Тюнене КъМР-ни Башчысы Казбек Коков бла «Россети Северный Кавказ» компанияны генеральный директоруну къуллугъун толтургъан Роман Левченко ишчи тюбешиу бардыргъандыла. Аны кезиуюнде республиканы оноучусу эки жанлы бирге ишлеу бек магъаналы болгъанын чертип айтханды.
-Республикада жашагъанланы электроэнергия бла чырмаусуз жалчытыу бизни бирге ишлеуюбюзню баш муратыды. Байламлыгъыбыз хайырлы болгъанын заман кёргюзтгенди. Биз бу ишибиз мындан ары да алай барлыгъына ышанабыз. Дагъыда бу бёлюмде инвестиция проектле бардырыргъа хазырбыз,-дегенди Казбек Коков.
Тюбешиуде ток бла ышаннгылы жалчытыугъа энчи эс бурулгъанды. Жангыртыу ишлеге быйыл 265 миллион сом бёлюнюрюкдю. Ол а былтырдан 28 процентге асламды. Бюгюнлюкде ток ызланы 11 километрден асламына, 10 трансформаторгъа бла 20 подстанциягъа ремонт этилгенди.
Роман Левченко Къабарты-Малкъарда хайырланылгъан ток ючюн хакъ тёлеу ахшы къуралгъанын белгилегенди эмда регионну башчысына жюрек ыразылыгъын билдиргенди. Аны бла бирге ЖКХ-ны предприятиялары жыйышдыргъан борчну жабыуну амаллары сюзюлгендиле, аны ючюн бирге мадарла этерге, ол санда оноуну къыйматын кётюрюрге, келишгендиле.