Къэбэрдей-Балъкъэр Республикэм щып­сэухэу пщIэ зыхуэсщIхэ!
Си хэкуэгъу лъапIэхэ!
Илъэси 157-кIэ узэIэбэкIыжмэ иухащ Кавказ зауэр. Адыгэ лъэпкъым и тхыдэм щынэхъ гуауэшхуэ дыдэхэм ящыщ зыуэ щытащ а лъэхъэнэр. А зэманым нэхъ ­лъэщу щыта къэралыгъуэхэр я геополитикэ сэбэп зыхэлъхэм щхьэкIэ щы­зэ­пэщIэувам кърикIуа гузэвэ­гъуэшхуэт ар икIи хэщIыныгъэ къызэрымыкIуэхэр ­къи­хьауэ щытащ абы.
Накъыгъэ мазэм хиубыдэ мы махуэм дэ ди щхьэхэр яхудогъэщхъ зауэ гущIэ­гъуншэм хэкIуэдахэм, хамэ ­хэкухэр залымыгъэкIэ псэупIэ зыхуащIа адыгэхэм ягъэва бэлыхьхэр, гузэвэгъуэхэр зыхыдощIэ.
БлэкIам дыхуеплъэкIыжмэ, дэ фIыщIэ яхуэтщIу къы­хыдогъэщ а зэман хьэлъэм ди нэхъыжьхэм яхэлъа ­Iущыгъэр, Урысейм илъэс куэд хъуауэ зэрыкъуэтыр ­зыщамыгъэгъупщэу, абыхэм къагъэлъэгъуащ лъэп­къым и къэкIуэнумкIэ мы­хьэнэшхуэ иIэу ячауэ щыта лъэбакъуэм зэрыхуэпэжыр, адыгэхэм зыми емыщхь я щэнхабзэр, я бзэр, я зэхэтыкIэ дахэхэр яхъумэжыным и лъабжьэр ягъэтIылъащ. КъэкIуэну щIэблэхэм апхуэдэ щIыкIэкIи Iэмал иратащ къэралым ис лъэпкъхэм я ­унагъуэ зэкъуэтым хэту, заужьу, ефIакIуэу я адэжь щIыналъэм щыпсэуну. Шэч къытесхьэркъым лIэщIыгъуэхэр зи ныбжь а зэкъуэтыныгъэмрэ зэгурыIуэныгъэмрэ, нэхъапэхэми хуэдэу, ди Хэкум и къарумрэ и лъэщагъымрэ я лъабжьэ быдэу зэ­ры­щытынум, ды­щалъхуа Къэбэрдей­-Балъ­къэрым кIуэ пэтми нэхъри зэрызиужьынум и джэлэсу зэрыувынум.
Республикэм ис псори узыншагъэ быдэ яIэу, мамыру, фIыр къайхъулIэу, зэIузэпэщу псэуну си гуапэщ.