Къазан шахарны 175-чи номерли гимназиясында болгъан ишледен сора Къабарты-Малкъарны Башчысы Казбек Коковну буйругъун толтурууну чеклеринде Кёнделенни 4-чю номерли орта школунда кенгеш бардырылгъанды. Анда Элбрус муниципал районну мектеплеринде къоркъуусузлукъну жалчытыу не халда болгъанына къаралгъанды. Анга КъМР-ни Жарыкъландырыу, илму эмда жаш тёлюню ишлери жаны бла министри Анзор Езаов, республиканы Парламентини депутаты Ахматланы Мурадин, Элбрус районну администрациясыны башчысы Залийханланы Къаншаубий, билим бериу управленияны таматасы Атаккуланы Нюржан, эллени таматалары, ич ишлени службасыны эмда тюрлю-тюрлю учрежденияланы келечилери къатышхандыла.
Жыйылыу Къазанда мурдарны къолундан жоюлгъанланы шош туруп эсгериу бла башланнганды. Андан сора билим бериу учреждениялада къоркъуусузлукъ сакъланырча, тюрлю-тюрлю аманлыкъладан къорууланырча мадарла сюзюлгендиле, ахыр къонгуроу бла Бир къырал экзамен бир тюрлю чурумсуз ётер, жай каникуллада сабийле солугъан организациялагъа бла лагерьлеге ким болса да киралмаз ючюн контрольну къатыландырыргъа кереклиси айтылгъанды.
Ол кюн Залийханланы Къаншаубий бла Анзор Езаов Кёнделенде Доттуланы Ахматны атын жюрютген 1-чи номерли орта школда садикни болуму бла да шагъырейленнгендиле. Арт заманда элде сабийлени саны дайым ёсе баргъаны бла байламлы эмда учреждение бюгюннгю излемлеге келишмегени эсге алынып, жууукъ заманда 140-160 жери бла жангы сабий сад ишлерге кереклисине тюшюннгендиле.