа лъэпкъ программэ» лъэпкъ проектым ипкъ иткIэ, 2020 гъэм псынщIэу лажьэ сетым социальнэ мыхьэнэ зыгъэзащIэ IуэхущIапIэу 64-рэ зэрыпащIар. 2021 гъэм и кIэ пщIондэ иджыри апхуэдэ IуэхущIапIэ 71-рэ къызэрагъэпэщынущ псынщIэу лажьэ сетхэмкIэ. Абыхэм хеубыдэ егъэджэныгъэ, щэнхабзэ IэнатIэхэр, фельдшер-акушер, мафIэсгъэункIыфI IуэхущIапIэхэр. Къэрал зэгурыIуэныгъэ щхьэхуэм хыхьэу, фельдшер-акушер IуэхущIапIи 9 зэрыпащIэнуми мы зэманым йогупсыс, сыту жыпIэмэ телемедицинэр зэтеухуа хъумэ, ди лэжьакIуэхэм дохутыр нэхъ пажэхэм ечэнджэщыну Iэмал яIэнущи. КъищынэмыщIауэ, ФАП-хэм щылажьэхэм къагъэсэбэпыфынущ сымаджэхэм я электроннэ картэхэр (Узыншагъэр хъумэнымкIэ зыуэ щыт хъыбарегъащIэ системэм къыщыхьауэ).
Къэпсэлъам къыхигъэщащ егъэджэныгъэр иджырей IэмалхэмкIэ къызэрагъэпэщмэ, а IэнатIэм нэхъри зэрызиужьынур. Апхуэдэ дыдэу щэнхабзэмкIэ IуэхущIапIэхэми я лэжьыгъэм цIыху нэхъыбэ щыгъуазэ ящIыфынущ, щIэупщIэ нэхъ яIэнущ.
Ащхъуэтым дыщIигъуащ УФ-м Бжыгъэр зи лъабжьэ зыужьыныгъэмкIэ и министерствэм иращIылIа зэгурыIуэныгъэм ипкъ иткIэ, федеральнэ бюджетым къыхэкIыу республикэм и курыт школхэм локальнэ сеть зэтеухуэнымрэ Wi-Fi IэмалкIэ ахэр къызэрагъэпэщынымрэ теухуауэ 2023 гъэм субсидие къызэрыратынур.
Бжыгъэр здынэмыса щIыпIэ щымыIэным тещIыхьа федеральнэ проектым хыхьэу, цIыху 250-м къыщыщIэдзауэ 500-м нэс зыдэс къуажэ 20-м къыщызэрагъэпэщащ псоми зэгъусэу икIи пщIэншэу Интернетым зэрызыпащIэф Iэмалхэр. Мы зэманым иджыри къуажэ 31-рэ ягъэбелджылащ (цIыхуи 100-м къыщыщIэдзауэ 500-м нэс дэсу).
Ащхъуэтым жиIащ мы гъэм Хеймащэ хъупIэм щыIэ «Бахъсэн районым и щэнхабзэ-зыгъэпсэхупIэ центр» щэнхабзэ IуэхущIапIэм Интернетыр зэрынагъэсар. Абы къыхигъэщащ щытыкIэм арэзы укъызэрищIыр, псом хуэмыдэу ар «ХъыбарегъащIэ инфраструктурэ» проектым ипкъ иткIэ 2019 - 2020 гъэхэм ирагъэкIуэкIа лэжьыгъэм къызэрырикIуар. КъищынэмыщIауэ, къэкIуэну зэманым министерствэмрэ связым и операторхэмрэ къалэнышхуэхэр зыхуагъэувыж щIыпIэ пхыдзахэм, щIыналъэм и зыгъэпсэхупIэхэм Интернетым епха Iуэхутхьэбзэхэр щахуэщIэным теухуауэ.
Егоровэ Татьянэ къызэхуэсахэм ягу къигъэкIыжащ КъБР-м къэрал кIуэцI IуэхухэмкIэ и министрым КъБР-м и Парламентым къыщыщыпсэлъам къызэрыхигъэщар мы зэманым кибер щIэпхъаджагъэхэр нэхъыбэу ялэжь зэрыхъуар:
- ЦIыху къызэрыгуэкIхэми IуэхущIапIэхэми я зэран йокI абыхэм. Министерствэр абы и лъэныкъуэкIэ дэIэпыкъуэгъу дауэ хъурэ? - щIэупщIащ Егоровэр.
Ащхъуэт Ислъам жиIащ Къэбэрдей-Балъкъэрым щыпсэухэр «Бжыгъэ диктант» Iуэхум зэрыхэтар, абы ипкъ иткIэ ди щIыналъэр Кавказ Ищхъэрэм къызэрыщыхэжаныкIар, цIыхухэм ныкъусаныгъэншэу Интернетыр къазэрыхуэгъэсэбэпыр къызэригъэлъэгъуар.
«Бахъсэн районым и щэнхабзэ-зыгъэпсэхупIэ центр» щэнхабзэ IуэхущIапIэм и гугъу ищIу, КъБР-м и Парламентым Мэкъумэш IэнатIэмкIэ, щIыуэпсыр къэгъэсэбэпынымрэ ар хъумэнымкIэ и комитетым и унафэщI ТекIушэ Артур щIэупщIащ Хеймащэ хъупIэм мы лэжьыгъэм щыщу къыщыпащэнум.
Министрым жиIащ ВетеринариемкIэ управленэм и штабым нэс сетым къызэрырагъэубыдар, абы адэкIи зэрызрагъэубгъунур.
«КПРФ»-м и Къэбэрдей-Балъкъэр щIыналъэ къудамэм и унафэщI Пащты Борис министерствэр къыхуриджащ гъуэгум мобильнэ связыр къыщезыгъэубыд станцхэм я бжыгъэр ирикъуу къызэрызэмыгъэпэщамрэ тэмэму зэрымылажьэмрэ цIыхухэр зэригъэтхьэусыхэм гулъытэ хуащIыну.
Депутатхэм жаIащ иджырей Iэмалхэр шынагъуэншэу къызэрагъэсэбэпыпхъэм теухуауэ цIыхухэм епсэлъэн, я хуитыныгъэхэр гурагъэIуэн зэрыхуейр.
ЗэIущIэм я Iуэху еплъыкIэ къыщагъэлъэгъуащ «Ростелеком» ПАО-м и Къэбэрдей-Балъкъэр къудамэм и унафэщIым и къуэдзэ МацIыхъу Феликс, «Мегафон» ПАО-м и Кавказ къудамэм и Къэбэрдей-Балъкъэр щIыналъэ IэнатIэм и унафэщI НафIэдзокъуэ Азэмэт, «Вымпелком» ПАО-м Къэбэрдей-Балъкъэрым щиIэ IуэхущIапIэм и унафэщI Терёхин Роман сымэ.
ЗэIущIэм щыжаIар къэлъытауэ, депутатхэм ягъэбелджылащ зытепсэлъыхьа Iуэхур зи нэIэм щIэтхэр нэхъыщхьэу зэлэжьыпхъэхэр.