КъМР-ни Урунуу эм социал къоруулау министерствосунда 2021 жылда сабийлени жай солууларын къурау, саулукъларын кючлендириу эмда иш бла жалчытыу жаны бла правительстволу комиссияны уллу жыйылыуу болгъанды. Аны КъМР-ни Правительствосуну председателини орунбасары Марат Хубиев бардыргъанды. Анга КъМР-ни Башчысында Сабийлени эркинликлери жаны бла уполномоченный Светлана Тлинова, тийишли ведомстволаны, профсоюзланы, муниципал къуралыуланы, саулукъ сакълау учрежденияланы, солуу лагерьлени таматалары да къатышхандыла.
Кенгешде сабийле жай кезиуде солурукъ жерле къалай хазырланнганларыны юсюнден сёз баргъанды. Аны юсюнден билдириуле бла КъМР-ни курортла эм туризм министри Мурат Шогенцуков, КъМР-ни саулукъ сакълау министрини орунбасары Татьяна Аникушина, Хайырланыучуланы эркинликлери эмда адамны ырахатлыгъы жаны бла федерал надзор службаны КъМР-де Управлениясыны башчысы Жираслан Пагов, КъМР-ни Жарыкъландырыу, илму эм жаш тёлюню ишлери жаны бла министрни орунбасары Екатерина Мисостова сёлешгендиле.
Мурат Шогенцуков бюгюнлюкде республикада сабийлени жай солууларын къураргъа эмда саулукъларын кючлендирирге 44 учреждение сайланнганын билдиргенди. Ол санда 4-сю санатор маталлыды, 12-си пансионатлада, спорт базалада, болжаллы халда мектепледе къуралгъан лагерьледиле.
Татьяна Аникушина уа сабийле солурукъ жерледе коронавирусдан сакъланыр ючюн къаллай мадарла этилгенлерини юсюнден айтханды. «Медиклени араларында жууаплы адамла белгили этилгендиле. Ала барысы да вакцинациядан ётгендиле. Солурукъладан а биргелерине саулукъларыны юсюнден тийишли документлери болуру изленирикди»,-дегенди.
Жираслан Пагов быйылча къыйын болумлада ала бир заманда да ишлемегенлерин, бу жолгъу солуу компанияны къурау бютюн уллу жууаплылыкъны излегенин чертип айтханды. Ол коронавирус инфекция бла бирге башха вирусла да къозгъалгъанларын унутмазгъа чакъыргъанды. Аны оюмуна кёре, аш-суу хазырларыкъланы да бек тынгылы сайларгъа керекди.
– Тинтиуле бардыргъан кезиуюбюзде, аз болсала да, кемчиликле ачыкълагъанбыз, аланы къысха заманны ичинде кетерирге кереклисин да къаты айтханбыз. Алайды да, школ лагерьле толусунлай хазырдыла, башхалада уа алыкъа тамамланыллыкъ ишле бардыла, ала терк тындырылырла деп ышанабыз,-дегенди.
Жираслан Пагов губуладан бюгюннге дери 68 сабийге хата жетгенин эсгертип, лагерьлени аладан къорууларгъа, дарман себерге кереклисин чертгенди.
Екатерина Мисостова, школ лагерьлени юслеринден айта, алада аш-суу къайда эмда къалай хазырланырыгъына къаралгъанын, спорт керекле бла да жалчытыуну къайгъысы этилгенин, къоркъуусузлукъну МСЧ-ни, Ич ишле министерствону келечилери жалчытырыкъларын билдиргенди.
Жыйылыуда сабийлени солуулары ючюн хакъ тёлеуню юсюнден да сёлешиннгенди. Аны юсюнден КъМР-ни урунуу эмда социал къоруулау министри Асанланы Алим билдириу этгенди. Ишни тап къурар ючюн къуралгъан тёрт ишчи къауумну тинтиулерини эсеплери бла уа урунуу эм социал къоруулау министрни орунбасары Елена Романова, республиканы Курортла эм туризм жаны бла министерствону бёлюмню башчысы Отарланы Махти айтхандыла.
Бу магъаналы компанияны тынгылы бардырыуну юсюнден оюмларын КъМР-де МВД-ны, МЧС-ни КъМР-де Баш управлениясыны келечилери билдиргендиле. «Шхельда» турист базаны таматасы Темуккуланы Артур, «Эльбрустурист», «Каббалктурист», «Курорт Нальчик» акционер обществоланы директорлары Непеланы Къурман, Алик Карданов бла Хасанби Афов а, ишлерини юсюнден билдире, комиссия туура этген кемчиликлени биринчи июньнга дери кетерликлерине ышандыргъандыла.
Ахырында Марат Хубиев бла Светлана Тлинова сабийлени солууларын тынгылы къурау эм магъаналы борч болгъанын, аны ючюн жууаплы болгъанладан къаты сураллыгъын эсгертгендиле. «Бу жумушубуз тынгылы толтуруллугъуна ийнанама. Аны ючюн а оноучудан башлап юй тюп сыйпаучугъа дери да ишине уллу жууаплылыкъ бла къараргъа керекди», – дегенди вице-премьер.
