Россейли дирижёр, Санкт-Петербургну  къырал филармониясыны академия симфония оркестрини коллективини художестволу башчысы, Ата журтну аллында къыйыны ючюн орденни толу кавалери Юрий Хатуевич Темиркановха 80 жыл толгъанды. СССР-ни халкъ артистин, Россейни къырал саугъаларыны лауреатын юбилейи бла КъМР-ни Башчысыны къуллугъун болжаллы халда толтургъан Казбек Коков алгъышлагъанды.
- Жашау жолу, аны ата журтлу эм дуния культураны сакълаугъа бла айнытыугъа къошхан юлюшю, - деп айтылады регионну таматасыны телеграммасында, - бийик усталыкъны, искусствогъа кесин аямай къуллукъ этиуню жарыкъ юлгюсюдю. Бошала билмеген ахшылыкъгъа итиндирген кючю-къарыуу, чыгъармачылыкъ ачыкълыгъы эм фахмусу Юрий Хатуевични бусагъатлыкъ дунияда болгъан айтхылыкъ музыкантланы тизмесине къошады эм ызындан келгенлеге юлгю болады.
Казбек Коков маэстрогъа саулукъ, уллу насып, жетишимле эм илхам тежегенди.