Накъыгъэм и 21-м УФ-м Хамэ къэрал IуэхухэмкIэ и министерствэм и лэ­жьакIуэ Захаровэ Марие иригъэкIуэкIа брифингым адыгэхэм я гугъу щи­щIащ.УпщIэ - жэуап жыпхъэм иту екIуэкIа зэIущIэм щхьэу­сыгъуэ хуэхъуар Тырку Республикэм Хамэ къэрал Iуэ­хухэмкIэ и министерствэм и лIыкIуэ Билгич Танжу кърым тэтэрхэр я хэкум щрагъэкIа махуэм, накъыгъэм и 18-м, ирихьэлIэу игъэIуа утыку псалъэрщ. Анкара щыщ политикым и къэпсэлъэныгъэм адыгэхэм я лъэпкъгъэ­кIуэд-ри къыщыхигъэщащ.
«Дэ кърым тэтэрхэми Кавказ Ищхъэрэм ис лъэпкъхэ-ми яшэча бэлыхьым щхьэкIэ дахуогузавэ, - жиIащ Билгич Танжу. - Илъэси 157-рэ ипэкIэ Урысей пащтыхьыгъуэм, кавказ лъэпкъхэр щыпсэу я щIыналъэм ебгъэрыкIуэри, я щIыр къатрихауэ щытащ. Хэ­щIыныгъэ абрагъуэр яшэчу, а гузэвэгъуэм хиубыдахэр Анадолэм къэIэпхъуэн хуей ­хъуащ. А гуауэращ адыгэхэм накъыгъэм и 21-м ягу къагъэкIыжыр».
Билгич Танжу и псалъэхэр къызэрыщыхъуамкIэ къеуп­щIа журналистым Захаровэ Марие жэуап иритащ:
«Тырку Республикэм игъэIу апхуэдэ къэпсэлъэныгъэхэр дэ политикэ фейдэ къыщалъыхъуэ къаугъэ къэгъэхъеипIэу къыдолъытэ. Дэ гу лъыдотэ Анкара илъэс къэс лъэпкъ цIыкIухэм я гукъеуэ­хэр езым и Iуэху дигъэкIын пап­щIэ къигъэщхьэпэну зэ­ры­хэтым. XIX лIэщIыгъуэм кърым тэтэрхэмрэ Кавказ Ищхъэрэм ис лъэпкъхэмрэ къащыщIам а псалъэ ды­къуакъуэхэр щыхьэт яхуэхъуркъым».
«И щIыналъэм зыхуей хуэ­мызауэ бзэ, дин, лъэпкъ цIыкIу Iуэху зэхэзэрыхьа куэд зэрилъыр зыщIэжыпхъэ Тыркум лъэпкъ цIыкIухэм къащхьэщыжыну мурад къабзэ къызыкъуиха хуэдэу зыкъызэригъэлъагъуэр фIэщ щIыгъуейщ, - пещэ адэкIэ Захаровэм. - ИлъэсипщI зыбжанэ къудейкIэ узэIэбэ­кIыж­мэ, Тыркум щыпсэу шэрджэс­хэр зэрыадыгэр жаIэнуи я бзэ­кIэ псэлъэнуи хуимыту щытащ».
«Тыркум лъэпкъ цIыкIухэм я гукъеуэр и политикэ IуэхукIэ къимыгъэсэбэпмэ зэрынэхъыфIыр езыми къыгу­ры­Iуэжыну дыщогугъ», - иухащ дипломатым и псалъэр.