КъМР-ни Парламентини спикери Татьяна Егорова президиумну кезиулю жыйылыуун бардыргъанды. Анда депутатла КъМР-ни Башчысыны Посланиясында белгиленнген жумушланы толтурууну планын сюзюп, къабыл кёргендиле.
Контроль эм регламент жаны бла комитетни башчысы Кансаланы Елена план тюрлю-тюрлю жумушладан бай болгъанын чертгенди. Битеу да бирге 30-дан аслам иш бардырыргъа белгиленеди, ол санда законла хазырларгъа, котроль-аналитика жумушла толтурургъа. Артыкъда магъаналы сорууланы чеклеринде миллет проектле жашауда къалай бардырылгъанларын, коррупциягъа къажау мадарланы, къырал эм муниципал жумушланы тамамлауну, инвестицияланы кёбейтиуню, женгил промышленностьну айнытыуну, инсанланы бир-бир къауумларын жашау журтла бла жалчытыуну сорууларын сюзерге, билим бериуде, саулукъ сакълауда, спортда, башха сфералада кемчиликлени тинтирге белгиленеди.
- Планнга кийирилген битеу жумушланы да жууаплы органла бла бирге тынгылы сюзерге керекди. Аланы болжалдан кеч къалмай, толусунлай тамамларгъа борчлубуз. Битеу жумушла социал магъаналыдыла. Республиканы оноучусу алагъа энчи эс бургъанды,-дегенди докладны сюзе Татьяна Егорова. Комитетлеге жай эм кюз арты сессиялада ишни эсеплери чыгъарылып, план къалай тамамланнганыны эсеплерин спикерге кёргюзтюрге буюрулгъанды.
Ыз бла президиум «2021 жылда эм 2022-2023 план кезиуде Борчлу халда медицина страхованияны КъМР-де жер-жерли фондуну бюджетини юсюнден» законнга тюрлениулеге къарагъанды. Депутатла федерал законлагъа тюзетиулени, башха субъектледе коллегаларыны законодательный башламчылыкъларын да сюзгендиле.
Ахырында Аграр соруула, табийгъатны хайырланыу, экология эм тёгерекдеги къудуретни сакълау жаны бла комитетни башчысы Артур Текушев «КъМР-де «Экология» миллет проектни жашауда бардырыу» деген темагъа «правительстволу сагъатда» чыгъарылгъан эсгертиуле къалай толтурулгъанларын билдиргенди.
Депутатла «Къоркъуусуз эм качестволу автомобиль жолла» миллет проектни КъМР-де толтуруу» деген темагъа «правительстволу сагъатда» чыгъарылгъан эсгертиуле жашауда къалай тамамланнганлары бла да шагъырейленнгендиле. Ол жаны бла докладны Промышленность, транспорт, связь эм жол мюлк жаны бла комитетни башчысы Байдаланы Салих этгенди.