КъБР-м и Iэтащхьэ КIуэкIуэ Казбек накъыгъэм и 27-м хэтащ Урысей Фе­дерацэм и Правительствэм щIыналъэ зыу­жьыныгъэмкIэ и комиссэм и президиумымрэ УФ-м Ухуэныгъэмрэ псэупIэ-коммунальнэ хозяйствэмкIэ и министерствэм и коллегиемрэ я зэIущIэм. Ар иригъэкIуэкIащ Урысейм и вице-премьер Хуснуллин Марат.
ЗэIущIэр екIуэкIащ селектор зэпы­щIэ­ныгъэ мардэм тету. Абы хэтащ Урысейм ухуэныгъэмрэ псэупIэ-коммунальнэ хозяйствэмкIэ и министр Файзуллин Ирек, УФ-м Ухуэныгъэмрэ псэупIэ-коммунальнэ хозяйствэмкIэ и министерствэм къегъэ­щIылIауэ лажьэ Жылагъуэ советым и тхьэмадэ Степашин Сергей, Къэ­зыбж ­палатэм и къэпщытакIуэ Орловэ Светланэ, коллегием щыщхэр.
«Кризис лъэхъэнэм щхьэкIи къэ­мынэу, ухуэ­ныгъэ IэнатIэм 2020 гъэм ехъулIэныгъэфIхэр зыIэригъэхьащ. Ухуэныгъэу ирагъэкIуэкIыр нэхъ мащIэ хъуа­къым Президентым и дэIэпыкъуныгъэм­рэ къащта программэхэмрэ я фIыгъэкIэ. Илъэс кIуам псэупIэу ятар 2019 гъэм яхузэфIэкIахэм щIигъуащ икIи метр зэбгъузэнатIэ мелуан 82,2-рэ хъуащ. 2021 гъэм къытпэщыт къалэнхэм ящыщу нэхъ къыхэзгъэщыну сыхуейщ инфраструктурэм зегъэужьыныр. «Инфраструктурное меню» зыфIаща Iуэхум и фIыгъэкIэ щIыналъэ­хэм Iэмал ягъуэтынущ инфраструктурэ проект инхэр зэрыпхагъэкIын дэIэпы­къуныгъэ къыдахыну», - къыхигъэщащ Урысей Федерацэм и Правитель­ствэм и УнафэщIым и къуэдзэ Хуснуллин Марат.
УФ-м ухуэныгъэмрэ псэупIэ-комму­нальнэ хозяйствэмкIэ и министр Файзул­-лин Ирек къыщыпсалъэм зэхилъхьэжащ 2020 гъэмрэ 2021 гъэм и япэ мазищымрэ зэфIагъэкIа лэжьыгъэхэр, апхуэдэуи ­ухуэ­ныгъэ IэнатIэмрэ псэупIэ-коммуналь­нэ комплексымрэ зэрызрагъэужьыну я мурадхэми къытеувыIащ. Абы къыхигъэщащ къэралым и Президентым цIыхухэр жьы дыдэ хъуа псэупIэхэм къыщIэгъэIэпхъукIыным гулъытэшхуэ зэрыхуищIыр. 2020 гъэм апхуэдэ унэхэм къыщIагъэкIащ цIыху мини 128-м щIигъу икIи псэупIэ ­метр зэбгъузэнатIэ мелуанитIым щIигъум ахэр ягъэIэпхъуащ.
УФ-м Ухуэныгъэмрэ ЖКХ-мкIэ и ми­нистерствэм пещэ къэрал проектхэм щыгъэбелджыла къалэнхэр гъэзэщIэным хуэунэтIа Iуэхухэм.
Къэбэрдей-Балъкъэрым 2021 гъэм лэжьыгъэшхуэ щокIуэкI «ПсэупIэмрэ къалэ кIуэцIым и зэIузэпэщыгъэмрэ» проектым хыхьэу. Абы щыщщ 2017 гъэм и щIы­шы­лэм и 1-м и пэ къихуэу кхъахэ хъуауэ къалъыта унэхэм щIэсхэр а псэупIэхэм къы­щIэгъэIэпхъукIыным хуэунэтIа программэр и пIалъэр къэмысу зэрагъэзэщIар. Дызэрыт илъэсым жьы хъуа унэ метр ­зэбгъузэнатIэ мин 13-м щIигъум щыпсэу­хэр къыщIагъэIэпхъукIыну я гугъэщ, ап­хуэдэ щIыкIэкIэ псэупIэхэр иратынущ цIыху 788-м.
ПсэупIэ ухуэн IэнатIэм дызэрыт илъэ­сым метр зэбгъузэнатIэ мин 513-рэ щатыну я мурадщ, мы гъэм и япэ мазищым хьэзыр ящIащ метр зэбгъузэнатIэ мин 41,5-рэ. Ар илъэс кIуам а пIалъэм ­ирихьэлIэу яхузэфIэкIам нэхърэ процент 11,3-кIэ нэхъыбэщ. Къалэм тыншыпIэхэр къы­щызэгъэпэщыным хуэгъэза проектым ипкъ иткIэ муниципальнэ зэгухьэныгъэ 40-м цIыху зэхуэсыпIэу 32-рэ, фэтэр куэду зэхэт унэхэм я пщIантIэу 89-рэ зэIузэпэщ щащIыну я мурадщ.
«Псы къабзэ» проектым хыхьэу жылэ­хэм псы шэным, къагъэсэбэпахэр къыIу­шыным теухуа лэжьыгъэхэр мы зэманым объект 18-м щокIуэкI, иджыри зы объектым теухуа зэгурыIуэныгъэр зэращIы­лIэну ягъэхьэзыр. Абы нэмыщI, цIыху­хэр псыкIэ къызэгъэпэщыным хуэгъэпса ­объектхэм я проектхэр зэхэлъхьэным ­трагъэкIуэдэн папщIэ муниципальнэ ­зэгухьэныгъэхэм хухахащ сом мелуан 47-рэ.