КъМР-ни Профсоюзларыны юйюнде Ата журтну Жигитлерини кюнюне аталгъан байрам болгъанды. Анга урушну, урунууну да ветеранлары чакъырылгъандыла. Тюбешиуню республикалы профсоюзла бла ветеран организация къурагъандыла. Жыйылгъанланы алгъышларгъа КъМР-ни Парламентини Председателини орунбасары Жанатайланы Салим, «Къабарты-Малкъарны профсоюз организацияларыны биригиую» союзну таматасы Фатимат Амшокова, КъМР-ни граждан обществону институтлары бла байламлыкъла жюрютюу эмда миллетлени ишлери жаны бла министр Анзор Курашинов, дагъыда башхала келгендиле.
Чачларын заман агъартхан, кёкюреклеринде уа алтын жулдузла, Махтаулукъну орденлери да жылтырагъан акъсакъаллагъа бла тиширыулагъа ветеран организацияны таматасы Мухамед Шихабахов, Жанатайланы Салим, Фатимат Амшокова да босагъада жарыкъ тюбегендиле.
- Халкъларыбызда ётгюр, жигер,акъыллы адамлагъа не заманда да уллу хурмет этилгенди. Кюйсюз урушда кишилик,батырлыкъ да кёргюзтгенле, артда да жигер уруннганлары бла къыралны айныууна юлюшлерин къошханла, жарсыугъа, аздан-аз бола барадыла. Бизни борчубуз - аланы унутмауду, келир тёлюле да эсде тутарча этиудю.
Тюбешиуге кадет школ-интернатланы курсантлары да келгендиле. Аланы араларында Ата журтну махтаулу жашларына бла къызларына аталып бир жыл мындан алгъа бардырылгъан «Эсибиздеди, ёхтемленебиз, сакълайбыз» деген республикалы конкурсда хорлагъанла да бар эдиле.
Кадетле ол эришиулеге 700 иш жибергендиле, аладан жаланда жетиси сайланнганды. Биринчи, экинчи, ючюнчю жерлени алгъанлагъа дипломларын, саугъаларын, къалгъанлагъа уа сертификатларын да Социалист Урунууну Жигитлери Моллаланы Шарафутдин, Уммайланы Фазика, Чыгырланы Шамкъыз, Махтаулукъну юч орденини иеси Газаланы Исмайыл, Уллу Ата журт урушну ветеранлары Нина Герасименко, Николай Романенко бергендиле.
Фатимат Амшокова уа, ветеранлагъа кёз-къулакъ бола, алагъа не жаны бла да эс тапдыргъаны ючюн РФ-ни Урушну эм урунууну ветеранларыны ара советини ыспасына тийишли болгъанды.Акъсакъалланы, жаш адамланы да Жанатайланы Салим, Анзор Курашинов, культурада ишлегенлени профсоюзларыны рескомуну председатели Марьяна Даова да алгъышлагъандыла.
Быллай тюбешиуле ёсюп келген тёлюлеге бек керек болгъанларын айырып айтхандыла, абаданланы насийхатлары уа аланы эслеринде иги кесек заманнга къаллыкъларына ышаннганларын да билдиргендиле. Кадетле уа ата-бабаланы жигитликлерине кертичи боллукъларына ант этгендиле.
Жырчыла Ирина Даурова, Али Ташло, Оксана Хакулова, Азамат Ивазов а къабарты, малкъар, орус, испан тилледе жырла айтып, той-оюн да къурап, келгенлени эрикдирмей тургъандыла.
Аланы унутмагъанлары, былай уллу сый бергенлери ючюн Чыгырланы Шамкъыз, Нина Герасименко, башхала да жюрек ыразылыкъларын билдиргендиле. Байрам бошалгъандан сора хар ветеранны саугъала берип юйлерине алай ашыргъандыла.
