Бу кюнледе КъМР-ни Жарыкъландырыу, илму эмда жаш тёлюню ишлери жаны бла министерствосунда 2020-2021 окъуу жылда школчуланы битеуроссей олимпиадаларыны регион кезиулеринде хорлагъанланы эмда ахыр кесеклеринде алчы жерлеге тийишли болгъанланы, аланы хазырлагъан устазланы, окъуу юйлени таматаларын да саугъалау бардырылгъанды. Анга жораланнган жыйылыугъа КъМР-ни Правительствосуну Председателини орунбасары Марат Хубиев, билим бериуде бла илмуда ишлегенлени профсоюзларыны рескомуну председатели Сергей Карныш къатышхандыла.
Окъуучуланы, устазланы, ата-аналаны да КъМР-ни жарыкъландырыу, илму эмда жаш тёлюню ишлери жаны бла министри Анзор Езаов алгъышлагъанды. «Бюгюн бери келген школчула республиканы алтын хазнасыдыла. Ма сизге кёре боллукъду тамбла билим бериуюбюзню эмда илмубузну даражасы», - деп, министр быллай шартланы туура этгенди: быйыл олимпиадаланы школ, муниципал, регион эмда федерал кезиулеринде 49 адам хорлагъанды эмда 154-сю экинчи, ючюнчю жерлеге чыкъгъандыла.
Марат Хубиев а бек алгъа айырма окъуучуланы хазырлагъан устазлагъа эмда адепли сабийле ёсдюрген ата-аналагъа ыспас этгенин билдиргенди. Сора, школчулагъа айланып: «Бизни таянчагъыбыз ма сизсиз. Сизничаладан къуралады республиканы билим хазнасы. Хар биригиз да, гитче болса да, хорлам болдургъансыз, мындан ары да жашауугъузда бийикден бийик ёрлей барырыгъызны тежейме», - дегенди эмда КъМР-ни Башчысы Казбек Коков кесини Посланиясында берген буйрукъгъа кёре, быйылдан башлап битеуроссей олимпиадалада хорлагъанлагъа эмда аланы устазларына 50-мингишер сом бериллигин да эсге салгъанды.
Андан сора хычыуун жумуш башланнганды. Марат Хубиев, Анзор Езаов, Сергей Карныш 2020-2021 окъуу жыллада мектепчилени араларында тюрлю-тюрлю эришиуледе хорлагъанлагъа саугъала, грамотала, гюл къысымла бергендиле. Ала бла бирге устазлары, мектеплени директорлары да белгиленнгендиле.
Биринчиле болуп арагъа Сабий чыгъармачылыкъны «Кюн шахар» академиясындан 11-чи классны окъуучусу Азамат Карданов, аны математикадан устазы Айшаланы Кязим, окъуу юйню директору Жаппуланы Тамара чакъырыладыла. Биринчи сагъынылгъан школчуланы араларында математикадан битеуроссей олимпиаданы регион кесегинде хорлагъанды, ахыр кезиуюнде уа алчы жерледен бирине тюшгенди. Аллай жетишим а кёп жылладан бери биринчи кере болдурулгъанды.
Аны ызындан сахнагъа Нальчикде А.С.Пушкин атлы 5-чи номерли школну 11-чи классыны окъуучусу Салима Далова, аны устазлары Абубачир Хацуков бла Андрей Щипилов, окъуу юйню директору Светлана Емузова чыгъадыла. Салима школчуланы араларында ОБЖ-дан битеуроссей олимпиаданы регион кесегинде хорлагъанды, ахыр кезиуюнде уа алчы жерледен бирине чыкъгъанды. Башда атлары айтылгъан окъуучула, аланы устазлары да 50-шер минг сом къоллу болгъандыла.
Саугъаланнганланы араларында «Кюн шахардан», Нальчикни, Бахсанны, Тырныауузну, Баксанёнок, Аушигер, Урван эллени да школларыны окъуучулары болгъандыла. Дагъыда Нальчикде 21-чи номерли мектепни директору Къазакъланы Зухураны, Тырныауузда 3-чю номерли мектепни таматасы Хутуйланы Любаны, математикадан, биологиядан, физкультурадан, орус тилден бла литературадан, ана тилледен , химиядан, физикадан, технологиядан устазла Айшаланы Кязимни, Ёзденланы Зейжанны, Хачаланы Светлананы, Ностуланы Сакинатны, Мызыланы Ларисаны, Элбайланы Ханифаны, Гузиланы Хусейни, дагъыда кёп башхаланы атлары махтау бла айтылгъанды.
Былайда энчи чертип айтыргъа тийишлиди, школчуланы араларында бардырылгъан олимпиаданы битеуроссей кезиуюне къатышып, хорлам болдургъанла къайсы предметден жетишимли болгъан эселе да, андан къырал экзаменни бермейдиле эмда ол профильге кёре бийик окъуу юйге экзаменсиз киредиле. Быйыл аллай эркинликге Азамат Карданов бла Салима Далова тийишли болгъандыла.
