Тюнене КъМР-ни Правительствосуну юйюнде Къабарты-Малкъарны Башчысыны къуллугъун болжаллы халда толтургъан Казбек Коков  окъууда бийик жетишимле болдургъан, битеуроссей эмда регион олимпиадалада, спорт эришиуледе хорлагъан эмда алчы жерлени алгъан школчулагъа паспортланы бергенди.
Россейни инсаны болуу – ол уллу намысды, аны бла бирге уа уллу да борчду, деп чертгенди  республиканы оноучусу.  «Жашауугъузда баш магъаналы документни алгъаныгъыз аламат кюннге –Россей Федерацияны Конституциясы къабыл кёрюлгенли 25-жыллыгъына – тюшгенди. Къыралыбызны Баш Законуна шёндюгю Россейни  къыраллыгъыны  магъаналы жорукълары киредиле, бек багъалыгъа уа адам, аны праволары бла эркинликлери саналадыла.
Ата журтубузну келир заманы сизсиз. Жашауугъузда къаллай жолну сайласагъыз да, туугъан жеригизге кертичилей къалыгъыз, тамата тёлюден къалгъан хазналаны багъалагъыз, окъууда, ишде да жетишимле болдуруп, республикабызны, деменнгили къыралыбызны байлыкъларын керелегиз, сыйларын кётюрюгюз»,-дегенди Казбек Коков.
Школчуланы тилеклери бла регионну оноучусу алагъа Правительствону юйюн кёргюзтгенди. Артда уа бирге чай да ичгендиле. Ол заманда жаш адамла кеслерини муратларыны, сейирлерини, келир заманнга планларыны юслеринден айтхандыла. Ахырында Казбек Валерьевич келгенлени алгъышлагъанды, бютюн уллу жетишимле, саулукъ, насып да тежегенди эмда эсде къалырча саугъала бергенди.