ПщIэ зыхуэсщI депутатхэ, си лэжьэгъухэ! Си лъахэгъу лъапIэхэ!
Къэбэрдей-Балъкъэр Республикэм и Конституцэм щыубзыхуа полномочиехэм япкъ иткIэ сэ, гъэ къэси хуэдэу, нобэ зыфхузогъазэ республикэм щыщыIэ щытыкIэм, 2021 гъэм, апхуэдэу къэкIуэну зэман мыжыжьэм едгъэкIуэкIыну политикэм и унэтIыныгъэ нэхъыщхьэхэм ятеухуауэ.
БлэкIа илъэсым сыщытепсэлъыхькIэ, ди псэукIэм куэдкIэ къыжьэхэуа пандемием къыщыщIэдзапхъэу къызолъытэ.
Ди къэралым, зэрыщыту дуней псом, къажьэхэуащ япэм дызыщымыгъуэза икIи икъукIэ шынагъуэу щыт уз зэрыцIалэр. Пандемиер ди республикэм и дежкIэ гъэунэхуныгъэ хьэлъэу уващ.
ПсынщIэу унафэ тэмэмхэр къащтэн папщIэ къэралым и Президентым Урысей Федерацэм и субъектхэм къулыкъу нэхъыщхьэ дыдэхэр щызыIыгъхэм я полномочиехэм хигъэхъуащ.
Республикэм и оперативнэ штаб къызэрагъэпэщащ.
Ди щIыналъэм щыщыIэ щытыкIэм жэщми махуэми дыкIэлъыплъын икIи зыхуэфащэ унафэхэр икIэщIыпIэкIэ къэтщтэн хуей хъуащ.
Япэ махуэхэм щегъэжьауэ дэ цIыхухэр къызэтедгъэнэн, гузэвэгъуэшхуэхэр къэдмыгъэхъун папщIэ тхузэфIэкI псори длэжьащ. Сымаджэщхэр уз шынагъуэм зэрыпэщIэтыным икIэщIыпIэкIэ хуагъэхьэзыращ. IуэхущIапIэу 9-м сымаджэу 1850-м щIигъум щеIэзэн папщIэ зыхуеину Iэмалхэр щызэтрагъэуващ. А зэманым Федеральнэ оперативнэ штабым иубзыхуа мардэм ипкъ иткIэ цIыху минитI къэс хуэзэу зы гъуэлъыпIэ (псори зэхэту гъуэлъыпIэ 450-рэ) коронавирус зэуалIэхэм папщIэ щыIэн хуейуэ арат. Ауэ дызэрыхуа щытыкIэр къэтлъытэри, дэ гъуэлъыпIэ минитI хуэдиз дгъэхьэзыращ икIи абы и фIыщIэкIэ сымаджэщхэр Iуэхум пэлъэщащ.
А псоми къадэкIуэу, уз зэрыцIалэ нэхъ шынагъуэхэм щеIэзэ сымаджэщхэм яхуримыкъу рентген, реанимацэ, лабораторэ, диагностикэ, къинэмыщI Iэмэпсымэхэр, медицинэм и лэжьакIуэхэм узым зэрызыщахъумэну щыгъыныгъуэхэр, зыхуеину адрей материалхэр къащэхуащ.
Зэрыщыту къапщтэмэ, сом мелуан 748-рэ трагъэкIуадэри, сымаджэщхэм медицинэ Iэмэпсымэ зэмылIэужьыгъуэу минрэ щитхурэ хуэдиз къыхуащэхуащ.
Медицинэм и лэжьакIуэхэр Iуэхум трагъэгушхуэн папщIэ улахуэхэм я лейуэ сом мелард 1,6-рэ хухахащ, а ахъшэм щыщу сом мелуан 537-рэ республикэ бюджетым къызэригъэпэщащ. Абы къыщымынэу, медицинэм и лэжьакIуэхэм я лэжьапщIэм дэ щIыналъэм и ахъшэ яхущIыдгъуу щIэддзащ зыкъомкIэ нэхъ пасэу, мэлыжьыхь мазэм щегъэжьауэ.
Дэ дащыщщ къэралым и щIыналъэхэм ящыщу амбулаторэхэм щагъэхъуж сымаджэхэм япэу хущхъуэхэр пщIэншэу яхуэзыутIыпщу щIэзыдзахэм.
ЯпэщIыкIэ информацэмкIэ центр зэтрагъэуващ, иужькIэ ар колл-центрхэм хуагъэкIуэжри, абыхэм сымаджэхэм япыщIауэ щытыныр къызэрагъэпэщащ.
ЛэжьэкIэщIэр зэтраухуэри, дохутырхэм уз зэрыцIалэр зэуэлIахэр КТ-къэпщытэныгъэхэм къагъэлъэгъуахэм япкъ иткIэ сымаджэщхэм тэмэму трагуашэу щIадзащ.
Медицинэ дэIэпыкъуныгъэ псынщIэм папщIэ машинэ 28-рэ къащэхуащ, абыхэм реанимобиль 11 яхэту. Апхуэдэу поликлиникэхэм я дохутырхэм папщIэ автомашинэ 24-рэ къаIэрыхьащ.
ЯпэкIэ зэи къэмыхъуауэ, цIыхухэм, псом хуэмыдэу сабий зиIэ унагъуэхэм, социальнэ дэIэпыкъуныгъэшхуэ иратащ.
Къэгъэлъэгъуапхъэщ республикэм и оперативнэ штабым щытыкIэм зэрызихъуэжым елъытауэ Iуэхухэр IэкIуэлъакIуэу зэрызэфIигъэкIар.
Зэман мытыншым икъукIэ тэмэму зыкъагъэлъэгъуащ медицинэм и лэжьакIуэхэм. Ахэр коронавирус уз зэрыцIалэм ебэнынымкIэ япэ итащ икIи гугъуехьышхуэ зыпылъ лъэхъэнэр къызэранэкIын папщIэ щIэныгъэ нэс, IэщIагъэ, лIыгъэ, ерыщагъэ зэраIэр наIуэ къащIащ.
Нобэ сэ абыхэм аргуэру зэ фIыщIэ ин яхузощI икIи си щхьэр лъахъшэу яхузогъэщхъ.
Щхьэхуэу къыхэзгъэщыну сыхуейщ щэхуакIуэхэм я хуитыныгъэхэм къащхьэщыжынымрэ цIыхум зэIузэпэщ псэукIэ иIэнымкIэ IэнатIэм щыкIэлъыплъынымкIэ федеральнэ къулыкъущIапIэм и Управленэу щIыналъэм щыIэм и лэжьакIуэхэм я IэкIуэлъа-кIуагъэр, жыджэрагъыр. Абыхэм узыфэр зэхэгъэкIынымрэ тестхэр къэгъэсэбэпынымкIэ лэжьыгъэмрэ гъэхуауэ къызэрагъэпэщащ.
Я Iуэхур тыншу щымытами, зэфIэкI хъарзынэ къызэкъуахащ социальнэ IуэхущIапIэхэмрэ IэнатIэхэмрэ я лэжьакIуэхэми. Зэрыщыту къапщтэмэ, ахэр пэлъэщащ къыкъуэкIа къалэныщIэхэм. ИщхьэкIэ къыщыгъэлъэгъуа IуэхущIапIэхэмрэ ведомствэхэмрэ я лэжьакIуэхэм яхуэфащэу иратащ Урысей Федерацэм и дамыгъэ лъапIэхэр. Президентым и УказкIэ ди щIыналъэм щыщу наградэхэр зыхуагъэфэщахэр цIыху 53-рэ мэхъу.
Iуэху гугъум тэмэму зэрыпэрытам папщIэ фIыщIэ ин яхузощI ди егъэджакIуэхэм, колледжхэмрэ вузхэмрэ я лэжьакIуэхэм. Зэман кIэщIым къриубыдэу еджапIэхэм щызэтрагъэуващ сабийхэм унэм щIэсу щIэныгъэ етыныр. А Iуэху мытыншым екIуу елэжьащ Къэбэрдей-Балъкъэрым и педагогхэр.
ЦIыхухэм я шынагъуэншагъэр къызэгъэпэщынымкIэ, санитар-эпидемиологие мардэхэмрэ мардэ пыухыкIахэмрэ гъэзэщIэнымкIэ дэIэпыкъуэгъу нэс хъуащ хабзэхъумэ органхэм я лэжьакIуэхэр.
ДэIэпыкъуэгъу нэхъ хуэныкъуэхэм и зэманым зыщIагъэкъуащ волонтерхэмрэ бизнес IэнатIэм и лэжьакIуэ-хэмрэ ящыщу щэ бжыгъэхэм икIи «Дэ дызэгъусэщ» урысейпсо Iуэхум хиубыдэу абыхэм нэхъ хуэмыщIахэр, щхьэзакъуэу къэна жьыкIэфэкIэхэр, ныкъуэдыкъуэхэр хущхъуэхэмкIэ, ерыскъыпхъэхэмкIэ, махуэ къэс къагъэсэбэп хьэпшып зэмылIэужьыгъуэхэмкIэ къызэрагъэпэщащ. Апхуэдэ гулъытэрэ граждан жыджэрагърэ зэман мытыншым къызэрагъэлъэгъуам папщIэ дэ абыхэм дахуэарэзыщ.
Къэбэрдей-Балъкъэрым ис псоми сигукIи си псэкIи фIыщIэ яхузощI абыхэм бэшэчагъ зэрахэлъам, езыхэм я узыншагъэми адрей цIыхухэм я узыншагъэми зэрыхуэсэкъам папщIэ.
Си лэжьэгъухэ! Сэ, Урысей Федерацэм и цIыхум, Къэбэрдей-Балъкъэр Республикэм и къулыкъущIэ нэхъыщхьэм, къыхэзгъэщхьэхукIыну сыхуейщ къэралым и Президент Путин Владимир Владимир и къуэм иригъэкIуэкIа лэжьыгъэм и мыхьэнэр, абы япэ махуэм щегъэжьауэ цIыхухэм я гъащIэмрэ узыншагъэмрэ псом япэ зэрыригъэщар. Абы къыщымынэу, нэхъ япэкIэ зэрыжысIам хуэдэу, ди полномочиехэм къыщIигъури, апхуэдэ полномочиехэр дгъэзэщIэн папщIэ дызыхуей Iуэхухэмрэ ресурхэмкIэ щIигъэбыдащ. Абы къыхэкIыу сэ жысIэфынущ: Урысей Федерацэм и субъектхэм я Iэтащхьэхэм ящыщу зыри абы гужьеигъуэ хигъэхуакъым икIи абы папщIэ сигукIи си псэкIи фIыщIэ хузощI.
Гъэхуауэ икIи я къалэнхэр и зэманым ягъэзащIэу лэжьащ Урысей Федерацэм и Правительствэр, федеральнэ министерствэхэмрэ ведомствэхэмрэ. Абы папщIэ дэ псоми ди цIэкIэ, Къэбэрдей-Балъкъэрым исхэм я цIэкIэ абыхэм фIыщIэ ин яхузощI.
Дэ къыдгуроIуэ вирусым и шынагъуэр иджыри зэрытщхьэщымыкIар. Пандемиер къэгъазэ имыIэу къызэднэкIынымкIэ хэкIыпIэу щыIэр цIыхухэм вакцинэ яхэлъхьэнырщ. НэгъуэщI Iэмалхэр диIэкъым.
Сэ къызбгъэдэкIыу мыр жысIэну сыхуейщ. Дэракъэ ди благъэхэр, гъунэгъухэр пандемием зэрихьам и гуауэр зыгъэвар? Дэракъэ ди благъэхэмрэ гъунэгъухэмрэ ящыщу сымаджэщхэм щIэхуахэм ятегузэвыхьу екIуэкIар? Дэ дыгузавэу телевизорым дыбгъэдэсащ, мы Iуэхум теухуауэ къэралым, ди щIэныгъэлIхэм къыджаIэнум дыпэплъэу. Арати, къэралым, ди щIэныгъэлIхэм жэуап тэмэм къыдатащ - дуней псом щыяпэу вакцинэ ящIащ. Нобэ дэ ар къэдгъэсэбэпын папщIэ Iэмал псори диIэщ. НывжесIэну сыхуейщ: мы хущхъуэр зэзэгъыну псоми ар къагъэсэбэпыну, вакцинэр зыхрагъэлъхьэну я къалэнщ. Тегъэчыныхьауэ нобэ ар схужыIэну къыщIэкIынтэкъым сэ езым, апхуэдэу си нэхъыжьхэм а хущхъуэр зыхедмыгъэ- лъхьауэ щытамэ. Зэраныгъэ лъэпкъ абы кърикIуэркъым. Зэран хъур ди жагъуэгъу къэралхэм а вакцинэм теухуауэ къыщежьэ хьэгъэщагъэ псалъэмакъхэр арауэ къыщIэкIынущ.
ФщIэн папщIэ: ди япэ поликлини-кэм и Iуэхутхьэбзэхэр къэзгъэсэбэпащ, вакцинэр Налшык къалэм щызыхезгъэлъхьащ. Вакцинэр ирикъуу яIэщ, етIуанэ вакцинэри къэсынущ. НэгъуэщIу жыпIэмэ, абы и лъэныкъуэкIэ фыхэплъыхьыну фыхуитщ.
ЩытыкIэ гугъум дихуа пэтми, дэ республикэм и экономикэмрэ социальнэ IэнатIэмрэ къабгъэдэхуэ къалэн инхэр гъэзэщIэнымкIэ зыхуеину Iэмал псори къызэдгъэпэщащ.
Къэзгъэлъэгъуапхъэу къызолъытэ Правительствэм, республикэм и гъэзэщIакIуэ, муниципальнэ властым и орган псоми кризисым пэщIэтынымкIэ зыхуэфащэ Iуэхухэр зэхалъхьэу зэрырагъэкIуэкIар, а зэман мытыншым цIыхубэм тэмэму япыщIауэ зэрекIуэкIар.
Япэм зэи ямылъэгъуа къэрал социальнэ дэIэпыкъуныгъэ блэкIа илъэсым цIыхухэм иратащ. Гулъытэ хэха хуащIащ сабий зэрыс унагъуэхэм. Илъэси 3-м щегъэжьауэ илъэси 7-м нэс зи ныбжь сабийуэ мин 63-м яхуэ-зэу трагъэкIуэдар сом меларди 4,5-м щIегъу.
ХуэдиблкIэ нэхъыбэ ящIащ лэжьапIэншэу къэнахэм ират дэIэпыкъуныгъэр. Социальнэ Iуэхухэмрэ ахъшэ дэIэпыкъуныгъэмрэ хиубыдэу республикэм исхэм псори зэхэту сом мелард 17 иратащ.
ЗэрыгурыIуэгъуэщи, дэ зэпымыууэ ди нэIэ тедгъэтащ лъэпкъ проектхэр гъэзэщIа зэрыхъум. Къэбэрдей-Балъкъэрым къыщащтауэ иджыпсту щагъэзащIэ апхуэдэ щIыналъэ проекту 47-рэ. 2020 гъэм а лэжьыгъэхэм псо-ри зэхэту сом меларди 8,1-рэ трагъэкIуэдащ икIи абы щыщу сом меларди 6,7-р федеральнэ ахъшэщ.
Лъэпкъ проектхэр гъэзэщIэным хуэгъэзауэ яубзыхуауэ щыта Iуэхухэр, зэрыщыту къапщтэмэ, къыдэхъулIащ. Мыбы хухаха ахъшэмрэ мылъкумрэ процент 95,8-кIэ къагъэсэбэпащ (ику иту ар УФ-м зэрыщыхъур процент 93,2-рэщ).
Мыхьэнэшхуэ зиIэ лэжьыгъэхэр ирагъэкIуэкIащ узыншагъэр хъумэнымкIэ IэнатIэм зегъэужьыным, абы и мылъку, техникэ зэфIэкIыр къэIэты-ным хуэгъэзауэ.
Зэрыщыту къапщтэмэ, республикэм и медицинэ организацэхэм медицинэ техникэу 1289-рэ къаIэрыхьащ, абы-хэм медицинэ техникэ «хьэлъэ» жыхуаIэм хуэдэу 14 хэту. Коронавирус уз зэрыцIалэм пэщIэтынымкIэ лэжьы-гъэ къудейм хиубыдэу федеральнэ бюджетым и хьэкъкIэ медицинэ IуэхущIапIэхэм рентген аппарат 12, УЗИ аппарат 15, зэрагъэбауэ аппарат зэмылIэужьыгъуэу 209-рэ, компьютер томографу 2, нэгъуэщIхэри ягъэуващ. Республикэм и онкологие диспансерым технологие лъагэхэр зи лъабжьэ иджырей оборудованэу сом мелуан 279-рэ зи уасэ къыхуащэхуащ. Республикэм и клиникэ сымаджэщымрэ сабий клиникэ сымаджэщымрэ иджырей томографхэр къыхуащэхуащ.
Хуабжьу лэжьыгъэшхуэ зэфIагъэкIащ гъуэгу ухуэныгъэм и лъэныкъуэкIэ. Псори зэхэту автомобиль гъуэгуу километр 230-рэ зэрагъэпэщыжащ. Абы федеральнэ мыхьэнэ зиIэ гъуэгуу километр 70, щIыналъэ мыхьэнэ зиIэ гъуэгуу километри 103-рэ, муниципальнэ мыхьэнэ зиIэ гъуэгуу километр 57-рэ хеубыдэ. Апхуэдэу Налшык къалэ округым и уэрамхэм ящыщу километр 20-м щIэуэ асфальт тралъхьащ. ЩIыналъэ мыхьэнэ зиIэ гъуэгухэм ящыщу километр 40-м дэкIуэу уэздыгъэхэр фIадзащ, нэгъуэщIу жыпIэмэ, мы IэнатIэм комплекснэ бгъэдыхьэкIэ къыщызэрагъэпэщащ.
2020 гъэм щIэуэ яухуащ е ирагъэфIэкIуащ псы къабзэкIэ цIыхухэр къызэзыгъэпэщ ухуэныгъэу 32-рэ, абы хиубыдэу псы зрижэ бжьамийуэ километр 72-рэ. Налшык къалэ округым псы зрижэ бжьамийуэ километри 6 щызэрахъуэкIащ, апхуэдэу «Нарт» псэупIэ хьэблэм километр 27-кIэ псыр бжьамийкIэ щызэбграшащ.
Республикэм и къалэхэмрэ адрей жылагъуэхэмрэ пщIантIи 122-рэ, цIыху куэд щызэхуэс щIыпIэу 34-рэ зэIузэпэщ щащIащ.
Гъэ кIуам республикэм псори зэхэту метр зэбгъузэнатIэ мин 500-м нэблагъэ къызэрыкI фэтэрыщIэу мини 5-м щIигъу хьэзыр щащIащ, 2019 гъэм елъытауэ ар процети 5,4-кIэ нэхъыбэщ. Унэ кхъахэхэм къыщIагъэIэпхъукIри псэупIэщIэхэм цIыхуи 164-рэ щIагъэтIысхьащ. Капитальнэу зэрагъэпэщыжащ фэтэр куэд хъу унэу 83-рэ.
Къанэ щIагъуэ щымыIэу гъэзэщIа хъуащ нэгъабэ Парламентым Зэрызыхуэдгъэзам щыубзыхуауэ щыта къалэнхэр.
Къапщтэмэ, дэ ди пщэ дэтлъхьэжауэ щытащ республикэ бюджетым и хэхъуэхэр нэрылъагъуу нэхъыбэ тщIыну. АтIэ а Iуэхур тэмэму зэфIэдгъэкIащ. Иджы япэу КъБР-м и бюджетым и хэхъуэхэр сом мелард 50-м щхьэдэхащ, 2019 гъэм елъытауэ проценти 139,7-кIэ нэхъыбэ хъуащ. Абы хиубыдэу налогыу къыхахахэри налогхэм ящымыщ ахъшэри 2019 гъэм елъытауэ нэхъыбэщ, яубзыхуауэ щыта планри проценти 100-кIэ зэфIагъэкIащ.
Коммерческэ кредитхэр пшыныжынымрэ къэрал кIуэцI щIыхуэр гъэмэщIэнымкIэ ди пщэ дэтлъхьэжа къалэнхэри дгъэзэщIащ. Къэрал кIуэцI щIыхуэр 2018 гъэм и пэщIэдзэм елъытауэ сом меларди 4,9-кIэ нэхъ мащIэ хъуащ. 2020 гъэр сыт хуэдизу хьэлъэу щымытами, дэ а щIыхуэм аргуэру сом мелуан 720-рэ кIэрыдгъэхуащ. Коммерческэ банкхэм къыIихауэ республикэм къэрал щIыхуэ телъыжкъым. Абы дэ къыдитым сэ нэхъ иужькIэ хэхауэ сыкъытеувыIэнщ.
2020 гъэм Парламентым Зэрызыхуэдгъэзам экономикэм зегъэужьыным, псэуныгъэм пыщIа IэнатIэхэмрэ социальнэ IэнатIэмрэ я инфраструктурэр къэгъэщIэрэщIэжыным хуэгъэзауэ къыщыдгъэувауэ щыта Iуэхухэм-рэ къалэнхэмрэ я нэхъыбапIэр тэмэ-му дэдгъэкIащ икIи абы и фIыщIэкIэ республикэм и социально-экономикэ зыужьыныгъэм и унэтIыныгъэ нэхъыщхьэхэр нэхъри япэкIэ кIуэтащ.
Псалъэм папщIэ, зэкIэ къызэрабжамкIэ, 2020 гъэм валовэ щIыналъэ продуктыр сом меларди 180-м нэсащ, 2019 гъэм елъытауэ ар проценти 102,1-рэ мэхъу. Промышленностым и зэфIэкIри процент 11-кIэ хэхъуащ. Промышленностым зэрызиужь псынщIагъымкIэ Къэбэрдей-Балъкъэрыр Урысейм и субъектхэм ящыщу ебланэщ. Мэкъумэш продукцэу къра-хьэлIари проценти 10-кIэ нэхъыбэщ. Ухуэныгъэ IэнатIэм щрагъэкIуэкI лэжьыгъэхэм зэрыхэхъуэ псынщIагъэр проценти 106,9-м нэсащ.
ЦIыхухэм къаIэрыхьэ лэжьапщIэр нэгъабэ проценти 9,8-кIэ нэхъыбэ хъуащ икIи сом 29908-м нэсащ. ЩэхуакIуэ уасэхэм зэрыхэхъуэм тещIыхьауэ къэплъытэмэ, къыщIэкIым и лъэныкъуэкIэ лэжьапщIэм хэхъуар проценти 5,8-рэ мэхъу (лэжьапщIэр нэхъ псынщIэу щыхэхъуащ узыншагъэр хъумэнымкIэ IэнатIэм - проценти 123,8-кIэ (ику иту сом 31813-рэ), ухуэныгъэм - проценти 117,6-кIэ (ику иту сом 25358-рэ) щIым щIэлъ хъугъуэфIыгъуэхэр къыщIэхынымкIэ IэнатIэм - проценти 146,52-кIэ).
2020 гъэм зыхуэдгъэувыжа нэгъуэщI къалэну, лэжьыгъэу куэд къыдэхъулIащ. А псоми я хэкIыпIэр федеральнэ центрым и дэIэпыкъуныгъэрщ, ди гупыр зэгъэуIуауэ икIи зэгурыIуэу зэрызэдэлэжьарщ икIи а псори лъабжьэ быдэ хуэхъунущ 2021 гъэм, апхуэдэу курыт лъэхъэнэм тещIыхьауэ республикэм и социально-экономикэ зыужьыныгъэр япэкIэ гъэкIуэтэным.
Псори дызэрыщыгъуазэщи, Урысей Федерацэм 2030 гъэм нэсыху зегъэужьынымкIэ къэралым и Президентым лъэпкъ мурад нэхъыщхьэу тху иубзыхуащ. А зэманым, къыкIэлъыкIуэ илъэсхэм едгъэкIуэкIыну лэжьыгъэм и гъуазэу щытынущ а мурадхэр. Ахэр гъэзэщIэным хузэщIэгъэуIуэн хуейщ властым и органхэм я зэфIэкI псори.
Республикэм и къэрал, муници-пальнэ органхэм 2021 гъэм ирагъэкIуэкIыну лэжьыгъэ псоми я купщIэу щытынур властым и гъэзэщIакIуэ органхэмрэ IуэхущIапIэхэмрэ цIыхухэм хуащIэ Iуэхутхьэбзэхэр егъэфIэкIуэнырщ. А Iуэхум мыхьэнэ хэха зэриIэр къыхигъэщхьэхукIащ къэралым и Президентым.
Зи гугъу тщIы мурадхэр къыдэхъулIэнымкIэ, шэч хэмылъу, лъабжьэр цIыхум и узыншагъэм телэжьэнырщ. Нобэ шэч лъэпкъ къытедмыхьэу жытIэ хъунущ республикэм узыншагъэр хъумэнымкIэ и системэр гъэунэхуныгъэ къызэрымыкIуэхэм тэмэму къызэрыхэкIар, ар зэпIэзэрыту, сэбэпынагъ пылъу зэрылажьэр.
Зэман къэкIуэнум дэ къытпэщытщ а IэнатIэм и зэфIэкIхэр иджырей технологиехэм тету щIэдгъэбыдэну. Урысейм и Президентым къигъэува пщэрылъхэм япкъ иткIэ къэралым щагъэзащIэ узыншагъэр хъумэнымкIэ IэнатIэм и пэублэ Iыхьэр лъэщу къэгъэщIэрэщIэжынымкIэ программэ.
А программэм хиубыдэу 2024 гъэм нэсыху республикэм узыншагъэр хъумэнымкIэ и IэнатIэм и пэублэ Iыхьэр егъэфIэкIуэным сом мелард 1,8-рэ хухахынущ, сом мелард 1,2-рэ трагъэкIуэдэнурэ IуэхущIапIэу 50 щIэуэ яухуэнущ, къагъэщIэрэщIэжынущ, капитальнэу зэрагъэпэщыжынущ. ЩIэуэ къызэIуахыну IуэхущIапIэхэр 13 мэхъу. Абыхэм иджырей медицинэ Iэмэпсымэхэр щIагъэувэн папщIэ сом мелуан 600 къагъэсэбэпынущ. Дызэрыт илъэсым щIадзауэ IуэхущIапIэ 13 капитальнэу зэрагъэпэщыж, тIу ирагъэфIакIуэ, зы доху- тыр амбулаторэ (Аушыджэр къуажэм) ящI. А лэжьыгъэхэм я фIагъым, ягъэува пIалъэхэм зэрытетым Прави- тельствэр, щIыналъэ администрацэхэм я Iэтащхьэхэр ткIийуэ кIэлъып-лъын хуейщ. Зэманым къигъэувхэм езэгъыу икIи зэфIагъэкI медицинэ Iуэхутхьэбзэхэм фIагъ лъагэ яIэу ухуэныгъэхэр зэтеувэн папщIэ хэкIыпIэу щыIэр къэлъытапхъэщ.
Апхуэдэу мы гъэм онкологие диспансерым и ухуэныгъэр ирагъэжьэжыну, республикэ клиникэ сымаджэщым щIагъэгъуэлъхьэнухэр зэкIуалIэ къудамэм и унэщIэр ухуэным щIадзэ-ну я мурадщ.
Илъэсищ благъэм къриубыдэу зэрыщыту автомашинэщIэхэмкIэ къызэрагъэпэщынущ къуажэхэм, къалэ теплъэ зиIэ поселкэхэм, къалэ мыинхэм медицинэ дэIэпыкъуныгъэ псынщIэмкIэ я IуэхущIапIэхэр. ТекI имыIэу зэпымыууэ егугъун хуейщ медици- нэм и лэжьакIуэхэм я IэщIагъэм хэгъэхъуэным.
Апхуэдэу диспансеризацэмкIэ, профилактикэ къэпщытэныгъэхэмкIэ программэхэм зедгъэубгъуну къытпэщытщ. Гулъытэ хэха яхуэщIыпхъэщ гу-лъынтхуэ узхэр, онкологие узыфэхэр, тхьэмбыл узыр и зэманым зэхэгъэкIыным, сабийхэм я узыншагъэр хъумэным, нэхъыжьхэм я узыншагъэр гъэбыдэным.
Нэхъри зедгъэужьын икIи едгъэ-фIэкIуэн хуейщ цIыхухэр хущхъуэхэмкIэ къызэрызэрагъэпэщ льготэхэм. Мы Iуэхур иджыри и кIэм нэдгъэсакъым, ауэ ар тэмэму щызэфIэдгъэкIыфыну лъэхъэнэм дыхуокIуэ. ЦIыхухэр хущхъуэкIэ къызэгъэпэщынымкIэ льготэхэм республикэ бюджетым къыхэкIыу 2017 гъэм сом мелуан 237,2-рэ, 2018 гъэм сом мелуан 270,5-рэ трагъэкIуэдамэ, 2020 гъэм а мурадым сом мелуан 358,8-рэ хухахащ.
Дэ ди мурад нэхъыщхьэр республикэм исхэм папщIэ зэфIагъэкI медицинэ Iуэхутхьэбзэхэм я фIагъыр сыт и лъэныкъуэкIи къэIэтынырщ.
А мурадым хуэунэтIауэ зэгъэуIуауэ лэжьэну Правительствэм хузогъэув.
ЦIыхухэр узыншагъэр хъумэным тещIыхьа псэукIэм зэпымыууэ хуэдгъасэмэщ узыншагъэр хъумэнымкIэ системэм зегъэужьыным IуэхуфIхэр къыщыдэкIуэнур. Абы къыхэкIыу спортымрэ узыншагъэр гъэбыдэнымрэ ехьэлIа инфраструктурэм щIэгъэхуэбжьауэ зедгъэужьыну къытпэщытщ.
Мы гъэм пятиборьем дихьэххэм папщIэ спорткомплекс Налшык къыщрагъэжьэну, алэрыбгъукIэ къищIыкIа футбол джэгупIэ хьэзыр щащIыну, апхуэдэу узыншагъэр щрагъэфIакIуэ физкультурэ комплексрэ ГТО-м и тестхэр щат спорт утыку мыинрэ Дзэлыкъуэ районым щащIыну, Бахъсэн къалэмрэ Бахъсэн районым щыщ Псыхъурей къуажэмрэ спорт комплексхэр щагъэхьэзырыну я мурадщ.
Спортым зегъэужьыным трагъэкIуэдэн папщIэ 2021 гъэм республикэм къыхуаутIыпщыну федеральнэ субсидиехэр сом мелуан 350-м щIигъунущ. Абы къыдэкIуэу дэ 2022 - 2023 гъэхэм едгъэкIуэкIыну спорт ухуэныгъэхэм ятеухуауэ зыхуэфащэ федеральнэ министерствэм етщIылIа зэгурыIуэныгъэхэм япкъ иткIэ къытIэрыхьэну ахъшэр сом мелуан 300-м щIегъу. Абы и хьэкъкIэ лъэрыжэкIэ къыщажыхь стадион, спортым и щIымахуэ лIэужьыгъуэхэм зыщыхуагъасэ физкультурэ комплекс Налшык дащIыхьынущ.
Апхуэдэу щыт пэтми, спорт ухуэныгъэхэр ебгъэкIуэкI къудейкIэ Iуэхур зэфIэкIынукъым. Нэхъыщхьэр цIыху куэд спортым къыхэшэнымкIэ а ухуэныгъэхэр щIэгъэкъуэн къэщIынырщ. А къалэныр зэлъытар спортым и IэнатIэм пэрытхэрщ, абыхэм я жыджэрагъырщ. А лэжьакIуэхэм я егугъуныгъэр улахуэ тэмэмкIэ щIэгъэбыдэн хуейщ.
Республикэм и Правительствэм и пщэ изолъхьэ спортым и къэрал IуэхущIапIэхэм щылажьэхэм, гъэсакIуэхэм мы гъэм я лэжьапщIэр къиIэтыну икIи ар егъэджакIуэхэм республикэм ику иту къыщалэжьым нигъэсыну.
Къытпэщыт лъэхъэнэм едгъэкIуэкIыну лэжьыгъэхэм я унэтIыныгъэ нэхъыщхьэ дыдэу увын хуейщ унагъуэхэм защIэгъэкъуэныр, лэжьапIэ IэнатIэщIэхэр къызэIухыныр, тхьэмыщкIагъэм ебэныныр, цIыхухэм я хэхъуэр къэIэтыныр.
2019 гъэми, 2020 гъэми дэ нэсу дгъэзэщIащ республикэ бюджетым къыхэкIыу унагъуэ нэхъ зыхуэфащэхэм социальнэ дэIэпыкъуныгъэ етыным-кIэ къытпэщыта къалэнхэр, къапщтэмэ, сабий етхуанэ е абы къыкIэлъыкIуэ зыгъуэта унагъуэхэм я псэупIэхэр ирагъэфIэкIуэн папщIэ дэтхэнэми сом мин 250-рэ хухэтхащ, апхуэдэ сертификатхэм япкъ иткIэ блэкIа илъэсхэм зэтрихьа щIыхуэ псори дыпшыныжащ.
А Iуэхухэм Правительствэм, республикэм Лэжьыгъэмрэ социальнэ дэIэпыкъуныгъэмкIэ и министерствэм мы гъэми я нэIэ трагъэтын, къэрал дэIэпыкъуныгъэр зыхуэфащэхэм зэрыхухахым, ар и зэманым зэрыратым икIи тэмэму къэгъэсэбэпа зэрыхъум кIэлъыплъын хуейщ.
Социальнэ IэнатIэм и Iыхьэ псоми я лэжьэкIэр зыхуэгъэзауэ щытыпхъэр унагъуэхэм, дэтхэнэ зы цIыхуми я Iуэхухэр дэгъэкIынырщ. Сэ Правительствэм хуэзгъэуващ цIыхухэм социальнэ Iуэхутхьэбзэхэр зэрыхуащIэр игъэтэмэмыну, абы пыщIауэ ягъэхьэзыр документхэр Iэмал зэриIэкIэ нэхъ мащIэ ищIыну, административнэ лъэпощхьэпохэр игъэкIуэдыну. Мы Iуэхур кIыхьлIыхь фымыщIу зэщIэгъэуIуауэ фелэжьыну икIи а лэжьыгъэм кърикIуэхэм щыгъуазэ сыфщIыжыну сыволъэIу.
Апхуэдэу дэ къытпэщытщ дызэрыт илъэсым къриубыдэу лэжьыгъэм и рынокыр зэтедгъэувэжыну. Ауэ а къалэныр нэхъ пасэу зэфIэдгъэкIмэ нэхъыфIщ. Абы папщIэ хьэрычэтыщIэ-хэм я жэрдэмым нэхъри зедгъэужьын, социальнэ контрактхэр зэщIылIэным нэхъри зедгъэубгъун, лэжьыгъэкIэ зыкъызэзыгъэпэщыж цIыхухэм жыджэру ядэIэпыкъун хуейщ.
Ди Президентым хэхауэ къызэригъэлъэгъуащи, иджыпсту нэхъыщхьэр цIыхухэм ипэжыпIэкIэ къаIэрыхьэ хэхъуэр нэхъыбэ щIынырщ. Ди республикэм лэжьапщIэм зэпымыууэ щыхагъахъуэ пэтми, япэхэми хуэдэу, мы Iуэхур ди деж иджыри арэзы укъищIу щызэтеувакъым. ЗыужьыныгъэмкIэ стратегием хиубыдэу дыубзыхуа бжыгъэхэм дынэсын папщIэ дэ нэхъри нэхъ нэрылъагъуу лэжьапщIэр къэдмыIэту хъунукъым. Ди цIыхухэм я дежкIэ абы мыхьэнэ ин иIэщ.
Правительствэм хузогъэув а Iуэхум жэуаплыныгъэ нэс хэлъу бгъэдыхьэну.
Мы IэнатIэм Iуэхухэр щызэзыгъэуIу республикэ органхэм я мыхьэнэмрэ зэфIагъэкIхэмрэ икIэщIыпIэкIэ къэIэтын хуейщ. Зи гугъу сщIыр Социально-лэжьыгъэ зэхущытыкIэхэр зэблэгъэкIынымкIэ лъэныкъуищу зэхэт комиссэрщ, лэжьыгъэ зэхущытыкIэхэр гъэтэмэмынымрэ лэжьапщIэмкIэ щIыхуэхэр пшыныжынымкIэ комиссэрщ. А органхэм лэжьыгъэшхуэ ирагъэкIуэкIын хуейщ лэжьапщIэр къэIэтыным, IэнатIэхэм щыIэ зэхущытыкIэхэр гъэтэмэмыным я лъэныкъуэкIэ.
КъэкIуэну лъэхъэнэм дэ нэхъри нэхъ лъэщу зедгъэужьын хуейщ щэнхабзэмкIэ IэнатIэм. Дэ ди къалэнщ щэнхабзэр гъащIэм и хэкIыпIэ нэхъыщхьэхэм ящыщ щIыным, цIыхухэм я гъэсэныгъэм, абыхэм я зэхэщIыкIым, унагъуэм илъ хабзэмрэ зэхущытыкIэхэмрэ я лъабжьэ нэс щэнхабзэр зэрытщIыным дыхущIэкъуну.
А лэжьыгъэм и унэтIыныгъэ нэхъыщхьэ дыдэхэм ящыщу дяпэкIи къэнэн хуейщ лъэпкъым и тхыдэ-щэнхабзэ хъугъуэфIыгъуэхэр хъумэныр. Гулъы-тэ хэха хуэщIыпхъэщ ди хабзэ нэхъыфIхэм тету сабийхэр, щIалэгъуалэр гъэсэным. ЦIыхухэм зэпымыууэ ядэIыгъыпхъэщ ахэр лъэпкъ щэнхаб-зэ зыужьыныгъэм, анэдэлъхубзэр джыным, щэнхабзэм зэрыхущIэкъур. Анэдэлъхубзэр къызэтегъэнэныр дэ къэкIуэну щIэблэхэм я пащхьэ щыдиIэ къалэн лъапIэщ. ИкIи абы папщIэ дэ зыхуей псори длэжьыну къытпэщытщ.
ЗэрыгурыIуэгъуэщи, дэ апхуэдэу къызэдгъэпэщынущ ди республикэм ис адрей лъэпкъ псоми я бзэхэмрэ щэнхабзэмрэ яхъумэн икIи абыхэм зрагъэужьын папщIэ зыхуей Iэмал псори.
Къалэн нэхъыщхьэхэм ящыщу адэкIи щытынущ творческэ гупхэм, щэнхабзэм и лэжьакIуэхэм защIэгъэкъуэныр, а IэнатIэм папщIэ IэщIагъэлIхэр гъэхьэзырыныр. АдэкIи къару нэхъыбэ ехьэлIапхъэщ щэнхабзэмрэ гъуазджэмрэ я IуэхущIапIэхэм я мылъку-техникэ зэфIэкIым зегъэужьыным. Дэ ди мурадщ дэтхэнэ зы къуажэми щэнхабзэ IуэхущIапIэ нэс щыIэн, къуажэм и щэнхабзэ гъащIэм и иджырей инфраструктурэр зэтеувэн папщIэ зыхуей псори длэжьыну. А мурадыр зэман гъунэгъум къриубы-дэу къызэрыдэхъулIэнур быдэу си фIэщ мэхъу.
Апхуэдэу республикэм и Правительствэм дызэрыт илъэсым игъэзэ-щIэн хуейщ щэнхабзэм и къэрал IуэхущIапIэхэм я лэжьакIуэхэм я улахуэр къэIэтынымкIэ къыпэщыт Iуэхур.
ЩIалэгъуалэр нэмысрэ зэхэщIыкI-рэ яхэлъу гъэсэным, национализмэмрэ экстремизмэмрэ япэщIэтыным, зэманым къыдэкIуэ адрей мыхъумыщIагъэхэр къызэнэкIыным хуэгъэзауэ нэхъри нэхъ тэмэму ядэлэжьэн хуейщ жылагъуэ зэщIэхъееныгъэхэм, лъэпкъ, щэнхабзэ центрхэм, дин зэгухьэныгъэхэм.
Лъэпкъ зэхущытыкIэхэр гъэбыдэным пыщIа хабзэ нэхъыфIхэр хъумэнымкIэ зыхуеину Iэмал псори иджыпсту республикэм щыIэщ. Псо-ми ди зэхуэдэ а фIыгъуэшхуэр нэр напIэм зэрихъумэм хуэдэу дыхуэсакъыу тхъумэну дэ ди къалэнщ.
Абы папщIэ дэ жыджэру къэдгъэсэбэпын хуейщ Къэбэрдей-Балъкъэр Республикэр къызэрызэрагъэпэщрэ илъэси 100 щрикъу гуфIэгъуэр гъэлъэпIэным зыщыхуагъэхьэзыр зэманыр. Мыбдеж мыхьэнэшхуэ иIэщ республикэм исхэм, псом хуэмыдэу щIалэгъуалэм, ди зэгухьэныгъэм и мыхьэнэр ягурыгъэIуэным, ди адэжьхэм къыхахауэ щыта гъуэгум, псоми ди зэхуэдэ унагъуэ ухуэным лъэпкъыр зэры-хуэпэжыр нэрылъагъу ящыщIыным, ди тхыдэм, хабзэхэм, лъэпкъ хъугъуэфIыгъуэхэм, лIэщIыгъуэ куэд зи ныбжь щэнхабзэм ахэр щIэпIыкIыным.
ЩIэблэхэм яку апхуэдэ хабзэ, гурыщIэ зэпыщIэныгъэхэр зэрыдэлъырщ ди лъэпкъыр зыгъэбыдэр икIи арыншауэ дыщалъхуа Къэбэрдей-Балъкъэрым и къэкIуэнур тэмэму тхуэубзыхунукъым.
ЦIыхухэм я псэукIэм и фIагъыр къэзыгъэлъагъуэ унэтIыныгъэ нэхъыщ-хьэ дыдэхэм ящыщщ егъэджэныгъэр.
КъэкIуэну зэманым нэхъри егугъун хуейщ еджакIуэхэм я щIэныгъэр къэIэтыным, сабийм и зэфIэкIхэм зегъэужьынымкIэ хэкIыпIэу щыт школ щIэныгъэм и мыхьэнэм хэгъэхъуэным. Абы папщIэ дызэрыт илъэсым дэ зи школ кIуэгъуэ мыхъуа сабийуэ 705-рэ зыщIэхуэн IуэхущIапIэу 10 къызэIутхыну къытпэщытщ. Мы илъэсым и кIэухым ирихьэлIэу дэ ди къалэнщ зи ныбжьыр илъэси 3-м фIэмыкIа сабий псори апхуэдэ IуэхущIапIэхэмкIэ къызэдгъэпэщыну.
Мы гъэм еджакIуэ 500 зэкIуэлIэн школ Куба къуажэм, сабий 785-м ятещIыхьа курыт школ Прохладнэ къалэм къыщрагъэжьэнущ, Новоивановскэ къуажэм дэсхэм я сабийуэ 440-рэ школыщIэм екIуэлIэнущ.
IуэхущIапIэщIэхэр - школхэмрэ са-бий садхэмрэ - доухуэ, дяпэкIи дыу- хуэнущ. Къалэн хэхащ иджыпсту щыIэ апхуэдэ IуэхущIапIэхэр зэгъэпэщыжыныр. Школхэм илъэсипщI зыбжанэ япэкIэ ящIа куэд яхэтщ икIи абыхэм я щытыкIэр зэкIэлъымыкIуэщ.
Республикэм и Правительствэм и къалэнщ щIыналъэ администрацэхэм ящIыгъуу а Iуэхум зэкIэлъыкIуэу елэжьыну. Мыбы ахъшэ мащIэ текIуэдэ-нукъым, ауэ ар республикэ, щIыпIэ бюджетхэм къыхэгъэкIын, бюджетым щымыщ ахъшэ къызэщIэгъэуIуэн хуейщ. А Iэмалыр, апхуэдэу лэжьыгъэхэр егъэкIуэкIынымкIэ зыхуэфащэ программэхэр мы гъэм щIадзэу ягъэзэщIэну къапэщытщ. А къалэныр зэкIэлъыкIуэу дэдмыгъэкIыу хъунукъым.
Мы гъэм капитальнэу зэрагъэпэщыжын хуей IуэхущIапIэхэм хагъэхьащ Дзэлыкъуэкъуажэ дэт курыт школ №1-р, апхуэдэу Шэрэдж Ищхъэрэ, Пролетарскэ къуажэхэм я школхэр.
Сабийхэм я щIэныгъэмрэ зэхэщIыкIымрэ къэIэтынымкIэ мыхьэнэ пыухыкIа зиIэ Iуэхущ абыхэм щIэныгъэ гуэдзэн егъэгъуэтыныр. Нобэм ирихьэлIэу республикэм къыщызэрагъэпэщащ школакIуэхэм естественнэ, технологие унэтIыныгъэхэр зиIэ программэхэр щрагъэдж «Зыужьыныгъэм и къежьапIэ» центр 69-рэ. Дызэрыт илъэсым къриубыдэу иджыри апхуэдэ центр 38-рэ къыщызэIуахынущ къуажэхэмрэ къалэ мыинхэмрэ щыIэ школхэм. 2023 гъэм а лэжыгъэр и кIэм нагъэсынущ икIи зи гугъу тщIы центрхэр щIэныгъэ щрагъэгъуэт IуэхущIапIэ псоми щылэжьэнущ.
Республикэм иджыпсту тэмэму щолажьэ «Кванториум» сабий технопарк икIи абы школакIуэу минрэ щитхум нэблагъэ йокIуалIэ. ТворчествэмкIэ сабий академием къыщызэрагъэпэща технопаркым и фIыщIэкIэ сабий 1900-м щIэныгъэ гуэдзэн ирагъэгъуэт. «Кванториум» технопарк мы гъэм Налшык къалэм дэт гимназие №4-ми къыщызэIуахыну я мурадщ. Мы Iуэхум пыщIа лэжьыгъэхэр адэкIи егъэкIуэкIын хуейщ.
Дэ зыхуэдгъэувыж мурадхэм ящыщщ дэтхэнэ зы сабийми, школакIуэми бгъэдэлъ зэфIэкIхэр наIуэ къэщIыныр. А къалэныр гъэзэщIэныр зыпыщIар мылъку-техникэ зэфIэкI-хэм я закъуэкъым. Ар куэдкIэ елъытащ методикэ бгъэдыхьэкIэхэм, гъэсакIуэмрэ гъэсэнымрэ я егугъуныгъэм. Зэчиишхуэ зыбгъэдэлъ сабийхэм я зэфIэкIыр наIуэ къэщIынымрэ абыхэм ядэIэпыкъунымкIэ Iуэху нэхъыщхьэ дыдэхэм ящыщщ школакIуэхэм я олимпиадэхэр. Абы къыхэкIыу сэ тэмэму къызолъытэ мы гъэм щыщIэдзауэ олимпиадэхэм къыщыхэжа- ныкI ди сабийхэр нэхъри тегъэгушхуэным хуэгъэза Iуэхухэр дэгъэкIыныр, школакIуэхэм я урысейпсо олимпиадэм и кIэух Iыхьэм щытекIуа ди сабийхэмрэ ахэр зыгъэса егъэджакIуэхэмрэ дэтхэнэми сом мин 50, увыпIэ пэрыт зыубыдахэмрэ абыхэм я педагогхэмрэ дэтхэнэми сом мин 25-рэ, урысейпсо олимпиадэм и щIыналъэ Iыхьэм, анэдэлъхубзэмкIэ республикэ олимпиадэм щытекIуахэмрэ абыхэм я егъэджакIуэхэмрэ дэтхэнэ-ми сом мин 15 етыныр.
2021 гъэм фокIадэм и 1-м щегъэжьауэ школхэм егъэджэныгъэмкIэ я программэхэм гъэсэныгъэмкIэ Iыхьэ щIагъужынущ. ИпэжыпIэкIэ къапщтэмэ, ахэр гъэсэныгъэмкIэ программэ пыухыкIауэ щытынущ. А Iуэхур тэмэму дэгъэкIын икIи абы зэхъуэкIыныгъэ тэмэмхэр къызэрырикIуэнум хущIэкъун хуейщ.
ЕгъэфIэкIуэн хуейщ сабийхэм гъэмахуэм зегъэгъэпсэхуным, я узыншагъэр егъэфIэкIуэным ехьэлIа Iуэхухэр. Гъэмахуэ лагерхэр зыгъэпсэхупIэ къудей мыхъуу, щIэблэр щагъасэ щIыпIэ хэха хъун хуейщ.
Гулъытэ щхьэхуэ хуэщIыпхъэщ еджакIуэхэм я дзэ-хэкупсэ гъэсэныгъэми, «ЮнАрмия» зэщIэхъееныгъэм зегъэубгъупхъэщ, апхуэдэуи «Авангард» центрыр къызэгъэпэщыным хуэунэтIауэ зэтраубла лэжьыгъэри и кIэм нэгъэсыпхъэщ.
Илъэс къэс ди деж щыхохъуэ «IэщIагъэлI ныбжьыщIэхэр» Ворлдскиллс лъэпкъ чемпионатым хэтхэм я бжыгъэм. ЦIыхухэм IэщIагъэ егъэгъуэтыным зегъэужьынымкIэ щIэгъэкъуэн нэхъыщхьэхэм ящыщ зыуэ щыт, куэд дэзыхьэх а зэхуэсым и ефIэкIыныгъэхэр, къит Iэмалхэр нэсу къэгъэсэбэпыным мыхьэнэшхуэ иIэщ. Абы къыдэкIуэу, экономикэр нэхъ зыхуэныкъуэ IэщIагъэхэр цIыхухэм егъэгъуэтыным зи нэIэ тезыгъэтыну центрхэр къызэгъэпэщын хуейщ.
Ди республикэм и еджапIэ нэхъыщхьэхэмрэ щIэныгъэлIхэмрэ къалэнышхуэхэр къапэщытщ экономи-кэм и IэнатIэхэм хэпщIыкIыу зезыгъэужьыну унэтIыныгъэхэм щызэдэлэжьэным хуэгъэзауэ. Къэрал программэхэр, инвестицэ проектхэр щызэхалъхьэкIэ къэгъэщхьэпапхъэщ щIэныгъэ-къэхутэныгъэхэр егъэкIуэкIыным, бэм я сэбэп зыхэлъ лэжьэкIэщIэхэм хуэкIуэным щIэблэр тезыгъэгушхуэну щытыкIэхэр, ди ВУЗ-хэмрэ щIэныгъэ IуэхущIапIэхэмрэ я зэфIэкIхэр.
ЕджапIэ нэхъыщхьэхэм унэтIыны-гъэ хэхам теухуа щIэныгъэ цIыхухэм ираткIэ Iуэхур зэфIэкIыу щыт хъунукъым, абыхэм студентхэр хуагъэпсыпхъэщ езыхэм жэрдэм къыхалъхьэу икIи ар пхагъэкIыфу щытыным, къыхаха IэщIагъэмкIэ жылагъуэм яхуэфэщэн увыпIэ щызрагъэгъуэтыжыным. ЕджапIэ нэхъыщхьэхэр къэзыуха щIалэгъуалэр гуп-гупурэ зэрыубыдыным хуэхьэзыру, я Iуэху зэтраухуэрэ щIэ гуэрхэр къаугъуеифу, я щхьэри нэгъуэщIхэри IэнатIэкIэ къызэрагъэпэщыфу щытын хуейщ. Ар яхуэгъэзащ экономистхэми, менеджерхэми, юристхэми, нэгъуэщI IэщIагъэлIхэми.
Егъэджэныгъэ IэнатIэм щыдиIэ мурадхэмрэ ахэр гъэзэщIэным дызэрегугъумрэ хуэунэтIауэ щытыпхъэщ къалэн нэхъыщхьэр - щIэныгъэм и фIагъымрэ абы и лъэныкъуэкIэ адрейхэм дапеуэфу щытынымрэ - зэдгъэхъулIэным.
Иджы, пщIэ зыхуэтщI депутатхэ, и гугъу сщIынщ республикэм и экономикэм ехьэлIа Iуэхухэм.
Экономикэ IэнатIэм ди дежкIэ унэтIыныгъэ нэхъыщхьэу щыщытыр цIыхухэм я псэукIэр зыхуэдэнур зэлъыта IэнатIэхэм зегъэужьынырщ. Ар Iуэхум дыхузэщIэзыгъэуIуэ къарууэ увынущ. Псом япэрауэ, цIыхухэр тыншу псэун папщIэ зэманым къигъэув щытыкIэхэр къыхузэгъэпэщынырщ ар зытещIыхьар. НыбжьыщIэр мы зэманым Урысейм и къалэшхуэхэм нэхъыбэу щIэIэпхъуэр ахъшэ нэхъыбэ къыщилэжьыным и закъуэкъым, атIэ абы щыIэ тыншыпIэми кIэлъыкIуэу аращ.
Иджы 2021 гъэм нэхъ ехьэлIауэ.
Къэтщтэнщ транспорт инфраструктурэм ехьэлIа Iуэхухэр.
Автомобиль гъуэгуу 2021 гъэм зэрагъэпэщыжынухэр километри 180-рэ хуэдиз хъунущ, абыхэм ящыщу федеральнэ сетым хыхьэр километр 50-м нэблагъэу, щIыналъэ гъуэгухэр километри 101,6-рэ (объект 21-рэ), щIыналъэкIуэцI сетым хыхьэхэр километр 25-рэ хъууэ щытынущ. Налшык къалэ округым и щIыналъэм хыхьэу гъуэгу километр 14 (объект 15) зэрагъэпэщыжынущ. Апхуэдэуи муниципальнэ зэгухьэныгъиплIым я гъунапкъэхэм къриубыдэ, щIыпIэ мыхьэнэ зиIэ гъуэгуу километр 11 щыIэ мардэхэм изагъэу зыхуей хуагъэзэнущ. КъимыдэкIэ, щIыналъэ гъуэгу километр 60-м нэблагъэм ябгъухэм иIэ пкъохэм уэздыгъэхэр щыфIадзэнущ.
Транспортымрэ гъуэгу хозяйствэмкIэ министерствэм къалэну хузогъэув а лэжьыгъэ псори фIагъ яIэу икIи ягъэува пIалъэхэм япэ къихуэу зэфIагъэкIыну. Налшык къалэм и гъуэгухэм ящыщу километр 12 зэрагъэпэщыжыным трагъэкIуэдэну сом мелуан 432-рэ, апхуэдэуи километри 9,4-рэ зи кIыхьагъ Прохладнэ - Елъхъуэт щIыналъэ автомобиль гъуэгур къызыхуэтыншэу зэрагъэпэщыжыным къыхуагъэсэбэпыну сом мелуан 595-рэ къэрал бюджетым щыщу республикэм къратам къыхущIагъуным теухуа Iуэхуми елэжьын хуейщ. НэгъуэщIу жыпIэмэ, абы Iэмал къитынущ 2021 гъэм къриубыдэу иджыри гъуэгу километр 22-рэ зэрагъэпэщыжыну.
Муниципалитетхэм я зэхуакухэм, муниципалитетхэм я кIуэцIхэм цIыхухэр транспорткIэ къыщешэкIыным лъэныкъуищкIэ гулъытэ хэха хуэщIыпхъэщ: гъуэгупщIэр екIурабгъуу щытыным, гъуэгуанэм тет транспортым я бжыгъэмрэ ахэр къэувыIэпIэхэм щыIухьэн хуей зэманымрэ, цIыхухэр абыхэм куэдрэ япэплъэн хуэмейуэ, зэпэлъытыным, икIи маршрутыр цIыхухэр нэхъ зыщIэупщIэхэм тещIыхьауэ зэхэлъхьэным.
Транспорт IэнатIэм и къалэн нэхъыщхьэ дыдэхэм ящыщщ «Налшык» аэропортыр Iуэхутхьэбзэ зэращIэу щыIэ мардэщIэхэм хуэгъэкIуэнымрэ кхъухьлъатэхэмкIэ цIыхуу кърашэкIым я бжыгъэм хэгъэхъуэнымрэ. Абы хуэунэтIа лэжьыгъэ йокIуэкI. Аэропортыр мылъкуншэ хъуауэ къэлъытэным теухуауэ ирагъэжьа Iуэхухэр къызэтрагъэувыIащ. КъыкъуэкIащ а лэжьыгъэр тэмэму къызэзыгъэпэщыфыну хьэрычэтыщIэ (Урысейм а IэнатIэм зэфIэкI нэхъ щызиIэхэм ящыщу).
Авиарейсхэмрэ аэропортыр къэзыгъэсэбэп авиакомпаниехэмрэ нэхъыбэ ящIащ. Къалащхьэм кIуэхэм нэмыщI, мы илъэсым къыщыщIэдзауэ Санкт-Петербург, Сочэ къалэхэм, нэгъуэщI къэралхэм кIуэ рейсхэми я лэжьыгъэр зэтраублэнущ.
А Iуэхухэр адэкIи пхыгъэкIыным теухуауэ, аэропорт комплексыр, телъэтыкIыпIэ-къэтIысыжыпIэ гъуэгухэр сыт и лъэныкъуэкIи зыхуей хуэзэу зэгъэпэщыжыным, объектым и шынагъуэншагъэр къызэгъэпэщыным, абы и статусым хэгъэхъуэным хуэгъэзауэ ядэлэжьэн хуейщ а унэтIыныгъэм фIыуэ хэзыщIыкIхэми, властым и федеральнэ органхэми.
А къалэнхэрщ республикэм Транспортымрэ гъуэгу хозяйствэмкIэ и министерствэм нэхъыщхьэу къилъытапхъэр, япэ иригъэщын хуейр.
ПсэукIэм и фIагъыр къыгуэхыпIэ имыIэу епхащ ЖКХ-м и зыужьыныгъэм. Аращ зи пщэ къыдэхуэр цIыхухэм я псэукIэр къызэгъэпэщыным теухуауэ япэ игъэщыпхъэ къалэнхэр гъэзэщIэныр.
Ди къалэн нэхъыщхьэ дыдэр - ар цIыхухэр псыкIэ ирикъуу къызэгъэпэщынырщ. А IэнатIэм илъэс кIуами абы и пэ итами лэжьыгъэшхуэ щызэфIагъэкIащ, абыхэм я гугъу ищхьэкIэ щысщIащ. Мы гъэм «Псы къабзэ» проектым хыхьэу яужь ихьащ цIыхухэр псыкIэ нэсу къызэгъэпэщыным теухуа объект 19 яухуэным е зэрагъэпэщыжыным, псори зэхэту сом мелуани 130-рэ текIуадэу (псы къыщIэшыпIэхэр ухуэныр, бжьамийхэр дэлъхьэныр иризэфIагъэкIыну).
Ауэ мыбдежым сэ и гугъу щысщIынущ нэгъуэщI Iуэхухэмрэ технологиехэмрэ, зэманрэ мылъкушхуэрэ зытекIуэдэнухэм. Ар псыр зэхуахьэсурэ щызэблэу къэмыхъуу ар цIыхухэм зэрыхуаутIыпщ Iэмалыр республикэм къыщыгъэсэбэпынырщ, абыкIэ зэуэ щIыналъэ куэд къыпхузэщIэубыдэнущ, псым и фIагъми дагъуэ иIэнукъым. НэгъуэщI хэкIыпIэ щыIэкъым.
А унэтIыныгъэм зегъэужьыным теухуа лэжьыгъэм щIадзащ.
Республикэм и Правительствэмрэ властым и муниципальнэ органхэмрэ къалэн ящызощI 2021 гъэм къудамищым я проектхэр зэхалъхьэну: Дзэлыкъуэ псы гуэшыпIэм (псы къыщIэшыпIэр хъуэжауэ); Бахъсэн псы гуэшыпIэм, апхуэдэуи Налшыкрэ Шэджэм щIыналъэм и жылэ зыбжанэмрэ псыкIэ къызэзыгъэпэщыну псы кIуапIэм ехьэлIахэр.
ЦIыхухэр зыхуей хуэзэу псэун щхьэкIэ мыхьэнэшхуэ зиIэ нэгъуэщI Iуэхущ дэтхэнэ зы къуажэми къалэми жылэдэсхэм зыщагъэпсэхуну щIыпIэхэр, паркхэр, сабий джэгупIэхэр къыщызэгъэпэщыныр. Абы папщIэ мы гъэм къриубыдэу лъэпкъ проектым хыхьэу дэ зэIузэпэщ тщIын хуейщ фэтэр куэду зэхэт унэхэм я пщIантIэ 89-рэ, жылагъуэ зэхуэсыпIэу 31-рэ.
Шэч хэмылъу, къалэн нэхъыщхьэ дыдэщ кIэрыхубжьэрыху быдэхэм ехьэлIауэ щыIэ гугъуехьхэр дэгъэкIыныр - ЩIыналъэ операторым и Iуэху къызэгъэпэщыкIэр егъэфIэкIуэнымрэ иджырей технологиехэр къагъэсэбэпурэ абыхэм елэжьу зэтраухуэныр.
ДгъэзэщIэну ди мураду зэхэтлъхьэ сыт хуэдэ проектми, къатщтэ унафэми экологиер къыщылъытауэ щытын хуейм и закъуэкъым, атIэ абы япэ увыпIэр щиIыгъын хуейщ дэтхэнэ IэнатIэми (ар промышленнострауи, мэкъумэш-промышленнэ комплексрауи, ухуэныгъэрауи, н.къ. щрырет).
Сыт и лъэныкъуэкIи зэIузэпэщ икIи екIурабгъу уасэ зиIэ псэупIэ ухуэныр, зыгъэпсэхупIэ, спортым зыщыхуагъасэ щIыпIэхэр къызэгъэпэщыныр, гъуэгу, уэрам екIухэр укъуэдииныр - ахэрщ цIыхухэм я псэукIэр егъэфIэкIуэнымрэ зэрыщыту экономикэм зегъэужьынымрэ я Iыхьэ нэхъыщхьэхэр.
УхуэныгъэщIэхэр, хьэблэщIэхэр щаухуэну щIыпIэхэр къыхэхыным, проектыфIхэр зэхэлъхьэным егугъупхъэщ.
Апхуэдэ щапхъэфIхэр щыIэщ (Мей, КъуэкIыпIэ хьэблэхэр, нэгъуэщIхэри а щIыкIэм тету яухуэ).
Дызэрыт илъэсым къриубыдэу дэ духуэу ттын хуейщ псэупIэ метр зэбгъузэнатIэ мин 513-рэ. 2030 гъэм ирихьэлIэу а бжыгъэр зы илъэсым къриубыдэу метр зэбгъузэнатIэ мин 761-м нэдгъэсыну ди мурадщ. ИлъэсипщIым къриубыдэу псори зэхэту псэупIэу духуэр метр зэбгъузэнатIэ мелуани 7-м нэсыну яубзыхуащ. Мыбдежым къалэн нэхъыщхьэу щыщытыр псэу- пIэу ящIым и фIагъым хэгъэхъуэным-рэ абы и уасэр нэхъ пуд щIынымрэщ.
ПсэупIэ къэзыщэхуну хуейхэмрэ ар зыщэхэмрэ зэхуэдэу дэзыхьэхын ефIэкIыныгъэхэр хэлъщ унэр ипотекэкIэ къэщэхуным. Республикэм исхэм ящыщу цIыху мини 4-м илъэс кIуам а Iэмалыр къагъэсэбэпри, я псэупIэхэр ирагъэфIэкIуащ. Ар 2019 гъэм зэрыщытам нэхърэ процент 38,5-кIэ нэхъыбэщ. Апхуэдэ мурадкIэ ахъшэу къыIахар процент 45-м нэблагъэкIэ нэхъыбэщ икIи сом меларди 8,8-м щIегъу. ИпотекэкIэ унэ къращэхуну цIыхухэм щIыхуэу иратым хэгъэхъуэныр Iэмал нэхъыщхьэхэм ящыщщ 2030 гъэм ирихьэлIэу псэупIэ ухуэн IэнатIэм щызэфIэдгъэкIыну дубзыхуахэм дынэсынымкIэ. ИкIи а унэтIыныгъэм нэхъ жыджэру дыщылэжьэн хуейщ.
Правительствэмрэ муниципалитетхэмрэ я къалэнщ мардэ нэхъыфIхэм хуэкIуэ проектыщIэхэр гъэхьэзырыныр, псэупIэ ухуэным тегъэгушхуэныр, цIыхухэм ахэр къащэхуфын папщIэ къэралым зэрызащIигъэкъуэфыну Iэмалхэр къэлъыхъуэныр, апхуэдэ хэкIыпIэу щыIэхэр къагъэнэIуэныр.
Гъуэгухэр, псэупIэхэр ухуэныр экономикэм зегъэужьыным, цIыхухэр IэнатIэщIэхэмкIэ къызэгъэпэщыным хуэщхьэпэнущ - ухуэныгъэм ирахьэлIэ материалхэр къыщIэгъэкIынми, езы ухуэныгъэхэми хэтыным къыщыщIэдзауэ сатум, Iуэхутхьэбзэ зэмылIэужьыгъуэхэр щIэным, хьэрычэт IэнатIэ мыиным хыхьэ IуэхущIапIэхэр хьэблэщIэхэм къыщызэIухыным, гъуэгущIэхэм я гъунэхэм къыщызэрагъэпэщыным нэсу.
Жьы хъуа, ущыпсэуну дзыхьщIыгъуэджэ унэхэм мы илъэсым къыщIэдгъэIэпхъукIыну къытпэщытщ цIыху 750-рэ, а лэжьыгъэм сом мелуан 480-рэ хухахащ.
Дэ ди пщэ къыдохуэ цIыхухэр гугъу езыгъэхь нэгъуэщI зы Iуэхуи зэфIэдгъэкIыну - ар илъэсипщI бжыгъэ хъуауэ дызыпэмылъэщ къалэнщ - общежитхэм щIэсхэр къыщIэгъэIэпхъукIынырщ, апхуэдэуи сабий зеиншэхэм псэупIэ етыным хуэгъэпса программэр гъэзэщIэным дыкъызэрыщыкIэрыхур гъэзэкIуэжынырщ.
Дызэрыт илъэсым яубзыхуакIэщ сабий зеиншэхэм, адэ-анэхэм я нэIэ щIэмытыжу къэна ныбжьыщIэхэм папщIэ псэупIи 107-рэ къащэхуну. А къалэныр дэгъэкIыным трагъэкIуэдэнущ сом мелуани 110,4-рэ, абы щыщу сом мелуан 37-р республикэ бюджетым къыхэкIынущ. А Iуэхур зэфIэкIыным иджыри мылъку къыхуэлъыхъуэн хуейщ икIи лэжьыгъэр щIэгъэхуэбжьапхъэщ, социальнэ мыхьэнэшхуэ зиIэ къалэным унафэ тэмэм игъуэтын папщIэ.
А къалэнышхуэхэри, псэупIэ-коммунальнэ хозяйствэми ухуэныгъэ IэнатIэми къыщытпэщытхэри зэфIэдгъэкIыным текIуэдэну мылъкур къыздикIынур нэхъ иужькIэ къэзгъэнэIуэнущ.
Иджы мы зэманым ирихьэлIэу япэ идгъэщыпхъэхэм ящыщу къэтлъытэ IэнатIэхэм, Iуэхутхьэбзэ щIэным зэрызедгъэужь щIыкIэм сыкъытеувыIэнщ.
1. Промышленностыр.
Мыбдежым гулъытэ нэхъыщхьэ зыхуэтщIынур технологие лъагэхэр къыщагъэсэбэп, щIэныгъэр зи лъабжьэ, экологиеми тегъэпсыхьа лэжьэкIэщIэхэрщ, фейдэшхуэ къэзытхэу щIыуэпсми зэран хуэмыхъухэрщ. Ахэр электроникэ IэнатIэрщ, медицинэ Iэмэпсымэхэр къыщIэгъэкIыным, приборхэр зэпкърылъхьэным хуэунэтIахэрщ.
Правительствэм и къалэнщ а унэтIыныгъэхэм зегъэужьыным инвестицэхэр къешэлIа хъун папщIэ зыхуэфащэ мардэхэр щыубзыхуа дэфтэрхэр зэхилъхьэну, текIуэдэну ахъшэр къызыхэкIынухэр, зыхуеину нэгъуэщI щытыкIэхэр къызэригъэпэщу республикэм и экономикэм а и IэнатIэхэм зезыгъэужьыну Iэмалхэр хузэтриухуэну.
Апхуэдэуи зыхуей щытыкIэ псори къызэригъэпэщыпхъэщ цIыхухэр егъэджэным къыщыщIэдзауэ IT-технологие IэнатIэм лэжьыгъэ щагъуэтыным нэсу.
Апхуэдэуи гулъытэ хэха зыгъуэтыпхъэу къызолъытэ промышленность псынщIэм, хэхауэ жыпIэмэ, текстильнэ IэнатIэм, зегъэужьыныр.
Илъэс кIуам дэ унафэ къэтщтащ Къэбэрдей-Балъкъэр Республикэм и ШэсыпIэ фондым щIыналъэм и промышленностым зегъэужьыным и фондым и хуитыныгъэхэр етыным теухуауэ. Мыхьэнэшхуэ иIэщ фондым и мылъкур IэнатIэм зегъэужьыным къыхуэгъэсэбэпыным, псом япэрауи, лэжьыгъэм къыпэкIуэм хэгъэхъуэн и лъэныкъуэкIэ. А псом къадэкIуэу, республикэм и Правительствэм и пщэ дэлъщ Урысейм промышленностым зегъэужьынымкIэ и фондым нэхъ пыщIауэ дэлэжьэну, ди IуэхущIапIэхэм зэрызащIэдгъэкъуэну мылъку къытхуаутIыпщыным хуэунэтIауэ.
Мы гъэми пыщIэн хуейщ Тырныауз вольфрам-молибден къыщIэхыпIэр лажьэу егъэжьэжыным, «Телемеханика»-м къыщыщIагъэкI продукцэм и лIэужьыгъуэми и куэдагъми хэгъэхъуэным хуэгъэзауэ ирагъэкIуэкI лэжьыгъэхэм.
2. Мэкъумэш IэнатIэр.
Мэкъумэш IэнатIэм къалэн нэхъыщхьэу щыдиIэр дэтхэнэ щIы гектарми фейдэ нэхъыбэ къегъэтынырщ, апхуэдэуи мэкъумэшхэкIхэм тэмэму елэжьынырщ. Апхуэдэхэщ, хадэхэкI, пхъэщхьэмыщхьэ, къапщтэмэ, мэракIуэхэкIхэр гъэкIыныр, абы папщIэ фейдэшхуэ къызыпэкIуэ иджырей Iэмалхэр къэгъэщхьэпэныр. Абы Iэмал къитынущ текIуадэр нэхъ мащIэу щIыр нэсу гъэлэжьэнымрэ, нэхъыщхьэращи, цIыхухэри IэнатIэкIэ къызэгъэпэщынымкIэ.
Республикэм Мэкъумэш хозяйствэмкIэ и министерствэм и къалэнщ а IэнатIэм дуней псом щынэхъыфI лэжьэкIэхэр къыщигъэсэбэпыныр. Мыхьэнэшхуэ иIэщ республикэм щыпсэухэр, хьэрычэтыщIэхэри уней IуэхущIапIэхэр зиIэхэри, мы лэжьыгъэм къыхэшэным. Гулъытэ щхьэхуэ зыхуэщIыпхъэ нэгъуэщI унэтIыныгъэщ Iэщ лъэпкъыфI гъэхъуныр, республикэм лы папщIэу щагъашхэ былымхэм, жэм къашхэм я щхьэ бжыгъэм хэгъэхъуэныр, абыхэм хъеру къатыр гъэбэгъуэныр. Мыбдежми щIэныгъэр и лъабжьэу Iуэхур зэтеухуэн хуейщ икIи абы и фIыгъэ- кIэ нэхъыбэ пхуэщIынущ IэнатIэм хъеру къитымрэ продукцэм и фIагъымрэ.
Мэкъумэш IэнатIэм дэIыпыкъуныгъэу игъуэтым илъэс къэс хохъуэ. Гъэ кIуами а хабзэм дытетащ. IэнатIэмрэ къуажэхэмрэ зегъэужьыным хухэтхащ сом меларди 2-рэ мелуан 750-рэ. Ар 2019 гъэм елъытауэ проценти 146-рэ мэхъу. Мылъкур къызэрыдэмэщIыкIым къыхэкIыу иджыпсту гугъуехьхэр зэрыщыIэм щхьэкIи къэмынэу, унэтIыныгъэ нэхъыщхьэхэм къэрал дэIэпыкъуныгъэу ягъуэтыр дгъэмащIэ хъунукъым. Абы и мызакъуэу, АПК-м къыщалэжьым адэкIи хэгъэхъуэныр къызэзыгъэпэщыну Iэмалхэр къэгъуэтыпхъэщ. Псом япэрауэ, абы папщIэ хуекIуэн хуейщ щIым псы щIэгъэлъэдэн Iэмалым, апхуэдэуи мэкъумэшхэкIхэр къэлэжьыным хэпщапхъэщ зэман кIэщIкIэ фейдэ къызыпэкIуэну технологиехэр.
Дэ илъэс къэс абы проценти 10 нэхърэ мынэхъ мащIэкIэ хэдгъэхъуэн хуейщ. Апхуэдэу дегугъумэщ 2024 гъэм и кIэм ирихьэлIэу дыздынэсын хуейуэ дубзыхуахэр щызэдгъэхъулIэфынур.
Пхъэщхьэмыщхьэ къехьэлIэнымкIэ дэ бжьыпэр щыдубыдащ Урысей Федерацэ псом. Апхуэдэу щытми, дыздынэсам дыкъыщыувыIэ хъунукъым. Республикэм зыхуеину псори иIэщ жызум гъэкIыным зегъэужьын и лъэныкъуэкIи. Нэхъапэм а IэнатIэм щыдиIа ефIэкIыныгъэхэр къэдгъэсэбэпурэ ехъулIэныгъэщIэхэр къэтхьынми мыхьэнэшхуэ иIэщ.
Апхуэдэу хэплъэн хуейщ шы гъэхъуным зегъэужьыжыным яужь итхэм зэрызащIэдгъэкъуэфыну щыIэ хэкIыпIэхэми.
Правительствэм зыхузогъазэ, а псори зэпилъыту, зыхуэфащэ хэкIыпIэхэр къигъэлъэгъуэну.
Къэралыр къазэрыдэIэпыкъум IуэхущIапIэхэр тригъэгушхуэн хуейщ ерыскъыпхъэхэр къыщIэгъэкIыным, икIи, икIэм-икIэжым, зэлэжьыжын хуей продукцэм къыпыкIыу, сыткIи зыхуей хуэза, уасэ тэмэми къызыпэкIуэнухэр ягъэхьэзырыным хуэкIуэу ахэр къыщIэупщIэхэм хурагъашэу зэтеухуапхъэщ.
Къалэн нэхъыщхьэхэм ящыщу къонэж къуажэхэм зегъэужьынымрэ жылэдэсхэм защIэгъэкъуэнымри. КъэкIуэну илъэсхэми пащэнущ къуажэхэм псэупIэхэр щыухуэным, гъуэгухэр щыукъуэдииным, клубхэмрэ щэнхабзэмкIэ унэхэмрэ, медицинэ IуэхущIапIэхэр, еджапIэхэр щыщIыным теухуауэ екIуэкI лэжьыгъэхэм, ахэр газрэ псыкIэ къызэрызэгъэпэща щIыкIэр егъэфIэкIуэным.
«Къуажэхэм зегъэужьыныр» къэрал программэм къит Iэмал псори нэсу къэгъэсэбэпын хуейщ. А программэм ипкъ иткIэ социальнэ мыхьэнэ зиIэ проектхэр, Пролетарскэ, Солдатскэ къуажэхэм, Къэщкъэтау къалэ щIыналъэм зегъэужьыным ехьэлIахэр, мы гъэм ягъэзэщIэну траухуащ. А лэжьыгъэхэм хухахащ сом мелуани 180-м щIигъу.
Ауэ куэдкIэ нэхъыбэщ зэхалъхьауэ дэ диIэ проектхэм я бжыгъэр - ди къалэныр ахэр гъэзэщIэн папщIэ мылъкур тэмэму ятедгуэшэнырщ.
3. Шэч хэмылъу,туризм IэнатIэри къыхэгъэщыпхъэщ.
Къэбэрдей-Балъкъэрым зегъэужьынымкIэ мыхьэнэшхуэ дыдэ зиIэ унэтIыныгъэхэм ящыщу къонэж туризм IэнатIэр. Илъэс кIуам, ягъэува мардэ ткIийхэм щхьэкIи къэмынэу, республикэм щыхьэщIащ цIыху мин 540-рэ, абыхэм я нэхъыбэм Iуащхьэмахуэ лъапэ зыщагъэпсэхуащ.
Зэман гъунэгъум яухуэну я мурадщ кIапсэ гъуэгуищ, бгым лыжэкIэ къежэхыным хуэщIа трассэу 9, псоми зэхэту километри 10 я кIыхьагъыу, апхуэдэу машинэ 800 зэуэ щыбгъэув хъуну щIыпIэ. Абыхэм къадэкIуэу, зыхуей хуагъэзэнущ Азау хуейр, бгылыжэ инфраструктурэр электрокъарукIэ къызэгъэпэщыным теухуа лэжьыгъэхэр зэфIагъэкIынущ. АдэкIи инвестицэхэр нэхъ щIэгъэхуэбжьауэ къешэлIэн хуейщ ди дежкIэ мыхьэнэшхуэ зиIэ а IэнатIэм, туризмэм къыщыщхьэпэну объектыщIэхэр щIын, тыншыпIэхэм зегъэужьын, хьэщIагъэм епха Iуэхухэр нэхъри егъэфIэкIуэн хуейщ.
Лъэпкъ проектыщIэм хыхьэу туризм IэнатIэм зэман гъунэгъум яужь щихьэнущ худачыхыу щIыхуэхэр тыным икIи абы и фIыгъэкIэ хьэщIэщыщIэхэр ухуэным, щыIэхэр къэгъэщIэрэщIэжыным, туризмэм ехьэлIа нэгъуэщI инфраструктурэхэм зегъэужьыным елэжьыфынущ. Апхуэдэ щIыхуэхэр илъэс 15 пIалъэм тещIыхьащ икIи щхьэщатыкIынур процентищ-тху хуэдизщ. А Iэмалхэр нэсу къыхуэгъэсэбэпыпхъэщ ди турист-рекреацэ комплексым зиужьыным, псом япэрауи, Налшык зыгъэпсэхупIэм и псы хущхъуэ IэзапIэхэр къэгъэщIэрэщIэжыным. Илъэс гъунэгъухэм къэув къалэнхэм ящыщщ ди зыгъэпсэхупIэхэм зэуэ цIыху мини 10 къедгъэблэгъэфу Iуэхур зэтедухуэныр. Ар тхузэфIэкIмэ, илъэс къэс цIыху мини 150-м ди деж зыщагъэпсэхуфынущ. Абы и фIыгъэкIэ цIыху мин 50 хуэдизым IэнатIэ ягъуэтынущ.
Къэрал мылъкум хыхьэ ухуэныгъэхэр фейдэ нэхъыбэ къызэратыным хузэтеухуапхъэщ, IэнатIэм щыщ IуэхущIапIэхэу мылъку зыбгъэдэмылъыжу къалъытахэр а щытыкIэм къишыпхъэщ, адэкIи лэжьэн хуэдэу зэрагъэпэщыжын папщIэ.
Апхуэдэуи дэ лэжьыгъэ пыухыкIахэр идогъэкIуэкI туризм IэнатIэм и зэфIэкIым хэгъэхъуэным хуэунэтIауэ, Шэрэдж, Шэджэм, Дзэлыкъуэ щIыналъэхэм тур-кластерым зыщыдогъэужь.
Правительствэм къалэн щызощI бадзэуэгъуэм и 1-м ирихьэлIэу чэнджэщхэр къыхилъхьэну а IэнатIэм фейдэ къиту гъэлэжьэным теухуауэ, абы зегъэужьынымкIэ чэнджэщхэр къигъэнэIуэну.
Апхуэдэ щIыкIэкIэ, ар къыхэзгъэщхьэхукIыну сыхуейщ, технологие лъагэхэр зи лъабжьэ промышленнэ, мэкъумэш IуэхущIапIэхэр, иджырей туристическэ IэнатIэ къызэгъэпэщыныр увын хуейщ, сэ къызэрыслъытэмкIэ, илъэс гъунэгъухэм дызэлэжьыпхъэ унэтIыныгъэ нэхъыщхьэхэу. А мурадхэр гъэзэщIэным ерыщу дыхуэкIуэкIэрщ, ди республикэм зедгъэужькIэрэщ ар Урысей Федерацэм и щIыналъэ нэхъ пажэхэм зэралъэщIэдгъэхьэфынур.
Шэч хэмылъу, а мурадым улъэIэсыфынукъым, инвестицэхэр лэжьыгъэм къыумышалIэмэ. Илъэс кIуам инвестицэхэу мылъку нэхъыщхьэм къыхалъхьахэр сом мелард 50 хъууэ щытащ, ар 2019 гъэм елъытауэ проценти 103,6-рэ хъурт.
Ивестицэхэр нэхъыбэ щIынымкIэ къалэн нэхъыщхьэхэр зи пщэ къыдэхуэр Урысей Федерацэм и банк IэнатIэрщ.
Дэ ди къалэнщ къэралым къыдит дэтхэнэ зы сомри зэгъэзэхуауэ къэдгъэсэбэпыну. Республикэм и экономикэм къэралым хилъхьэ дэтхэнэ зы сомми хуэзэу инвестицэ соми 10 къетшэлIэн хуейщ. Арыншэмэ, дэ ехъулIэныгъэ диIэнукъым.
Дэ тхузэфIэкI къэдгъэнэнукъым хьэрычэт IэнатIэ мыинымрэ куры-тымрэ зедгъэужьынымкIи.
Къэбэрдей-Балъкъэр Республикэм Экономикэ зыужьыныгъэмкIэ и министерствэр нэхъ жыджэру яужь итыпхъэщ хьэрычэт IэнатIэ мыинымрэ курытымрэ зегъэужьыным хуэгъэза Iуэхухэр зэфIэгъэкIыным. IуэхущIапIэхэм чэнджэщ тэмэм ягъуэтынымкIи мылъкукIэ защIэгъэкъуэнымкIи. ЩыIэ къэрал дэIэпыкъуныгъэхэр зыхуэдэм ахэр щыгъэгъуэзэным и мызакъуэу, хьэрычэт жэрдэм зыхэлъ, зыгуэр зыщIэну, лэжьэну хуей дэтхэнэри, жыпIэнурамэ, абы «ешэлIэн», «хуэунэтIын» хуейщ. ЩытыкIэм елъытауэ, езыхэм я фIэфIыныгъэм тещIыхьауэ, хьэрычэтыщIэхэм зэрадэIэпыкъу хабзэхэм зэкъуэкIыныгъэхэр хэлъхьэн, я лэжьыгъэр егъэфIэкIуэн хуейщ. Ар зи къалэныр Экономикэ зыужьыныгъэмкIэ министерствэм и закъуэкъым, атIэ Iуэхум апхуэдэ щIыкIэкIэ бгъэдыхьэн хуейщ республикэм и дэтхэнэ министерствэри.
Сэ хьэрычэт IэнатIэ мыинымрэ курытымрэ я гугъу щIэсщIыр сыт. Зи щхьэ Iуэху зезыхуэжыф цIыху нэхъыбэ республикэм исын папщIэщ икIи ахэр экономикэм лъабжьэ хуэхъун щхьэкIэщ - туризмэми Iуэхутхьэбзэ щIэн IэнатIэми, технологиехэми, мэкъу- мэш хозяйствэми къыщыщхьэпэнущ ахэр.
Фэ зэрыфщIэщи, 2021 гъэм и бюджет къащтар дызэремысауэ ткIийщ икIи гугъущ. А псом къадэкIуэу ар цIыхум хуэгъэзауэ къонэж. Социальнэ политикэм, егъэджэныгъэм, узыншагъэр хъумэным, щэнхабзэмрэ спортымрэ республикэ бюджетым и процент 74-рэ трагъэкIуэдэнущ.
Дэ щIэх-щIэхыурэ къыдэупщIырт: сыт къэрал щIыхуэр дгъэмэщIэным апхуэдэу жыджэру яужь дыщIитыр. Бюджет кодексым ар дымыгъэмэщIэжыну хуит дищIми. Япэрауэ, - сэ жысIащ - дэ коммерцэ щIыхуэхэр къэщтэным дыкъыпыкIащ. Дэ апхуэдэ ттелъкъым икIи абы пэкIуэ Iуэхутхьэбзи тщIэжыркъым. Дэ ттелъыжыр Урысей Федерацэм и бюджетым къеIытхахэрщ. Ахэр пщIэншэу къэплъытэ хъунущи, зыгуэр щхьэщыттыкIыркъым. Фэ фыщыгъуазэу къыщIэкIынщ Урысей Федерацэм и Президентым Федеральнэ Зэхуэсым Зэрызыхуигъазэм щиубзыхуам: щIыналъэ зыбжанэм коммерческэ щIыхуэхэр ящхьэщыхыным теухуауэ унафэ ищIащ. Дэ апхуэдэу зыхудачыхахэм дащыщкъым. ЖысIэну сызыхуейращи, ар икIи нэхъыфIщ. Ар тэмэмщ.
Ауэ дэ дахэхуащ нэгъуэщI щIыналъэхэм, инфраструктурэ проектхэм трагъэкIуэдэну щIыхуэхэр бюджет мылъкум къыхэкIыу зратынухэм. СыщыуэнкIи хъунущ, ауэ къыIахым и проценти 10 хуэдиз хуэзэу. Къэрал щIыхуэхэр гъэмэщIэным дызэрегугъуам и фIыгъэкIэ дэ Iэмал къыдатынущ къэрал щIыхуэу, бюджетым щыщу сом мелардитху нэхърэ мынэхъ мащIэ къыдэтхыну. Жылэхэр псыкIэ къызэгъэпэщыным, ухуэныгъэм теухуауэ зи гугъу сщIахэр тхуэгъэзэщIэнущ, сыту жыпIэмэ, апхуэдэ Iэмал диIэщи. Къэралым къыщащта унафэхэм ахэр зэдгъэхъулIэфыну Iэмал къыдат икIи а псори нэгъэсауэ дэ къытхуэгъэсэбэпынущ. Аращи, илъэс блэкIахэм «дибгхэр зэрыщIэткъузар» зэран къытхуэхъуакъым. Нобэ дэ ар къытщхьэпэжынущ икIи ар нэсу къэдгъэщхьэпэнщ.
Республикэм и экономикэм и IэнатIэхэм ящыщу нэхъ зызыужьхэм ятеухуауэ псалъитI-щы. Хьэрычэт IэнатIэ мыиным зеужь. 2021 гъэм и япэ мазиплIым Къэбэрдей-Балъкъэрым и хэхъуэр илъэс блэкIам и апхуэдэ лъэхъэнэм елъытауэ процент 25-м щIигъукIэ нэхъыбэ хъуащ. Нэхъ зэхэщIыкIыгъуэ хъун щхьэкIэ - ар сом мелуан 750-рэ хуэдиз мэхъу. Аращ сэ щIыжысIэр: ди деж зыщеужь хьэрычэт IэнатIэ мыинымрэ курытымрэ, мэпсэу. Сыту жыпIэмэ, хьэрычэт IэнатIэ мыинымрэ курытымрэ налогыу ятар япэ мазиплIым къриубыдэу проценти 180-м нэблагъэ хъуащ. Ар и щыхьэткъэ республикэм зэрызиузэщIым.
ИщхьэкIэ къыщызгъэлъэгъуа къалэнхэр пхузэфIэгъэкIынукъым, жылагъуэ зэпIэзэрытыныгъэ щымыIэмэ, унафэ тэмэм хэкум имылъмэ.
Властым и органхэм, щIыпIэ унафэр зегъэкIуэнымкIэ органхэм, хабзэхъумэ IэнатIэхэмрэ граждан жылагъуэм и институтхэмрэ зэкъуэту зэрызэдэлажьэм и фIыгъэкIэ жылагъуэ-политикэ зэпIэзэрытыныгъэ республикэм щыIэщ. Апхуэдэу щытми, а IэнатIэм зэпымыууэ я нэIэ трагъэтын хуей мэхъу, жылагъуэ зэхэтыкIэр къэзыгъэутхъуэну хущIэкъу къарухэр зэрыщыIэм къыхэкIыу.
Жылагъуэм щызэтеухуа псэукIэр зэIызыгъэхьэну, хабзэ хъуауэ лъэпкъхэм къадекIуэкI псэкупсэ-хабзэ лъапIэныгъэхэм елъэпэуэну яужь итхэр, лъэпкъхэм, дин зэмылIэужьыгъуэхэр зезыхьэхэм яку дэлъ зызэхэщIыкIыныгъэмрэ зэгурыIуэныгъэмрэ къэзыгъэтIэсхъэну хуейхэм я IуэхущIафэхэр дяпэкIи къызэпыудын хуейщ.
ЩIэпхъаджагъэхэм я бжыгъэр нэхъ мащIэ хъуми, а Iуэхум адэкIи гулъытэ хэха хуэщIын хуейщ. Хабзэр, шынагъуэншагъэр къызэгъэпэщыныр къалэн нэхъыщхьэ дыдэхэм ящыщщ. Ар ехьэлIащ къэрал IэнатIэхэми, хабзэхъумэ органхэми, зэрыщыту жылагъуэми.
Дгъэува къалэнхэр зэгъэхъулIэнымкIэ, республикэм шэщIауэ зиужьынымкIэ, ди цIыхухэм я псэукIэр егъэфIэкIуэнымкIэ шэсыпIэ нэхъыщхьэу щытыр жылагъуэ зэгухьэныгъэхэм быдэу япыщIауэ ядэлэжьэнырщ. Абы хуэунэтIа сыт хуэдэ жэрдэмри Iуэхури дэ дэтIыгъынущ.
ЩIалэгъуалэ политикэм щынэхъыщхьэ къалэныр гъащIэм лъэ быдэкIэ хэувэнымкIэ щIэблэм Iэмал нэхъыбэ яIэнырщ. Ар зэдгъэхъулIэн папщIэ дэ щIалэгъуалэ псоми дадэлэжьэн хуейщ, я зэфIэкIыр къызыкъуахыным, екIуу зыкъагъэлъэгъуэным, я хьэл-щэн нэхъыфIхэр наIуэ къащIыным, я мурадхэр гъащIэм хапщэным, ехъулIэныгъэхэр зыIэрагъэхьэным хуэунэтIауэ.
Правительствэм пщэрылъ щызощI республикэм щекIуэкI щIалэгъуалэ политикэмкIэ жэуап зыхь гъэзэщIакIуэ властым и зэхэлъыкIэр нэхъри игъэлъэщыну, абы папщIэ зыхуэфащэ чэнджэщхэр къыхилъхьэну.
Къыхэзмыгъэщын слъэкIынукъым ди Парламентым и депутатхэр 2020 гъэм хъарзынэу зэрылэжьар. Дызэгъусэу дэ къэтщтащ республикэм и экономикэ, социальнэ, жылагъуэ псэукIэр зэкIэлъызыгъакIуэ закон куэд.
СыныволъэIу адэкIи фи нэIэ тевгъэтыну мы зэманым ирихьэлIэу гулъытэ нэхъ зыгъуэтыпхъэу къэтлъытэ Iуэхухэм. Псом япэрауэ, зи гугъу сщIыр урысейпсо IэIэтым ипкъ иткIэ Конституцэм игъуэта зэхъуэкIыныгъэхэр гъэзэщIа хъуным ехьэлIа законхэрщ. А зэхъуэкIыныгъэхэр, лъэпкъ проектхэми хуэдэ дыдэу, зыхуэгъэзар къалэн нэхъыщхьэр - цIыхухэм я псэукIэр сыт и лъэныкъуэкIи егъэфIэкIуэныр - зэгъэхъулIэнырщ.
А къалэныр дэгъэкIыным фи нэIэ тевгъэтыну зыфхузогъазэ - властым и къудамэ псоми, абы Парламентри хэту.
Къэралым и Конституцэм халъхьа зэхъуэкIыныгъэхэм ягъэлъэщ щIыпIэ унафэр зегъэкIуэнымкIэ органхэм я хуитыныгъэхэмрэ Iэмалхэмрэ, властым и къэрал, муниципальнэ органхэр сэбэпынагъ нэхъыбэ къату зэдэлэжьэнымкIэ хэкIыпIэхэр къахузэрегъэпэщ. Къытпэщытщ щIыпIэ унафэр зегъэкIуэнымкIэ органхэм я къызэгъэпэщыныгъэ, финанс лъабжьэхэм дыхэплъэжыну, абыхэм я социально-экономикэ къалэнхэр дубзыхуну.
Ар псом хуэмыдэу нэхъ ехьэлIащ къуажэхэм я муниципалитетхэм. Абдежщ зи чэзу Iуэхухэр, цIыхухэм зыкъызэрыхуагъазэхэр щызэфIагъэкIыр, жылэхэм я псэукIэр зыхуэдэнур щызэтраухуэр, цIыхухэм Iуэхутхьэбзэр щыхуащIэр. А Iуэхухэр дэгъэкIыным жылагъуэхэм я унафэщIхэм яхуегъэув IэщIагъэлI нэсу щытыну, жэуаплыныгъэ хэлъу сыт хуэдэ къалэнми бгъэдыхьэну.
Иджы, къэрал властым и убзыхукIэр дэнэ щIыпIи щызэхуэдэу щытыныр Урысейм и Конституцэм щIэгъэбыда щыхъуа зэманым, абыхэм ящыщ дэтхэнэми ди гъусэу жэуап ихьын хуейщ щIыналъэхэм зегъэужьынымкIи, цIыхухэм я псэукIэр зыхуэдэмкIи. Жылэхэм я унафэщIхэм захузогъазэ дяпэкIэ я лэжьыгъэм а мардэхэм щытетыну.
Дызэрыт илъэсым и фокIадэм екIуэкIынущ Урысей Федерацэм и Къэрал Думэмрэ республикэм щIыпIэ унафэр зегъэкIуэнымкIэ и органхэмрэ хэтынухэр хэхыным теухуа IэIэтхэр. Дэ псоми ди сэбэп хэлъщ ахэр зэIухауэ, захуагъэм тету, зэхьэзэхуэр и лъабжьэу екIуэкIыным.
Дыщыгугъынщ апхуэдэ дыдэ Iуэху еплъыкIэм ди жылагъуэ-политикэ зэгухьэныгъэхэри, хэхыныгъэм хэтыну псори тетыну.
Мы Зэрызыфхуэзгъазэм къыщыгъэлъэгъуа мурадхэмрэ къалэнхэмрэ, зэманым къигъэувхэр зэфIэгъэкIыным къэрал бгъэдыхьэкIэщIэ хэлъын хуейщ.
Къэралым и Президентым дэ къытхуигъэуващ къэрал Iуэхутхьэбзэу цIыхухэм хуащIэхэм я нэхъыбапIэр зэпэIэщIэу, жэщ-махуэ ямыIэу, сыхьэт 24-м къриубыдэу, нэгъуэщIу жыпIэмэ зэпымыууэ, зэфIагъэкIыу зэтраухуэныр илъэсищым къриубыдэу зэдгъэхъулIэн хуейуэ. Дэ ди пщэ къыдохуэ а къалэныр фIагъ хэлъу икIи и пIалъэм зэфIэдгъэкIыныр. Республикэм къэрал, муниципальнэ Iуэхутхьэбзэхэр цIыхухэм электрон IэмалкIи щыхуащIэу лэжьыгъэр щызэтеухуащ.
Къэрал унафэр зегъэкIуэн лэжьыгъэм бжыгъэр зи лъабжьэ технологиехэр адэкIи къыщыгъэсэбэпыпхъэщ, зыуэ щыт бжыгъэ платформэм, хъыбарегъащIэ, экономикэ аналитикэхэр, социальнэ коммуникацэхэр къызэщIэзыубыдэм, нэхъри зегъэужьыпхъэщ. Ар дэ къытхуэщхьэпэнущ щIыпIэхэм щыIэ щытыкIэхэм щыгъуазэ дыхъунымкIэ икIи псынщIэу абыхэм унафэ ятетщIыхьынымкIэ.
Мыхьэнэшхуэ дыдэ зиIэ къалэну илъэс къэкIуэнухэм къонэж къэрал унафэ щIыным сэбэп щыхъуфынухэмкIэ а IэнатIэр гъэлъэщыныр, къэрал, муниципальнэ къулыкъущIапIэхэм щылэжьэфынухэр абы хуэгъэхьэзырыныр. А мурадыр зэдгъэхъулIэн папщIэ дэ едгъэфIэкIуэн хуейщ къэрал властым и орган псоми я лэжьакIуэхэр я IэщIагъэм нэхъ хуэIэзэ хъун папщIэ абы и щэхухэм хуегъэджэнымкIэ щыIэ Iэмалхэр, икIи я лэжьыгъэмкIэ, къащтэ унафэхэмкIэ жэуап яхьу Iуэхур зэтеухуэныр.
Къэрал къулыкъущIэ псоми щапхъэ ягъэлъэгъуэн хуейщ я хьэл-щэнкIэ, я зэпIэзэрытагъкIэ, цIыхубэм зыкъыхамыгъэщхьэхукIыу зэрыпсэумкIэ.
Апхуэдэ Iуэху бгъэдыхьэкIэр къыддэзымыIыгъхэм властым щащIэн щыIэкъым.
ЗэIухауэ щытыныр, зыIууэ гугъуехьхэр дагъэкIынымкIэ щIэгъэкъуэн дахуэхъуныр - мис аращ цIыхухэр къэрал властым и органхэм къызэрытщыгугъыр. Дэ къэдгъэсэбэпыпхъэщ бэм япыщIауэ дыщытыным хуэунэтIа иджырей Iэмал псори. Абы папщIэ, къэралым и Президентым къалэн къызэрытщищIам тету, дэ къызэдгъэпэщащ ЩIыналъэм унафэ хуэщIынымкIэ центр. Абы Iэмал къет Къэбэрдей-Балъкъэрыр зэрыпсэу щIыкIэр онлайн-мардэм тету тлъагъунымкIэ. ЦУР-р хоплъэ хъыбарыщIэ бжыгъэншэхэм икIи цIыхухэм зыкъызэрытхуагъазэ сыт хуэдэ Iуэхуми дэ хыдолъагъуэ ахэр зыхэт гугъуехьхэр, а ныкъусаныгъэхэр псынщIэу гъэзэкIуэжынми догугъу. Дэ цIыхухэр зэIухауэ щыгъуазэ тщIын хуейщ республикэм къыщекIуэкIхэмрэ властым и органхэр зэрылажьэмрэ. Мыбдежым абыкIэ мыхьэнэшхуэ иIэщ хъыбарегъащIэ IэнатIэм.
Республикэм и СМИ-р лэжьэн, IэнатIэм зиужьын папщIэ зэманым къигъэувхэм хуэкIуэ щытыкIэхэр къыхузэгъэпэщын хуейщ.
Правительствэм къалэн щызощI СМИ-м зегъэужьыным хуэунэтIауэ зыхуэфащэ Iуэхухэр дызэрыт илъэсым и бадзэуэгъуэм и 1-м ирихьэлIэу зэхилъхьэну, абы и лэжьакIуэхэм я лIыкIуэхэм я Iуэху еплъыкIэхэри къэлъытауэ.
Апхуэдэу щытми, зи гугъу тщIа псоми дызыщыгугъхэр кърикIуэнукъым, властым и органхэм я лэжьыгъэм ехъулIэныгъэфIхэр щызыIэрамыгъэхьэмэ. Абы папщIэ зэпымыууэ хэгъэхъуапхъэщ къулыкъу пэрытхэм, къэрал аппаратым и дэтхэнэ лэжьакIуэми жэуаплыныгъэу яхэлъым, апхуэдэуи абыхэм зыхащIэн хуейщ я къалэнхэр, пщэрылъ щащIахэр зэфIагъэкIыным и мыхьэнэр, къащтэ унафэхэр гъэзэщIа зэрыхъур кIэлъыплъыныгъэ ткIийм щIэтын зэрыхуейр. Республикэм и Правительствэмрэ КъБР-м и Iэтащхьэм и Администрацэмрэ я нэIэ тетыпхъэщ властым и къудамэ псоми хэтхэм я щхьэкIэ яхэлъ дисциплинэм, я лэжьыгъэм зэрегугъум, къалэн щащIахэр и пIалъэм икIи фIыуэ зэфIагъэкIынымкIэ жэуап зэрахьым.
Дэ зыхуэдгъэувыжа къалэнхэр зыщ зыхуэгъэзар - цIыхухэм я псэукIэр егъэфIэкIуэнырщ.
Ар къалэн тыншкъым, ауэ пхузэхъулIэнущ.
Абы папщIэ дызыхуеину псори диIэщ.
Ди цIыхухэр гуащIафIэщ, зы мурадым хуэгъэпса жылагъуэ зэкъуэтщ. СызэригугъэмкIэ, тегъэщIапIэ пщIын зы щхьэусыгъуи щыIэкъым дгъэува къалэнхэр къыдэмыхъулIэным лъабжьэ хуэпщI хъуну.
ЕхъулIэныгъэхэр къэтхьын папщIэ дэ дызэгурыIуэу, дызэкъуэту, нэхъри дегугъуу дылэжьэн хуейуэ аращ. Республикэм щыпсэу дэтхэнэми зыхищIэн хуейщ Къэбэрдей-Балъкъэрым исхэм я гъащIэр ефIэкIуэнымкIэ езыми куэд зэрелъытар, абы и къэкIуэнумкIэ жэуап зэрихьыр, ди зэхуэдэ фIыгъуэхэр нахуапIэ хъуным жыджэру телэжьэн зэрыхуейр.
Шэч къытесхьэркъым, ерыщагъ тхэлъмэ, мурадхэр зэдгъэхъулIэным дыхущIэкъумэ, дегугъумэ, ди зэкъуэтыныгъэр дгъэбыдэмэ, дубзыхуа псори зэрызэдгъэхъулIэнум дыщалъхуа Къэбэрдей-Балъкъэрым ифI зыхэлъ Iуэхухэр дэгъэкIыным хуэунэтIауэ!
Ди Хэку уардэм зиужьын папщIэ!