«Эксперт утыку зэIуха: хьэрычэтыщIэ жэрдэмыр, финанс щIэныгъэр, бжыгъэрылъанэ есэныгъэхэмрэ зэфIэкIхэмрэ» - аращ Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым иджыблагъэ щекIуэкIа щIэныгъэ зэхуэсым зэреджэр. Ар къызэрагъэпэщащ Къэбэрдей-Балъкъэр къэрал университетым хуитыныгъэхэмкIэ, экономикэмрэ финанс IуэхухэмкIэ и институтым хэт Экономикэмрэ цIыху хуитыныгъэхэмрэ эксперт хуэIухуэщIэхэр ещIылIэнымкIэ центрым, Къэбэрдей-Балъкъэрым экономикэ зыужьыныгъэмкIэ и министерствэм.
Зэхуэсым къекIуэлIахэм пэублэ псалъэкIэ захуигъэзащ КъБР-м экономикэ зыужьыныгъэмкIэ и министр Рахаев Борис. «Ди жылагъуэм щхьэхуэу къыхэгъэщын хуей цIыху гупщ хьэрычэтыщIэхэр, - жиIащ абы, - сыт щхьэкIэ жыпIэмэ ахэращ цIыхухэр лэжьыгъэкIэ къызэзыгъэпэщри, зыпэрыт IэнатIэм ехьэлIауэ щIэуэ къэунэхухэр абы хэзыпщэри, щIыналъэ экономикэм зиIэтыным зи IыхьэфI хэлъри. Дунейр зэщIэзыщта пандемием и ягъэкIэ хьэрычэтыщIэхэм нобэ хэщIыныгъэшхуэ ягъуэт, экономикэм игъуэт зэхъуэкIыныгъэхэм зыдагъэшын хуейуэ щытыкIэ зэмылIэужьыгъуэхэм йоувэ. Гугъу ехьыр IуэхущIапIэшхуэ зиIэ, цIыху куэд зыгъэлажьэ бизнесым и закъуэкъым, вакъэ зэвым итщ ику ит бизнес IэнатIэри, зэрыхуа архъуанэм къикIыну хэтщ бизнес нэхъ цIыкIум пылъхэри. Си щхьэкIэ Къэбэрдей-Балъкъэр къэрал университетым фIыщIэшхуэ хуэсщIыну сыхуейт мы зэхуэсыр къызэгъэпэщыныр гукъэкI зэрищIам папщIэ. Дэ дыхуэныкъуэщ щIыналъэр зэрыт экономикэ щытыкIэ гугъум къыхэша хъун папщIэ IэщIагъэлIхэмрэ Iуэхум куууэ хэзыщIыкIхэмрэ я псалъэм. Хьэкъыуи си фIэщ мэхъу нобэ екIуэкIыну псалъэмакъым акъыл къызыхэтхын, фIэкIыпIэ имыIэу гу зылъыдигъэтэн гупсысэхэр зэрыщыIунур, ахэр хьэрычэтыщIэ IэнатIэм хэзыпщэн Iуэху еплъыкIэ пыухыкIахэр ди пащхьэ къызэрыралъхьэнур. Iуэху псынщIэ щыIэкъым. Сыт хуэдэ лэжьыгъэри сыт щыгъуи егъэфIэкIуэн, зегъэужьын хуейуэ пщэрылъ диIэщ. Апхуэдэу щыщыткIэ, дапщэщи хэкIыпIэ къэтлъыхъуэурэщ, ахэр зэпэтшачэурэщ, гупсысэкIэхэм ящыщу фIым я фIыжыр Iуэхум хэтлъхьэурэщ ди экономикэми ди жылагъуэ псэукIэми зэрызедгъэужьыфынур. ЩIэныгъэ зэхуэсым къекIуэлIахэми и гуащIэ хэзылъхьэнухэми псалъэмакъ купщIафIэрэ лэжьыгъэфIрэ ефхьэкIыну сынывохъуэхъу».
КъБКъУ-м щIэныгъэ-къэхутэныгъэ лэжьыгъэхэмкIэ и проректор Хьэшыр Светланэ къыхигъэщащ щIэныгъэ зэхуэсым мыхьэнэшхуэ зэриIэр, ар игъуэу зэхэша зэрыхъуар, ди щIыналъэм щызэфIэува экономикэ щытыкIэр гъуэгу пэж тегъэувэн и IуэхукIэ акъыл зыхэлъ псалъэ, къэхутэныгъэ куухэр езыгъэкIуэкIа щIэныгъэлIхэмрэ хьэрычэтыщIэхэмрэ къызэрырихьэлIам ар лъагэу зэриIэтыр. «Си гуапэу къыхэзгъэщыну сыхуейт нобэрей щIэнIуатэм и лэжьыгъэм ди аспирантхэмрэ студентхэмрэ зэрыхэтри. Ахэращ ди къэкIуэнур, ди щIыналъэм и зыужьыныгъэр зи IэмыщIэ илъыр. ЩIалэгъуалэм утыку кърахьа проектхэмрэ къэхутэныгъэхэмрэ сриплъати, сымыгъэщIэгъуэн слъэкIакъым абыхэм яхэлъ щIэщыгъуагъэр. Фи фIэщ зэрыхъун, хуэдэ къэгъуэтыгъуейуи гъэщIэгъуэну зэхэлъкIэ ахэр. Псори дыщыгъуазэщ ди гъащIэм щIэуэ къежьа дэтхэнэ зы жэрдэмри гугъусыгъу пылъу фIэкIа псынщIэу зэрытхухэмыпщэм. Мис а лъэпощхьэпохэр къызэнэкIыным, экономикэм псынщIэу зиужьыным хуэгъэзащ ди зэхуэсри, сыщогугъ ар пщIэншэ мыхъуну, фызытепсэлъыхьыну Iуэхугъуэхэми гъуэгу ягъуэтыну», - жиIащпроректорым.
ЩIэнIуатэм кърихьэлIащ экономикэ, биологие, химие щIэныгъэхэм я докторхэр, щIэныгъэ-къэхутакIуэ центрхэм я лэжьакIуэхэр, хьэрычэтыщIэхэр, егъэджакIуэхэр, аспирантхэмрэ студентхэмрэ. IэщIагъэлIхэм я псалъэмакъыр теухуат щIыналъэм жылагъуэ-экономикэ я лъэныкъуэкIэ зиужьын икIи зиIэтын папщIэ эксперт-къэхутакIуэ центрхэм узыфIэмыкIыжын мыхьэнэ зэраIэм, жылагъуэ зэхущытыкIэхэмрэ псэукIэмрэ езыгъэфIэкIуэфын къэхутэныгъэ шэщIахэр егъэкIуэкIын, финанс хуэIухуэщIэхэмкIэ лъахэм езым и «нэгурэ» уней щыхьэтыгъэрэ иIэжын Кавказ Ищхъэрэм хыхьэ щIыналъэхэм я экономикэр зэзылъыт-зэзыгъапщэ лэжьыгъэхэр Iэмалыншэу къыхэлъхьэн икIи зэфIэгъэкIын зэрыхуейм. ИкIэм-икIэжым, псори зыхуэкIуэжыр зыт - бизнесым зиужьыныр щIыналъэхэм я жылагъуэ-экономикэ «узыншагъэм» зэрелъытарт.
ЩIэнIуатэм ипкъ иткIэ Экономикэмрэ цIыху хуитыныгъэхэмрэ эксперт хуэIухуэщIэхэр ещIылIэнымкIэ, ЩIыналъэм унафэр щызехьэнымрэ экономикэ щэнхабзэмкIэ центрхэм я «Эксперт къэхутакIуэ», «Колумб» студент хасэхэм утыку кърахьа проектхэм IэщIагъэлIхэмрэ щIэныгъэлIхэмрэ хэплъащ, фIыуэ хэлъхэмрэ щыщIэныгъэу далъэгъуахэмрэ зэпашачэу псалъэмакъ екIу ирагъэкIуэкIащ. Проектхэм яхэтащ дыкъэзыухъуреихь дунейр хъумэным, мэкъумэш IэнатIэм зегъэужьыным, туризм хуэIухуэщIэхэм зегъэубгъуным ехьэлIахэр. Къыхэгъэщыпхъэщ Iэнэ хъурейхэм, проект гъэлъэгъуэныгъэхэм, щIэныгъэ онлайн-гъэлъэгъуапIэхэм я утыку илъа проектхэм гъащIэ яIэу, бизнес-проектышхуэхэм хэухуэнапхъэу щIэныгъэлIхэм къызэралъытар, къинэмыщI абыхэм ящыщ гуэрхэр зи лэжьыгъэм хэзыпщэну гукъыдэж зыщIа хьэрычэтыщIэхэм къахэкIащ.
Урысей Федерацэм дызэрыт илъэсыр ЩIэныгъэмрэ технологиехэмрэ я илъэсу къилъытащ, щIэныгъэ зэхуэсри абы ипкъ итущ зэрекIуэкIар.