Къабарты-Малкъарны эл мюлклеринде урлукъ себип бошай турадыла. Бюгюнлюкде аллай иш 203 минг гектарда тамамланнганды. Андан мирзеу бла къудору ёсюмлюклеге 147,5 минг гектар жетеди, ол санда 131 минг гектарны нартюх алады.
Саулай алып айтханда, быйыл жазлыкъ битимлеге 214 минг гектар бёлюннгенди. КъМР-ни эл мюлк министрини орунбасары Мачраил Шетов айтханнга кёре, кюн таплай турса, урлукъ себиу жууукъ заманда бошаллыкъды.
Республиканы бирси жерлериндеча, Май районда да кезиулю сабан ишле къыстау барадыла. Ол санда «Ленинцы» эл мюлк предприятияда 4100 гектарда мирзеулюк нартюхню салып бошагъандыла, урлукъ энтта да 779 гектаргъа себилликди.
Аны бла бирге мал ашны къайгъысы да этиледи. Бусагъатда 120 гектарда ёсген къышлыкъ рапсны эки тенгинден бирин уруп бошай турадыла.
Министрни орунбасары билдиргенича, аграрчыла урлукъ, семиртгич, отлукъ, энчи техника дегенча керекли затла бла толу жалчытылыныпдыла. Ол себепден жаз башы кезиулю ишле графикден кеч къалмай тамамланыллыкъдыла.
