Кёп болмай КъМР-ни Табийгъат байлыкъла эмда экология министри Шауаланы Илияс, Элбрус муниципал районну администрациясыны башчысы Залийханланы Къаншаубий эм Тырныауузну мэри Жаппуланы Руслан Гирхожан сууда ырхы келген арыкъны тазалау жаны бла ишле къалай баргъанлары бла шагъырейленнгендиле эм черекледе болумгъа да къарагъандыла. Аны чеклеринде жагъалары кючленирге керек болгъан жерлени белгилегендиле эм башха эсгертиуле да этгендиле.
Бюгюнлюкде ондан артыкъ энчи техника Гирхожан бла Бахсан суу бирге къошулгъан жерни эмда ырхы ызны кир-кипчикден тазалап кюрешедиле. Аны чеклеринде хата салыргъа боллукъ агъач, таш эм сары топуракъ да кетериледиле.
Объектде ишле графикге кёре барадыла. Тийишли жумушла тамамлансала, суу кётюрюлсе, ырхы къоркъуу салмазча боллукъду. Эсге сала айтсакъ, ол ишле КъМР-ни Табийгъат байлыкъла эмда экология министерствосуну заказы бла этиледиле.