Республиканы Жамауат палатасында айырыулагъа жамауат контроль этерик къараучуланы юйретиу башланнганды, биринчи семинарлагъа Нальчикни бла Урван районну келечилери къатышхандыла. Ала теория эм практика жаны бла билим алгъандыла, айырыу законодательство бла шагъырейленнгендиле, айырыуланы бирикдирилген кюнюнде Жамауат штаб бла байламлыкъланы къалай жюрютюрге кереклисине тюшюннгендиле. Алагъа жалгъан информация бла къалай кюреширге боллугъун, аланы борчларын бла эркинликлерин, штатдан тышында чыкъгъан болумлада не этерге тийишлисин ангылатхандыла. Алагъа дерслени берген преподавательле хазырланыуну Ставропольда федерал экспертлени башчылыкъларында ётгендиле.
Планнга кёре, къараучуланы юйретиу июньну ортасына дери бардырыллыкъды, семинарла республиканы битеу шахарларында бла районларында къуралырыкъдыла. Алагъа жюрюгенле артда тестированияны ётерикдиле эм Жамауат палатадан айырыулагъа къарарча направленияла аллыкъдыла. Регионда битеу да 355 айырыу участка боллукъду, аладан 102-си Нальчикде ачыллыкъдыла. Участкалада 700-ден аслам къараучу ишлерикдиле.
Тёреде бола келгенича, къараучуланы къуллукъларын жамауат организацияланы келечилери, волонтёрла толтурадыла. Жамауат палатаны аппаратыны башчысы Анна Дьяченко билдиргеннге кёре, быйыл къараучуланы араларында жаш адамла да кёпдюле. «Жаш тёлю, студентле бу ишге тири къатышханлары, айхай да, къууандырады. Ол быйылгъы айырыула бютюн ачыкъ ётерлерине, аланы эсеплери халатсыз чыгъарырларына ийнандырады», - дегенди ол.
Жууукъ заманда айырыуланы кюнюнде ишлерик араны къураргъа, айырыула бла байламлыкъ тутарча «исси телефонну» да ачаргъа белгиленеди. Бу жаны бла къошакъ информацияны республиканы Жамауат палатасына сёлешип билирге боллукъду, аны телефону: 8 (8662) 77-67-62. Жамауат штабны пресса-арасына уа 8-928-710-52-06 телефон бла сёлеширге неда сайтына къараргъа f-pr@bk.ru жарарыкъды.